Jope 3 - Vakavakadewa Makawa

Sa vosavakacacataka na siga sa sucu kina ko Jope, 1-10. Sa kaya ga ni ka vinaka na mate ka ca na bula rarawa, 11-26.

¹ Sa oti oqo, sa qai vosavakacacataka na nona siga ko Jope.

² A sa kaya ko Jope,

³ Me yali na siga ka'u a sucu kina, Kei na bogi sa tukuni kina, Sa sucu e dua na gonetagane.

⁴ Me butobuto na siga ko ya; Me kakua ni nanuma kina maicake na Kalou, Me kakua talega ni cilava na rarama:

⁵ Me sa nodrau ga na butobuto kei na yaloyalo ni mate; Me ubia tikoga na o; Me ka rerevaki sara ga na kena butobuto.

⁶ Ia na bogi oqori, me taura ga na butobuto loaloa; Me kakua ni reki vata kei na veisiga ni yabaki; Me kakua ni wili vata kei na veivula.

⁷ Raica, me tu duadua na bogi oqori, Me kakua ni rogo kina na domo ni reki.

⁸ Me ra vosavakacacataka ko ira era sa dauvosavakacacataka na siga eso, Ko ira era vakarau tu me yavalata na livaiacani.

⁹ Me vakabutobutotaki na kalokalo e na kena yakavi; Me waraka na rarama, ia me sega ga; Me kakua talega ni kunea na mataka caca,

¹⁰ Ni sa sega ni sogota na kete i tinaqu, Ka sega ni vunia na rarawa mai na mataqu.

¹¹ A cava ka'u a sega kina ni mate ni'u sa qai sucu mai? A cava ka'u a sega kina ni ciba ni'u ni'u sa lako mai na kete?

¹² A cava sa tabei au kina na duruna? Kei na mata-ni-sucu me'u sucuma?

¹³ Kevaka e segai, au a qai koto vakadua edaidai ka sega ni oca, Ka'u a qai moce ga: keitou a qai cegu vata,

¹⁴ Kei ira na tui kei ira na daubose kei vuravura, Ko ira era sa cakava me nodra na yasana sa sega ni tawa;

¹⁵ Se kei ira na turaga era sa vakoula, A ra sa vakasinaita na nodra vale e na siliva;

¹⁶ Se me'u tautauvata kei na lutudole me'u sa segai ga; Me vaka na gone lalai era sa sega ni kunea na rarama.

¹⁷ Sa mudu maikea na nodra veivakararawataki na tamata ca; A ra sa vakacegu maikea ko ira era sa oca.

¹⁸ Era sa vakacegu vata maikea ko ira na bobula; Era sa sega ni rogoca na vosa ni dauveivakasaurarataki.

¹⁹ Era sa tiko maikea na lalai kei na lelevu; A sa sereki na tamata maivua na nona turaga.

²⁰ A cava sa soli kina na rarama vei koya sa rarawa, Kei na bula vei koya sa gaga na yalona;

²¹ Ko ira era sa gadreva me ra mate, ka sa sega ga; A ra sa gu vakalevu kina ka vakalailai ki nai yau sa vuni tu;

²² Era sa marau vakalevu, Ka reki, ni ra sa kunea nai bulubulu?

²³ A cava sa soli kina na rarama vua na tamata sa vuni tu na nona sala, Ko koya sa vakalatia na Kalou?

²⁴ Ni sa liu mai na noqu vutugu a sa muri na noqu kana, Ka sa sova yani na noqu vakatutukua me vaka na vadugu ni wai.

²⁵ Ni sa yacovi au na ka ka'u a domobula kina, Kei na ka ka'u a rerevaka sa qai yaco mai vei au.

²⁶ Au a sega ni tiko vinaka, se tiko wele, se tiko vakacegu; Ka sa yaco ga mai na ka rarawa.