Jope 36 - Vakavakadewa Makawa

Sa vosa tiko ko Ilaiu, a sa tukuna nai valavala ni lewa ni Kalou, 1-12. Sa vunauci Jope, a sa vakavulici koya talega, 13-21. Sa tukuna na lewa kei na kaukauwa ni Kalou, 22-33.

¹ A sa ia tiko ko Ilaiu, ka kaya,

² Mo vosoti au mada vakalailai, ka'u na vakatakila vei iko, Ni sa vo tiko vei au na vosa me'u totaka kina na Kalou.

³ Au na kauta vakayawa mai na noqu vuku, Ia ka'u na vakadonui Koya ka Buli au.

⁴ Ni na sega dina ni lasu na noqu vosa: O koya sa tiko vata kei iko, sa vinaka duaduaga na nona vuku.

⁵ Raica, sa kaukauwa na Kalou, a sa sega ni beca e dua: Sa levu na nona kaukauwa kei na nona vuku.

⁶ Sa sega ni maroroi ira tiko nai valavala ca: Ka sa ia na ka dodonu vei ira na dravudravua.

⁷ Sa rai tikoga vei ira na yalododonu: Era tiko ga kei ira na tui e nai tikotiko vakaturaga: Io, sa vakataudeitaki ira tiko ka tawa mudu, a ra sa vakalevulevui.

⁸ Ia ke sa vauci e nai vesu, Ka tauri e nai vau ni rarawa:

⁹ Ke sa qai vakatakila vei ira na nodra cakacaka, Kei na nodra i valavala ca ni ra sa uasivi.

¹⁰ Sa basuka na daligadra talega me ra vakatavulici, A sa vakarota vei ira me ra saumaki mai na ca.

¹¹ Kevaka era vakarorogo, ka qaravi koya, Era na vakaotia na nodra siga ni ra tiko vinaka, Kei na nodra yabaki ni ra marau tiko.

¹² Ia kevaka era sa sega ni vakarorogo, era na mate e nai seleiwau, Ka mate ni ra lialia tiko.

¹³ Ia ko ira na yalodauveivakaisini era sa binia tiko na cudru; Era sa sega ni tagi vua ni sa vauci ira.

¹⁴ Sa donaci ira ga na mate, A ra sa tiko vata kei ira sa sega ni savasava.

¹⁵ Sa vakabula na dravudravua ko koya e na nona rarawa, Ka sa basuka na daligadra ni ra vakasaurarataki.

¹⁶ Ka sa via kauti iko talega mai na vanua ni rarawa Ki na vanua rabaraba, sa sega kina na osooso; Ka me uro talega na ka sa viritu ki na nomu tepeli.

¹⁷ Ia ko sa vakayacora na nodra lewa nai valavala ca: Ena tauri iko na kena lewa kei na kenai sau dodonu.

¹⁸ Ni sa tu na cudru, mo qarauni iko de yaviti iko ko koya ko qai takali yani; Ena qai sega ni vakabulai iko rawa e dua nai soro levu.

¹⁹ Ena vinakata beka ko koya na nomu i yau? E segai, se na koula, se na vu ni nomu kaukauwa kecega.

²⁰ Mo kakua ni gadreva na bogi, E dauyali kina na tamata mai na nodra yasana.

²¹ Mo qarauni iko, mo kakua ni goleva na ka sa sega ni dodonu: Ni ko a digitaka oqo, ka cata na rarawa.

²² Raica, sa vueti keda cake na Kalou e na nona kaukauwa; Ko cei e vakatavuvuli me vakataki koya?

²³ Ko cei sa lesia na nonai lakolako? Se ko cei me kaya, Ko sa caka cala?

²⁴ Mo nanuma mo vakalevulevuya na nona cakacaka, Era sa dauraica na tamata.

²⁵ Sa ra raica rawa na tamata kecega E rawarawa me raica vakayawa na tamata.

²⁶ Raica, sa levu na Kalou, ia eda sa sega ni kilai koya; Sa sega ni kilai rawa nai wiliwili ni nona yabaki.

²⁷ Ni sa vakuvuya cake na wai ko koya: Sa tau maikina na uca me vaka na kena bewabewa:

²⁸ Sa tau mai na o, Ka miriki ira na lewe vuqa.

²⁹ Sa dua beka me kila rawa nai tevutevu ni o, Se na kurukuru mai na nona vale?

³⁰ Raica, sa tevuka ko koya na nona rarama e delana, Ka sa ubia na dreke ni wasawasa.

³¹ Ni sa lewai ira na veivanua e na ka oqo; Sa solia vakalevu na kakana.

³² Sa tabonaka na livaliva e na ligana: A sa lewa na vanua me se kina.

³³ A kena rorogo sa tukutuku e na vukuna, Kei na pulumokau e na vukuna ka lako cake.