Jope 28 - Vakavakadewa Makawa

Sa tukuna ko Jope na vuku e na ka vakavuravura eso, 1-11. Ia na vuku dina, sa solia ga na Kalou, ka sa ka vinaka duaduaga, 12-28.

¹ E dina sa dua nai keli ni siliva, Kei na yasana sa vakasavasavataki kina na koula.

² Sa kau mai na qele na aironi, A sa vakawaicalataki na kopa mai na vatu.

³ Sa vakaotia na butobuto na tamata, Ka sa vakasaqaqara na ka kece sara ga: Io na vatu ni butobuto, kei na yaloyalo ni mate.

⁴ A wai sa vure mai vua sa tiko kina; Sa guilecava na yavadra sa lako tu: Sa mamaca mai, sa lako tani vei ira na tamata.

⁵ Ia sa tubu mai na qele na kakana: A sa cukiti e rukuna me vaka e na bukawaqa.

⁶ A kena veivatu na yasana ni safaia, Ka sa tu kina na kuvu ni koula.

⁷ Sa dua na sala sa sega ni kila e dua na manumanu vuka, Ka sa sega ni kunea na mata ni vulituri:

⁸ Sa sega ni butuka na luve ni laioni, A sa sega ni lako voli kina na laioni daukata.

⁹ Sa dodoka na ligana ko koya ki na uluvatu; A sa vukica na veiulu-ni-vanua mai vuna.

¹⁰ Sa kelia na dreke ni wai e na maliwa ni veivatu; Ka sa kunea na ka talei kecega na matana.

¹¹ Sa bonota na uciwai ko koya, me kakua ni vuabale; Ka sa kauta mai ki na rarama na ka sa vuni.

¹² Ia sa kune maivei na vuku? Ka sa evei na yasana ni yalomatua?

¹³ Na tamata, sa sega ni kila na kenai voli; Ka sa sega ni kune e na vanua ni bula.

¹⁴ Sa kaya na vanua titobu, Sa sega vei au: Ka sa kaya na wasawasa, Sa sega vei au.

¹⁵ Ena sega ni voli rawa e na koula talei; Ia na siliva, ena sega ni vakarautaki me kenai voli.

¹⁶ Ena sega ni vakatauvatani na kenai voli kei na koula mai Ofa, Se na onikisa talei, se na safaia.

¹⁷ Na koula kei na karisitala sa sega ni tautauvata kaya: Ia ena sega ni voli rawa e nai yaya koula dina.

¹⁸ Ena sega ni cavuti na lase damudamu, se na mata-ni-civa: Ni sai yau talei na vuku, ka sai yau lailai na rupi.

¹⁹ A topasa ni Iciopea sa sega ni tautauvata kaya; Ena sega talega ni vakatauvatani kei na koula dina.

²⁰ Sa na qai vu maivei na vuku? Ia sa evei na vanua me kune kina na yalomatua?

²¹ Ni sa vuni mai na matadra kecega era bula tiko, Ka sa tabonaki vei ira na manumanu vuka.

²² Ko Rusa kei Mate, erau sa kaya, Keirau sa rogoca na kenai rogorogo e na daliga i keirau.

²³ Na Kalou ga sa kila na kenai lakolako, Ka sa kila ko koya na kena yasana.

²⁴ Ni sa rai yani ko koya ki nai yalayala kei vuravura, Ka sa kunea na veiyasana kecega e ruku i lomalagi;

²⁵ Me lewa na kena kaukauwa ni cagi; Ka sa vakatovolea na wai e na dua nai vakarau.

²⁶ Ni sa lesia na kenai valavala ni uca ko koya, Kei na sala ni livaliva ni kurukuru:

²⁷ Sa qai kunea na ka oqori ko koya, ka tukuna; Sa vakarautaka, ka vakadikeva talega.

²⁸ Ka sa kaya vua na tamata, Raica, na rerevaka na Turaga, sai koya na vuku; Kei na biuta na ka ca, sai koya na yalomatua.