Jope 31 - Vakavakadewa Makawa

Sa vaka ko Jope ni sa dautarovi koya sara ko koya mai nai valavala sa sega ni dodonu.

¹ Au sa ia oti na veiyalayalati kei na mataqu; Me'u qai via nanuma vakacava e dua na goneyalewa?

² Me qai cava na noqu i votavota mai vua na Kalou maicake? Ka cava na ka ka'u na taukena maivei Koya na Kaukauwa maicake?

³ Sa sega beka ni yacovi ira nai valavala ca na rusa? Kei na cudruvi sa dua tani vei ira sa cakava nai valavala ca?

⁴ Sa sega beka ni raica na noqu i lakolako ko koya, Ka wilika kecega nai cavucavu ni yavaqu?

⁵ Kevaka ka'u a muria na ka lasu, Se kusarawa na yavaqu me'u ia na veivakaisini;

⁶ Me'u vakatovolei mada e nai vakarau dodonu, Me kila kina na Kalou ni'u sa sega ni cala.

⁷ Kevaka sa vakatikitiki tani mai na sala na yavaqu, Ka muria na mataqu na lomaqu, Ka kabita na ligaqu e dua na ka qeleqelewa;

⁸ Me'u qai teitei koi au, ka dua tani me kania: Ia me cavuivuvu na noqu kawa.

⁹ Kevaka sa gole vakatani na lomaqu vua e dua na yalewa; Se'u lawa koto mai na nona katuba na kai noqu;

¹⁰ Me qai qaqi sila na watiqu vua e dua tani, Me ra koto vata kaya ko ira na tani.

¹¹ Ni sa ka ca sara oqo, Io, nai valavala ca me ra cudruva ko ira na mataveilewai.

¹² Ni sa bukawaqa oqori sa katia me yacova na rusa, Sa na cavuivuvu kina na noqu i yau kecega.

¹³ Kevaka kau a beca na noqu tamata se na noqu vada, Ni rau sa veileti kei au;

¹⁴ Ka'u na qai vakaevei ni sa tu cake na Kalou? Ia ni sa cudru ko koya, a cava me'u kaya vua?

¹⁵ Ko koya sa buli au e na kete, sa sega beka ni buli koya talega? Sa sega beka ni dua bau ga sa cakavi keirau e na kete?

¹⁶ Kevaka ka'u sa bese ni solia na ka era gadreva na dravudravua, Se'u vakaocataka na matana na yada;

¹⁷ Se'u kania duadua na qau tiki ni kakana, Me sega ni kana kina na luveniyali;

¹⁸ Ni sa tubu vata kei au mai na gauna ka'u a cauravou kina, me vaka sa tubu kei tamana, Ia ka'u sa tuberi koya na yada mai na siga ka'u a sucu kina;

¹⁹ Kevaka ka'u sa kunea e dua sa mate ni sa sega na nonai sulu, Se dua na dravudravua sa sega na ka me tutuvitaki kina:

²⁰ Kevaka sa sega ni vosavakalougatataki au na tolona; Ka sega ni katakata ko koya e na vutika ni noqu sipi;

²¹ Kevaka ka'u sa dodoka cake vakaca na ligaqu vei ira na luveniyali, Ni'u sa kila sa tiko na noqu kaukauwa mai na matamata-ni-koro:

²² Me qai lutu tani na ligaqu mai na civaciva ni tabaqu, Ka me ramusu na ligaqu mai na suina.

²³ Ni'u a domobula de vakarusai au na Kalou; Ia ni sa cecere cake ko koya ka'u a sega ni rawata e dua na ka.

²⁴ Kevaka ka'u a vakararavi ki na koula, Se'u kaya ki na koula talei, Ka'u sa vakadinati iko;

²⁵ Kevaka ka'u a reki ni'u sa vutuniyau sara, Ni sa rawata nai yau levu na ligaqu;

²⁶ Kevaka ka'u a raica na mata-ni-siga ni sa cila mai, Se na vula ni sa weweli lako;

²⁷ Ka sa dauveretaki lo na lomaqu, Se sa reguca na ligaqu na gusuqu:

²⁸ Oqo talega nai valavala ca me ra cudruva ko ira na mataveilewai: Ni'u a qai cakitaki koya na Kalou maicake.

²⁹ Kevaka ka'u a reki ni sa rusa ko koya sa cati au, Se vakalevulevui au ni sa kune ka ca ko koya:

³⁰ Ia ka'u a sega ni laiva na gusuqu me vosa cala, Ni'u a vatonaka na yalona.

³¹ Kevaka era sa sega ni kaya ko ira e na nona vale, Ko cei sa kunea e dua e sega ni vakamamautaki e na nona kakana?

³² Sa sega ni moce e na gaunisala na vulagi: Au a dolava na noqu vale vua sa taubale e vanua.

³³ Kevaka ka'u sa vunia na noqu talaidredre me vakataki Atama, Ni'u sa vunia na noqu i valavala ca e lomaserequ:

³⁴ Ni'u sa rerevaki ira na lewe vuqa, Se sa vakadomobulataki au na nodra be na veimataqali, Me'u tiko lo kina, ka sega ni curu yani ki tautuba?

³⁵ Me dua mada me rogoci au! Raica, oqo na ka ka'u domona, me vosa mada mai vei au ko Koya sa Kaukauwa. Me sa vola talega e dua nai vola na noqu meca.

³⁶ E dina ka'u na qai colata e na noqu i colacola, Ka vauca vei au me noqu i sala vakaturaga.

³⁷ Ka'u na qai tukuna vua nai wiliwili ni cavucavu ni yavaqu; Ka'u na qai toro voleka vua me vaka na turaga.

³⁸ Kevaka sa beitaki au na noqu were, Se tagi vata kei na kena dreke;

³⁹ Kevaka ka'u sa kania na vuana ni sa sega ni voli, Se vakavuna na nodra mate na kenai taukei;

⁴⁰ Me qai tubu na kau votovotoa mei sosomi ni witi, Kei na borosou mei sosomi ni parile. Sa oti na vosa i Jope.