Jope 27 - Vakavakadewa Makawa

Sa vaka ko Jope ni sa yalodina ko koya, 1-7. Sa na ca ga ko koya na dauveivakaisini, 8-10. Ena vuki na nona ka vinaka na tamata ca me ca kina ko koya, 11-23.

¹ A sa cavuta tiko na nona vosa vakaibalebale ko Jope, ka kaya,

² Me vaka sa bula dina na Kalou, ko koya sa sega ni vialewa vei au; Ia ko Koya sa Kaukauwa, sa vakararawataka na yaloqu;

³ Ni sa tiko e lomaqu na noqu cegu, Kei na cegu ni Kalou e na qara-ni-ucuqu;

⁴ Ena sega dina ni vosataka na ka ca na tebenigusuqu, Se cavuta na veivakaisini na yamequ.

⁵ Me yawa sara vei au me'u vakadonui kemudou: Au na sega ni biuta tani vei au na noqu yalododonu, ka yacova na siga ka'u na mate kina.

⁶ A noqu yalododonu ka'u sa taura matua, ka'u na sega ni biuta: Ena sega ni beitaki au na lomaqu e na veisiga kece ni noqu bula.

⁷ Me tautauvata na noqu meca kei na tamata ca, Kei koya talega sa vorati au me vakataki ira na tawa dodonu.

⁸ Ia ka cava na ka me vakararavi kina ko koya na dauveivakaisini, kevaka sa vutuniyau mai Ni sa kauta tani na yalona na Kalou;

⁹ Ena rogoca beka na Kalou na nona tagi Ni sa qai yacovi koya na ka rarawa?

¹⁰ Ena marautaki Koya beka sa Kaukauwa? Ena masu tikoga vua na Kalou?

¹¹ Au na vakavulici kemudou e na vuku ni liga ni Kalou: Au na sega ni vunia na ka sa tu vei Koya sa Kaukauwa.

¹² Raica, koi kemudou kecega dou sa kunea oti; A cava dou sa qai vialialia sara ga kina?

¹³ Oqo na nonai votavota na tamata ca mai vua na Kalou, Kei na ka era na taukena ko ira nai valavala vakaukauwa maivei koya sa Kaukauwa.

¹⁴ Kevaka eratou sa vakalewevuqataki mai na luvena, eratou na mate e nai seleiwau: Era na sega talega ni mamau e na madrai ko ira na nona kawa.

¹⁵ Ko ira era vo tiko vua era na buluti e na mate: Ena sega talega ni tagicaki ira na nodra yada.

¹⁶ Kevaka sa binia vata na siliva me vaka na kuvu-ni-soso, Ka vakarautaka nai sulu me vaka na qele;

¹⁷ Ena vakarautaka ga ko koya, ia ena vakaisulu kina na yalododonu, Era na vota talega na siliva ko ira sa sega ni cala

¹⁸ Sa tara na nona vale me vaka na nuve, Ka vaka nai cili sa cakava nai vakatawa.

¹⁹ Sa koto sobu na tamata vutuniyau, ia ena sega ni vakasoqoni: Sa yadra na matana, a sa yali ko koya.

²⁰ Sa vauci koya na domobula me vaka na waluvu; Sa butakoci koya tani e na bogi na cava.

²¹ Sa kauti koya tani na tokalau, a sa lako tani sara ko koya; Ka sa cagina tani vakaukauwa mai na nona yasana.

²² Ena biliraki koya, ka sega ni cegu: Sa na via dro tani ko koya mai na ligana.

²³ Ena vakasausau vua ko ira na tamata, Ka vakasiusiutaki koya tani mai na nona yasana.