Jope 34 - Vakavakadewa Makawa

Sa vaka ko Ilaiu, ni sa tukuna ko Jope ni sa sega ni yalododonu na Kalou, 1-9. Sa sega ni caka cala rawa na Kalou, 10-30. Sa nona cakacaka dodonu na tamata me vakamalumalumutaki koya vua na Kalou, 31-37.

¹ A sa vosa tiko ko Ilaiu, ka kaya,

² Dou rogoca na noqu vosa, koi kemudou na tamata vuku; Ka vakarorogo vei au, koi kemudou sa daukila ka.

³ Ni sa vakalewa na vosa na daliga, Me vaka sa tovolea na kakana na gusu.

⁴ Tou digitaka me nodatou na lewa dodonu: Me tou kila vakataki kedatou na ka e vinaka.

⁵ Ni sa kaya ko Jope, Au sa yalododonu, A sa lewai au vakatani na Kalou:

⁶ Me'u lasu beka e na ka ka'u lewai kina? Na noqu mavoa sa na sega ni bula rawa, ia ka sega na ka ca e vuna.

⁷ Ko cei na tamata sa vakataki Jope, Me gunuva na veivakalialiai me vaka na gunu wai?

⁸ A sa sala vata kei ira na daucaka ca, A sa lako voli kei ira na tamata ca.

⁹ Ni sa kaya ko koya, Sa sega ni yaga vua na tamata Me marautaki koya na Kalou.

¹⁰ O koya oqo mo dou vakarorogo kina vei au, koi kemudou na tamata yalomatua; Me yawa vua na Kalou, me caka ca; Me yawa talega vua sa Kaukauwa, me sega ni dodonu

¹¹ Ni na solia vua na tamata me vaka na nona cakacaka, Ena kitaka talega me ra kunea na tamata yadua me tautauvata kei na nodra i valavala.

¹² E dina ga ni na sega ni caka ca na Kalou, Ena sega talega ni kauta vakatani na lewa ko Koya sa Kaukauwa.

¹³ Ko cei sa lesi koya me lewai vuravura? Se ko cei sa solia vua na vuravura taucoko me maroroya?

¹⁴ Ke sa nanuma na tamata ko koya, Ke sa kauta tale vua na yalona kei na nonai cegu;

¹⁵ Ke sa na qai ciba vata kecega na tamata, Ka na lesu tale na tamata me kuvu-ni-qele.

¹⁶ Ia kevaka ko sa vuku, mo rogoca oqo: Mo vakarorogo ki na noqu vosa.

¹⁷ Me lewa beka ko koya sa cata na ka dodonu? Ko na vakacalai koya beka sa yalododonu sara?

¹⁸ Me dua beka e kaya vua e dua na tui, kemuni sa ca? Se vei ira na turaga, Dou sai valavala ca?

¹⁹ Me qai kaya vakacava vei koya sa sega ni vinakati ira loa na turaga, Ka sega ni nanumi ira vakalevu na vutuniyau, ka vakalailai na dravudravua? Ni ra sa cakacaka ni ligana ko ira kecega.

²⁰ Era na mate vakasauri sara, Ka ra na kidroa na tamata e na lomaloma-ni-bogi, ka lako tani yani: Era na kau tani na qaqa ka sega na liga e kauta.

²¹ Ni sa rai tiko na matana ki nai valavala ni tamata, Ka sa raica kecega na nonai lakolako.

²² Sa sega na butobuto, se na yaloyalo ni mate, Me ra vunitaki ira kina na daucaka ca.

²³ Ni na sega ni tauca ko koya vua na tamata na ka e sega ni dodonu; Me rau ia kina na veilewai kaya na Kalou.

²⁴ Ena vorolaki ira ga na tamata qaqa ka na sega ni tarogi, Ka na lesi ira na tani eso me kedrai sosomi.

²⁵ Ni sa kila na nodra cakacaka ko koya, Ka sa vukici ira e na bogi, a ra sa rusa kina.

²⁶ Sa yaviti ira e na matanavotu, Me vaka era tamata ca;

²⁷ Ni ra lesu tani me ra kua ni muri koya, Ka sega ni via nanuma na nona sala:

²⁸ Ia e na vukudra sa yaco kina vua na nodra tagi na dravudravua: Ka sa rogoca ko koya na nodra tagi era sa rarawa.

²⁹ Ni sa solia na vakacegu ko koya, ko cei me qai ia na veivakararawataki? Ni sa vunia na matana ko koya, ko cei me qai raici koya? Se sa caka ki na vanua, se vua na tamata e dua bauga:

³⁰ Ka me kakua ni lewa na dauveivakaisini, De ra sa coriti ko ira na tamata.

³¹ Sa dodonu ga me da kaya vua na Kalou, Au sa vosota ga: au na sega ni ia tale na ca:

³² Na ka ka'u sa sega ni kila, mo ni vakavulica vei au: Kevaka ka'u sa caka ca ka'u na sega ni ia tale.

³³ Me caka beka vua me vaka na lomamu? Ena sauma ga ko koya, se ko cata, se ko vinakata; ka sega koi au: Ia mo tusanaka na ka ko kila.

³⁴ Me ra tukuna vei au ko ira na tamata yalomatua, Me vakarorogo talega vei au ko koya sa vuku.

³⁵ Sa vosataka ko Jope na ka sa sega ni kila, Ka sa sega ni vuku na nona vosa.

³⁶ Au sa vinakata me vakatovolei vakaoti mada ko Jope, Ka ni sa totaki ira na tamata ca.

³⁷ Ni sa kuria ko koya na nonai valavala ca e na be: Sa vakasausau e na kedatou maliwa, Ka ia vakalevu na nona vosacataki koya na Kalou.