Jope 39 - Vakavakadewa Makawa

Sa tarogi Jope na Kalou e na vuku ni me kei na teira, 1-4; kei na asa kila, 5-8; kei na iunikoni, 9-12; kei na belo, 13-18; kei na ose, 19-25; kei na manulevu, 26; kei na ikeli, 27-30.

¹ Ko sa kila beka nai tabayabaki sa vakasucu kina na me kila ni uluvatu? Se ko sa kila rawa na gauna sa vakasucu kina na teira?

² Se ko sa wilika rawa na vula era yacova? Se ko kila nai tabayabaki era vakasucu kina?

³ Era koto era, ka ra vakasucuma na luvedra, Era biuta tani na nodra yaluma.

⁴ Sa yago vinaka na luvedra, era tubu cake mai veikau; Era lako tani, ka sega ni lesu tale vei ira.

⁵ Ko cei sa vakatala na asa kila me veitalia voli? Se ko cei sa sereka nai vesu ni asa kila?

⁶ Ka'u sa cakava na lekutu me nona vale, Kei na talasiga me nonai tikotiko.

⁷ Sa beci ira na lewe vuqa e na koro, Ka sa weletaka na nona kaila na vakacici manumanu.

⁸ A kena vanua me kana voli kina na veiulu-ni-vanua, A sa qara na co drokadroka kecega.

⁹ Ena via qaravi iko beka na iunikoni; se na via tiko e na nomu lomanibai?

¹⁰ Ko sa vauca rawa beka na iunikoni e na kena dali ki nai siviyara? Se na muri iko ni yara ka kadrukadru e na buca?

¹¹ Ko na vakararavi vua ni sa levu na nona kaukauwa? Se ko na biuta beka vua na nomu i tavi cakacaka?

¹² Ko na vakararavi vua me kauta mai na nomu sila, Ka yauta mai ki na nomu lololo?

¹³ A taba ni ositereji sa daumarau! Ia na tabana kei na lawena sa yaga li ki na luvena?

¹⁴ Sa vakalutuma na kena yaloka ki na qele, Ka vakatakatataka e na kuvu-ni-soso,

¹⁵ Ka sa sega ni nanuma ni na butuka beka na tamata, Se na buturaka na manumanu kila.

¹⁶ Sa loma kaukauwa vei ira na luvena, me vaka era sega ni nona; Sa oca wale ko koya, ka sa sega ni rere;

¹⁷ Ka ni sa sega ni soli vuku vua na Kalou, Ka sa sega ni vakayalomatuataki koya.

¹⁸ Na gauna sa wavu tu vakadodonu cake kina ko koya, Ena beca na ose kei koya sa vodoka.

¹⁹ Ko sa solia beka vua na ose na kaukauwa? Ko sa vakatobetaka na domona e na tobe kurekure?

²⁰ Ko sa qisi koya beka me rika me vaka na vodre? Na suru ni ucuna sa ka rerevaki.

²¹ Sa qeva na buca e na yavana, ka reki e na nona kaukauwa: Sa la'ki tavaki ira na tamata era vakaiyaragi tu.

²² Sa dredrevaka na rere, ka sa sega ni taqaya; Sa sega talega ni dro tani mai nai seleiwau.

²³ Sa qiriti koya na taga ni gasau, Kei na moto makamakalivata kei nai sasabai.

²⁴ Sa tiloma na qele e na nona lomakatakata kei na cudru: Ka sa sega ni tu vakadua ni sa qai uvu na davui.

²⁵ Sa vakaueue ki na domo ni davui; A sa boica nai valu ni sa yawa tu, Kei na nodra kurukuru na kapiteni kei na kaikaila.

²⁶ Sa vuka cake beka na manulevu e na nomu vuku, Ka vakatetaba me vuka ki na mata ni ceva?

²⁷ Sa vuka cake beka na ikeli ni ko sa vakarota kina, Ka cakava maicake na nona tavata?

²⁸ Sa tiko mai na uluvatu ka sa tu dei kina, E na bati ni uluvatu, kei na tikina dredre.

²⁹ Mai na yasana ko ya sa qara na kena; Sa irova vakayawa na matana.

³⁰ A luvena talega sa daugunu dra: Ia e na vanua sa no kina na mate, sa tiko kina ko koya.