Jope 37 - Vakavakadewa Makawa

Sa tukuna tiko ko Ilaiu na nona cakacaka rerevaki na Kalou, kei na kena dodonu na rerevaki koya.

¹ Na ka talega oqo sa sautaninini kina na utoqu, A sa lade tani mai na kena tikina.

² Dou rogoca sara na domona ni sa se mai, Kei na rorogo sa lako mai na gusuna.

³ Sa vakatala yani ko koya ki na ruku i lomalagi taucoko, Kei na nona livaliva ki nai yalayala kei vuravura.

⁴ Sa qai vadugu mai emuri na domona, Sa kurukuru ko koya e na domona vakaturaga: Ia ni sa rorogo tu na domona, ena sega ni tarova ko koya.

⁵ Sa kurukuru vakurabui na Kalou e na domona; Sa cakava na ka levu ko koya eda sa sega ni kila rawa.

⁶ Ni sa kaya ki na uca-vulavula, Mo tau ki vuravura: Ki na uca wale talega, Kei na uca levu ni nona kaukauwa.

⁷ Sa qamuta dregata na ligadra na tamata kecega; Me ra kila na nona cakacaka na tamata kecega.

⁸ Era sa qai la'ki curu ki na nodra qara na manumanu, Ka tiko ga e na nodra tikina.

⁹ Sa lako mai na covulaca mai na ceva: Kei na liliwa mai na tokalau,

¹⁰ Sa cevata na tegu e nai cegu ni Kalou: A sa cevata sara na wai levu.

¹¹ Ka sa vakatawa na o loaloa e na kena uca: Sa vakaseavutaka na o lumilumisa:

¹² A sa veikauyaki voli e na nona vosa: Me ra kitaka kina na ka kecega sa vakarota ko koya, E na veivanua e vuravura sa tawa.

¹³ Sa vakayacora mai ko koya, me nona kuita, Se e na vuku ni nona vanua, se me ka ni loloma.

¹⁴ Mo vakatu daliga, Jope, ki na ka oqo: Mo tu vakadua, ka vakanananu ki na cakacaka e veivakurabuitaki ni Kalou.

¹⁵ Ko sa kila beka na siga sa lesia kina na ka oqori na Kalou, Ka lewa talega kina na livaliva ni nona o me tibi mai?

¹⁶ Ko sa kila beka se sa lili vakavinaka vakaevei na o, Na nona cakacaka e veivakurabuitaki ko koya sa vinaka duaduaga na nona vuku?

¹⁷ Se sa katakata vakavinaka vakaevei na nomu i sulu, Ni sa vakacegui vuravura ko koya ni sa mudre mai na ceva?

¹⁸ Drau sa tevuka vata kaya beka na lomalagi, O koya sa kaukauwa, ka vaka nai iloilo vakawaicalataki?

¹⁹ Mo vakatakila vei keitou na vosa me keitou kaya vua: Ni keitou sa sega ni tukuna vakadodonu rawa e na vuku ni butobuto.

²⁰ Me na tukuni beka vua ni'u sa vosa? Kevaka sa vosa na tamata, ena qai tilomi dina ga ko koya.

²¹ Ia oqo, sa dredre vei ira na tamata me raica na rarama sa serau mai lomalagi; Ka sa liwa yani na cagi, ka vakasavasavataka.

²² Sa vaka na koula sa lako mai na mata ni tokalau: Sa tu vua na Kalou na lagilagi rerevaki.

²³ Ko koya sa Kaukauwa, eda sa sega ni kilai koya rawa; sa uasivi ko koya e na kaukauwa. Kei na caka dodonu, ka ni sa vutu ni valavala dodonu; ena sega ni ia na veivakasaurarataki.

²⁴ O koya oqo era sa rerevaki koya kina na tamata: Sa sega ni vinakati ira loa era lomavuku.