Jope 33 - Vakavakadewa Makawa

Sa vakarota vei Jope ko Ilaiu me vakarogoca, 1-7. Sa vunauci Jope e na vuku ni nona vosa eso, 8-13. Sa dauvakatavulici ira na tamata na Kalou me ra veivutuni, 14-30. Sa vakarota tale vei Jope me vakarogoca, 31-33.

¹ O koya oqo mo rogoca mada kina, Jope, na noqu vunau, Ka vakarorogo ki na noqu vosa kecega.

² Raica, ka'u sa qai dalaga, Sa vosa oti e gusuqu na yamequ.

³ A noqu vosa ena tukuna na ka dodonu ni lomaqu: Ia na tebenigusuqu ena cavuta vakamacala na vuku.

⁴ Sa buli au na Yalo ni Kalou, A sa solia vei au na bula nai cegu i Koya sa Kaukauwa.

⁵ Kevaka ko sa rawata, mo vosa tale vei au, Mo tuva vakavinaka na nomu vosa e mataqu, mo tu cake.

⁶ Raica, ka'u sa vakataki iko e na mata ni Kalou: Koi au talega, ka'u sa buli e na qele.

⁷ Raica, ena sega ni vakarerei iko na noqu veivakatarerei, Ena sega talega ni bitaki iko na ligaqu.

⁸ E dina ko sa vosa oti e daligaqu, Ka'u sa rogoca talega na domo ni nomu vosa, sa vaka ne,

⁹ Au sa savasava ka sega ni valavala ca, Au sa sega ni cala, ka sa sega vei au na ka tawa dodonu;

¹⁰ Raica, sa dauqara ko koya na ka me'u ca kina, Sa nanumi au me'u nona meca;

¹¹ Sa vauca na yavaqu e nai vesu kau, Sa vakaraica na noqu i lakolako kecega.

¹² Raica, e na ka oqo ko sa sega ni dodonu: Ka'u na vakatakila vei iko, Ni sa levu na Kalou, ka lailai na tamata.

¹³ A cava ko sa veivala kaya kina? Ni sa sega ni tukuni koya e na vuku ni dua na nonai valavala.

¹⁴ Ni sa vosa vakadua na Kalou, Io, ka vakarua, a ra sa sega ni kila na tamata.

¹⁵ E na tadra, e na raivotu e na bogi, Ni sa biti ira na tamata na moce lutu, Ni ra sa moce koto e nodra i mocemoce:

¹⁶ Sa qai basuka ko koya na daliga ni tamata, Ka vakadeitaka vei ira nai vakavuvuli,

¹⁷ Me vagolea kina na tamata mai na nonai naki, Ka tarova na tamata me kakua ni dokai koya.

¹⁸ Sa tarova na yalona me kakua ni lako ki na rusa, Kei na yagona me kakua ni mate e nai seleiwau.

¹⁹ Sa vakararawataki talega ko koya e na nonai mocemoce, Kei na suina e vuqa e na yaluma levu:

²⁰ A sa cata kina na kakana na lomana, Kei na yalona na kakana vinaka.

²¹ Sa lutu sobu na lewena, me sega ni raici rawa; Ia na suina sa dausega ni votu, sa qai votu mai.

²² Io, na yalona sa toro voleka ki nai bulubulu, Kei na nona bula vei ira na dauveivakarusai.

²³ Kevaka sa tiko vua e dua nai talaki, Nai vakavuvuli, e le dua ga vei ira na lewe udolu, Me tukuna vua na tamata na nona yalododonu:

²⁴ Ena qai yalololoma vua ko koya, ka kaya, Me vakabulai mada ko koya, me kakua ni lako sobu ki nai bulubulu; Au sa kunea na kenai soro.

²⁵ Ena qai vinaka tale na lewena me vaka na lewe ni gone: Ena vuki me cauravou tale:

²⁶ Ena masu vua na Kalou, ka na yalololoma vua ko koya: Ia ena raica na matana ka reki: Ni na solia vua na tamata me vaka na nona caka dodonu.

²⁷ Sa raici ira na tamata ko koya, ka sa kaya, Au sai valavala ca, ka vakatanitaka na ka e dodonu, A sa sega ni yaga vei au;

²⁸ Ena vakabulai koya ko koya me kakua ni lako sobu ki nai bulubulu, Ia ena kunea na rarama ni bula.

²⁹ Raica, na ka kecega oqo sa daucakava na Kalou vei ira na tamata,

³⁰ Me vakalesui koya tale mai nai bulubulu, Me vakararamataki talega e na nodra rarama na bula.

³¹ Mo nanuma vinaka, ko iko Jope, ka vakarorogo vei au: Mo tiko lo, ka'u na qai vosa.

³² Kevaka sa dua na nomu vosa, mo kaya mai vei au: Mo vosa mai, ni'u sa via vakadonui iko.

³³ Kevaka e segai, mo vakarorogo vei au: Mo tiko lo, ka'u na qai vakavulici iko e na vuku.