Jope 30 - Vakavakadewa Makawa

Sa vaka ko Jope ni sa vuki na nona vakarokorokotaki me vakalialiai, 1-15; kei na nona tiko vakasautu me tiko vakaca, 16-31.

¹ Ia edaidai era sa vakalialiai au ko ira era gone vei au, Ko ira ka'u a sega ni nanuma na tamadra me yaga ni wili vata kei na koli ni noqu qele ni sipi.

² Ia ka cava na kena yaga vei au na kaukauwa ni ligadra, Ko ira sa qase malumalumu?

³ E na vuku ni viakana kei na dausiga era sa sui votu; Era dro ki na lekutu loaloa sa lala ka dravuisiga

⁴ Era tava na co gaga mai veikau, Kei na waka ni junipa me kedra.

⁵ Era vakasavi tani maivei ira na tamata, Era kailataki ira me vaka era daubutako;

⁶ Me ra tiko e na kikilo rerevaki, E na qara kei vuravura, kei na veivatu.

⁷ Era a tagi e loma ni veikau lalai; Era soqoni vata e ruku ni kau karokaroa.

⁸ Era luve ni lialia, io, era luve ni kaisi botoboto: Era vakasavi tani mai na vanua.

⁹ Ia era sa qai serekalitaki au, Io, era sa cavuti au me'u ka lialia.

¹⁰ Era vakasisilataki au; era dro vakayawa vei au, Ka ra sa sega ni rere ni kasivita na mataqu.

¹¹ Ni sa sereka na nona dali ko koya, ka vakararawataki au, Era sa biuta talega nai tarovi e mataqu.

¹² Era sa tu cake na cauravou e na ligaqu i matau; Era biliraka na yavaqu, Ka caramaka na nodra sala dauveivakarusai me'u ca.

¹³ Era vakacacana na noqu sala, Era vinakata na noqu rarawa, Ka sa sega e dua sa vukei ira.

¹⁴ Era sa yaco mai me vaka ni sa bote nai bono: Ni sa ia na veivakarusai era sa luvuci au mai.

¹⁵ Sa lesu mai vei au na ka rerevaki; Sa ra vakasava na yaloqu me vaka na cagi: A sa seavu na noqu tiko vinaka me vaka na o.

¹⁶ Ia sa qai sova yani na yaloqu e lomaqu; Sa kani au na veisiga rarawa.

¹⁷ Sa laucoka na suiqu e na yagoqu e na bogi: A sa sega ni vakacegu rawa na noqu ua.

¹⁸ E na vuku ni kaukauwa ni noqu mate sa duatani mai na noqu i sulu: Sa vauci au me vaka na bele ni noqu i sulu.

¹⁹ Sa biuti au ko koya ki na lolobo, Ia ka'u sa qai vaka na kuvu-ni-soso kei na dravusa.

²⁰ Au sa tagi vei kemuni, ia ko ni sa sega ni rogoci au: Au sa tu cake, ia ko ni sa sega ni via kilai au.

²¹ Kemuni sa vuki me yalovakatani vei au: Ko ni sa vorati au e na ligamuni kaukauwa.

²² Kemuni sa laveti au ki cake ki na cagi; ko ni sa vakavodoki au kina; Ko ni sa vakawaicalataki au kina.

²³ Ni'u sa kila ko ni na vakayacori au ki na mate, Ki na vale sa lesi me nodra kecega era bula tiko.

²⁴ Ia ena sega ni dodoka ko koya na ligana ki nai bulubulu, Ia ka ra sa tagi ga ni sa ia na veivakarusai.

²⁵ Au a tagi, se segai, e na vuku i koya ka rarawa? A sa bibi na yaloqu, se segai, e na vukudra na dravudravua?

²⁶ Ni'u a yadrava tiko na ka vinaka, sa qai yaco na ka ca: Ia ni'u a waraka na rarama, sa qai yaco na butobuto.

²⁷ Sa rise na ketequ, ka sega ni vakacegu: Sa yacovi au na veisiga rarawa.

²⁸ Au sa tagi voli ga, ka sa sega ni cilavi au na siga: Au sa tu cake e nai soqosoqo ka'u sa tagica na veivuke.

²⁹ Au sa tacidra na jakoli, Kei na nodra i tokani na ositereji.

³⁰ Sa loaloa na kuli ni yagoqu, A sa kama na suiqu e na katakata.

³¹ Sa vuki talega na noqu api me ka ni tagiyaso, Kei na noqu kove me domo ni dautagi.