Jope 4 - Vakavakadewa Makawa

Sa vunauci Jope ko Elifasi, ka sa vaka ni sa dauyaco na cudru ni Kalou vei ira nai valavala ca, 1-11. Sa tukuna na raivotu me malumalumu mai na yalo i Jope, 12-21.

¹ Sa qai vosa ko Elifasi na kai Temani, ka kaya,

² Kevaka keitou sa vakatovolea me vosa vei iko, ko na yaloca beka? Ia ko cei e tarovi koya rawa me kakua ni vosa?

³ Raica, ko a vakavulici ira na lewe vuqa, Ia ko a dauvakaukauwataka na liga malumalumu.

⁴ A nomu vosa sa dautokoni koya sa voleka ni bale; Ko sa dauvakaukauwataka na duru malumalumu.

⁵ Ia oqo ni sa yacovi iko, ko sa yalowai, Ni sa tauvi iko, ko sa kidroa.

⁶ Sa sega beka ni ka ko tu dei kina na nomu rerevaka na Kalou, Kei na vu ni nomu i nuinui na nomu i valavala dodonu?

⁷ Mo nanuma mada, se ko cei e rusa ni sa sega ni cala? Se muduki laivi maivei na daucaka dodonu?

⁸ E vaka ga oqo na ka ka'u sa dauraica, ko ira era sa daucuki e na caka ca, Ka kaburaka nai valavala ca, era sa tamusuka ga na ka ko ya.

⁹ Ni sa ceguvi ira na Kalou era sa rusa, Ia ni sa liwavi ira na nona cudru era sa oti laivi.

¹⁰ Na tagi ni laioni, kei na domo ni laioni veikata, Kei na batidra na luve ni laioni sa vorolaki.

¹¹ Sa mate na laioni qase ni sa sega na ka e cova, A ra sa dui vakasesei na luve ni laioni yalewa.

¹² Ia sa tukuni lo vei au e dua na ka, A sa rogoca na daligaqu e dua na tikina lailai.

¹³ Ni'u a vakanananu tiko ki na raivotu ni bogi, E na gauna sa daubiti ira na tamata sa moce lutu,

¹⁴ Sa tauvi au mai na rere, kei na sautaninini, Ka sa yavavala kina na suiqu kecega.

¹⁵ Sa qai lako voli e mataqu e dua na yalo; Sa tu dodonu na vutika ni yagoqu:

¹⁶ Sa wavu tu mai, ia ka'u sa sega ni kunea rawa na kenai rairai: Sa tu e mataqu e dua na raivotu; Sa tu lo ga, au sa qai rogoca e dua na domo, sa kaya,

¹⁷ Me dodonu beka na tamata malumalumu, ka cala na Kalou? Se savasava beka na tamata, ka sega ni savasava ko Koya ka Buli koya?

¹⁸ Raica, sa sega ni vakadinati ira na nona tamata; A sa vakacalai ira na nona agilose:

¹⁹ Ena qai vakaevei ko ira sa tiko e na vale qele, A nodra yavu na kuvu-ni-soso, Ka sa butuqaqi ira na sarasara?

²⁰ Era sa vurumemei tiko mai na mataka ka yacova na yakavi: Era sa yali laivi tu ga ka sega e nanuma kina:

²¹ E dautakali vei ira na kedra vinaka, se segai? Era sa ciba, ia ka sa sega na nodra vuku.