Jope 35 - Vakavakadewa Makawa

Sa vaka ko Ilaiu ni sa sega ni ca rawa se vinaka rawa na Kalou e na vuku ni cakacaka ni tamata, 1-8. A sa sega ni kune ka vinaka na tamata eso ni ra sega ni kerea e na vakabauta, 9-16.

¹ Sa ia tiko na vosa ko Ilaiu, ka kaya,

² Ko sa nanuma beka ni ka dodonu oqo, Mo kaya, Sa uasivi cake na noqu yalododonu, sa uasivi sobu na nona yalododonu na Kalou?

³ Ni ko sa taroga, A cava na betena vei au ke sa sega vei au nai valavala ca?

⁴ Au na tukuna vei iko, Vei iratou talega na nomu i tokani ka tiko vata kei iko.

⁵ Mo ta cake mada ki na lomalagi, ka raica: Ka vakaraica na o sa cecere cake vei iko.

⁶ Kevaka ko sai valavala ca, a cava ko sa cakava vua? Ia kevaka sa vakalevutaki na nomu talaidredre, a cava ko sa kitaka vua?

⁷ Kevaka ko sa caka dodonu, a cava ko sa solia vua: Se cava sa rawata maivei iko ko koya?

⁸ Ena ca beka e na nomu i valavala ca e dua na tamata vakataki iko; Ka na yaga beka na nomu caka dodonu vua e dua na luve ni tamata.

⁹ Ni sa levu na veivakasaurarataki, era sa tagi kina ko ira era sa vakasaurarataki: Era sa qoqolou e na vuku ni ligadra na kaukauwa.

¹⁰ Ia sa sega e dua sa kaya, Sa evei na Kalou ka buli au, Ko koya sa solia na sere e na bogi,

¹¹ Ko koya sa vakavulici keda vakalevu, ka vakavulici ira vakalailai na manumanu ni vanua; Ka sa qisi keda me da vuku cake vei ira na manumanu vuka?

¹² Era tagi maikea ka sega e dua sa vosa mai, E na vuku ni nodra viavialevu na tamata ca.

¹³ E dina ena sega ni vakarogoca na ka wale na Kalou, Ena sega talega ni goleva ko Koya sa Kaukauwa.

¹⁴ Ia ni ko sa kaya ko na sega ni kunei koya rawa, Sa tiko ga vua na lewa dodonu: o koya oqo mo vakararavi kina vua.

¹⁵ Ia oqo, ni sa sega ni lako mai ko koya e nona cudru, Ka sa sega ni nanuma vakalevu na viavialevu:

¹⁶ Sa dalaga wale kina ko Jope, Sa vakalevutaka na vosa sa sega ni vuku.