Jope 38 - Vakavakadewa Makawa

Sa qai vosa vei Jope na Kalou, ka tukuna na nona cakacaka, me kila kina ko Jope na nona lialia kei na nona malumalumu.

¹ Sa qai vosa mai vei Jope ko Jiova mai na covulaca, ka kaya,

² Ko cei oqo sa vakabutobutotaka na lewa E na vosa sa sega ni vuku?

³ Mo vauca mada vakatagane na tolomu: Ni'u na vakataroga vei iko, ia mo vakatakila mai vei au.

⁴ Ko a tiko maivei ni ka'u a tauyavutaki vuravura? Mo tukuna mai, kevaka ko sa kila.

⁵ Ko cei ka lewa na kenai vakarau, kevaka ko sa kila? Se ko cei ka dreta kina na dali i vakarau?

⁶ Sa tauyavutaki e na dela ni cava? Se ko cei ka tea na kena vatu i tutu;

⁷ Ni ra a sere vata na kalokalo i volasiga, Ka ra kaila e na reki ko ira kecega na luve ni Kalou?

⁸ Se ko cei ka sogolatia na wasawasa e nai sogo, Ni sa loka, me vaka ni sa curu mai na kete?

⁹ Ni'u a cakava na o me kenai sulu, Kei na butobuto loaloa me kenai vau,

¹⁰ Ni'u a vakarauta na kenai yalayala, Ka cakava na kenai vakadei kei na kenai sogo,

¹¹ Ka kaya, Mo yaco mai ki ke, kakua ni sivia: Ia me yala ga eke na nomu ua sa viavialevu?

¹² Ko sa vakarota beka na mataka e na nomu gauna, Ka vakatakila ki na mataka na vanua me kida kina?

¹³ Me taura nai yalayala kei vuravura, Me ra kureitaki tani kina ko ira nai valavala ca?

¹⁴ Sa vuki oqori me tautauvata kei na tete ki na ka sa tabaki kina; A sa tu mai na ka ko ya me vaka nai sulu.

¹⁵ Sa bureitaki vei ira nai valavala ca na kedra rarama, Ia ena ramusu na liga sa viavialevu.

¹⁶ Ko sa curuma beka nai vurevure ni waitui? Se ko sa lako voli e na dreke ni wasawasa;

¹⁷ Se sa dola oti vei iko na katuba kei mate? Se ko sa kunea na kenai sogo ni yaloyalo ni mate?

¹⁸ Se ko kila beka na kena raraba ni vuravura? Tukuna mai kevaka ko kila na ka kecega oqo.

¹⁹ Sa evei na gaunisala sa tiko kina na rarama? Ia na butobuto, sa evei na kena vanua,

²⁰ Mo kauta kina ki na kenai yalayala, Mo kila talega kina na sala ki na kena vale?

²¹ Ko sa kila beka ni ko a qai sucu? Se ni sa vuqa nai wiliwili ni nomu siga?

²² Ko sa curuma beka na lololo ni uca-vulavula? Se ko sa raica na lololo ni uca-cevata,

²³ Ka'u sa maroroya ki na gauna ni rarawa, Ki na siga ni tuvai valu kei nai valu?

²⁴ A sala cava sa wase kina na rarama, Sa veibiuyaki kina na cagi mai na tu-i-cake e vuravura?

²⁵ Ko cei sa wasea na sala ni wai me tau mai kina ni sa vuabale, Se na sala me sei kina na kurukuru;

²⁶ Me tau kina na uca ki na vanua sa sega kina na tamata; Kei na lekutu, sa sega kina na tamata;

²⁷ Ka me vakamamautaka na vanua sa lala ka sega ni teivaki; Me vakatubura talega na mata ni co malumalumu me rovu mai?

²⁸ Sa vakatamani beka na uca? Se ko cei beka sa vakatubura na mata ni tegu?

²⁹ A kete i cei sa lako maikina na wai cevata? A tegu cevata talega ni lomalagi, ko cei sa vakasucuma?

³⁰ Sa tabogo na wai me vaka e na vatu, Ka sa cevata na dela ni wai titobu.

³¹ Ko na vauca vata rawa na veikalokalo ko Peliatisi, Se sereka nai vau kei Oraioni?

³² Ko na kauti Masaroci beka mai e na kena gauna? Se tuberi Akituro yani kei ira na luvena?

³³ Ko sa kila beka nai valavala ni kena lewai na lomalagi? Ko sa vakayacora rawa, mai na kena lewa ki vuravura?

³⁴ Ko sa tabalaka rawa beka na domomu ki na o, Me tauci iko na wai levu?

³⁵ Ko na vakatala rawa beka na livaliva, me lako yani, Me mai kaya vei iko, Koi keitou ga oqo?

³⁶ Ko cei sa vakacuruma na vuku ki na lomada? Se ko cei sa vakayalomatuataka na tamata?

³⁷ Ko cei sa wilika rawa na o kei lomalagi e na nona vuku? Se ko cei ka livia rawa na wai mai na tavaya kei lomalagi,

³⁸ Ni sa kaukauwa mai na kuvu-ni-soso, Ka veikabi sara na qele qa?

³⁹ Ko na vakasasa beka na kena kakana na laioni? Se vakamamautaki ira na luve ni laioni ni ra sa viakana,

⁴⁰ Ni ra sa koto sobu e nodra i kotokoto, Ka tiko ga e na tikina vuni ni ra lawa koto?

⁴¹ Ko cei sa solia na kena na reveni, Ni sa tagi na luvena vua na Kalou, Era sa lako sese voli ni sa sega na kedra?