Jope 29 - Vakavakadewa Makawa

Sa vakananuma ko Jope na nona tiko vakacegu, kei na nona dokai eliu.

¹ A sa vosataka tiko na nona vosa vakaibalebale ko Jope, ka kaya;

² Isa! ke sa vaka mada e na veivula eliu na noqu tiko oqo, Me vaka e na gauna sa vakatawai au kina na Kalou;

³ Ni sa cilava na uluqu na nona cina, Ni'u a lako e loma ni butobuto e na nona rarama;

⁴ Me'u vaka e na gauna ka vue kina na noqu i totoka, Ni sa tiko e na noqu vale na vosa vuni ni Kalou;

⁵ Ni sa tiko vata ga kei au ko Koya sa Kaukauwa, Ka ratou sa voliti au na luvequ;

⁶ Ni'u a vuya na noqu i lakolako e na uro ni wai-ni-sucu, Ia na vatu sa sova maivei au na uciwai waiwai!

⁷ Ni'u a lako yani e loma ni koro ki na matamata-ni-koro, Ni'u a vakarautaka na noqu i tikotiko e na rara ni koro:

⁸ Era sa raici au na cauravou, ka vunitaki ira: Ka ra sa tu cake na qase, ka wavu tu.

⁹ Era sa galu mada na turaga, Era tabonaka na gusudra e na ligadra.

¹⁰ Sa ra tiko lo na turaga, A sa kabita na loma ni gusudra e cake na yamedra.

¹¹ Ni sa rogoci au na daliga, sa qai vosavakalougatataki au; Ia ni sa raici au na mata, sa qai tukuni au:

¹² Ni'u a vakabula na dravudravua ni ra sa tagi, Kei na luveniyali talega, kei koya sa sega e dua me vukei koya.

¹³ Sa vosavakalougatataki au ko koya sa voleka ni rusa: Ia ka'u a vakamarautaka na yalona na yada.

¹⁴ Au a vakasuluma na yalododonu, ka sa noqu i sulu voli: Ia na noqu lewa dodonu sa vaka nai sulu levu, kei nai sala vakaturaga.

¹⁵ Au sa matadra na mataboko, Ka yavadra na lokiloki.

¹⁶ Au sa tamadra na dravudravua; Ia na ka e veiletitaki ka'u a sega ni kila, ka'u a vakataroga.

¹⁷ Ka'u a vorolaka na galegaledra na tawa dodonu, Ka kaliraka mai na batidra na ka era kauta tani vakaukauwa.

¹⁸ Au a qai kaya, Au na mate e na noqu vale, Ia ka'u na vakavuqataka na noqu siga me tautauvata kei na nuku.

¹⁹ Sa teteva na wai na wakaqu, Ka sa tiko na tegu e na tabaqu e na bogi taucoko.

²⁰ Sa vakavoui tikoga na noqu i ukuuku, Ka sa vakaukauwataki tu e ligaqu na noqu dakai.

²¹ Sa ra vakarorogo vei au ko ira na tamata, ka wawa tiko, Ka tiko lo ni'u a ia na veivakatavulici.

²² Ni'u a vosa oti era sega ni vosa tale; Ka sa tauci ira na noqu vosa.

²³ Era sa waraki au me vaka era waraka na uca; Ka ra sa dalaga sara me vaka ki na uca sa tau emuri.

²⁴ Ni'u a dredre vei ira, era sa sega ni vakadinata; A sa sega na ka era kitaka me'u vakaveveku mata kina.

²⁵ Au a digitaka na nodra sala, ka tiko me'u turaga, Ka tiko me vaka na tui kei ira na mataivalu, Me vaka e dua sa vakacegui ira era tagi.