Jope 32 - Vakavakadewa Makawa

Sa cudru ko Ilaiu vei Jope kei iratou na wekana tolutolu, 1-6. Sa cauravou ga ko koya, ia ka sa doudou ni vosa ni sa so na ka e via tukuna, 6-22.

¹ Sa qai cegu ni vosa vei Jope ko iratou na tamata tolutolu oqo, ni sa vakadonui koya tiko.

² Sa qai waqa mai na cudru i Ilaiu na luve i Parakeli na luve i Pusa, mai na mataqali i Rami: sa waqa mai na nona cudru vei Jope, ni sa vakadonui koya, ka sa sega ni vakadonuya na Kalou.

³ A sa waqa talega na nona cudru vei iratou na wekana tolutolu, ni ratou sa vakacalai Jope tiko, ka sa sega ni vakadinadinataka rawa.

⁴ Ia ko Ilaiu sa vakaberabera ni vosa vei Jope, ni ratou sa qase vua.

⁵ Ia ni sa kunea ko Ilaiu ni sa sega na vosa e na gusudratou na tamata tolutolu ko ya, sa qai waqa mai na nona cudru.

⁶ A sa qai vosa ko Ilaiu na luve i Parakeli na luve i Pusa, ka kaya, Koi au ka'u sa gone wale, ia koi kemudou dou sa qase sara; O koya ka'u a tarovi au kina, ka rere ni vakatakila vei kemudou na lomaqu.

⁷ Au a kaya, Me vosa mada ko ira sa bula dede, Ia me vakatavuvulitaka na vuku ko ira ka yabaki vuqa.

⁸ Ia ka sa tiko e dua na yalo e na loma ni tamata: A sa solia vei ira na vuku nai cegu i Koya sa Kaukauwa.

⁹ Era sa sega ni vuku kece na turaga: A ra sa sega ni kila na lewa dodonu ko ira kece na qase.

¹⁰ O koya ka'u a kaya kina, Dou vakarorogo mai vei au; Ka'u na vakatakila talega na lomaqu.

¹¹ Raica, ka'u a waraka na nomudou vosa; Ka'u a vakatu daliga ki na nomudou i vakavuvuli, Ni dou a qara na ka mo dou kaya.

¹² Ia ka'u a vakarorogo vei kemudou, Ka raica, sa sega e dua vei kemudou sa vakatakila rawa ni sa cala ko Jope, Se sauma tale rawa na nona vosa:

¹³ De dou kaya, Keitou sa kunea e na neitou vuku: Sa biuti koya sobu na Kalou, ka segai na tamata.

¹⁴ Ia sa sega ni vosataki au: Ka'u na sega talega ni vosataka vua na nomudou vosa.

¹⁵ Eratou a kidroa, eratou a sega ni vosa tale: E sega na vosa me ra kaya.

¹⁶ Ka me'u wawa tiko, ni ratou sa sega ni vosa; Ni ratou sa tiko lo, ka sega ni vosa tale?

¹⁷ Koi au talega, ka'u na vosataka na noqu i tavi; Koi au talega, ka'u na vakatakila na lomaqu.

¹⁸ Ni sa levu na vosa vei au; Sa uqeti au na yalo sa tiko e lomaqu.

¹⁹ Raica, na ketequ sa vaka na waini sa sogo deivaki; Sa voleka ni kacabote me vaka na tavaya vou.

²⁰ Ka'u na vosa me'u vakacegu rawa: Ka'u na dalaga, ka me'u sauma mada.

²¹ Me'u kakua mada ni vinakata loa e dua na tamata, Me'u kakua talega ni veicavilaki ni'u sa vosa vakarokoroko ki na tamata.

²² Ni'u sa sega ni kila na veicavilaki: Kevaka ka'u kitaka vakakina, ena kauti au tani vakasauri ko koya ka buli au.