Jope 26 - Vakavakadewa Makawa

Sa vunauci Pilitati ko Jope, 1-4, a sa tukuna na nona cakacaka rerevaki na Kalou, 5-14.

¹ Sa qai vosa ko Jope, ka kaya,

² Ko sa vukei koya vakacava sa sega ni kaukauwa? Ko sa vakabula vakacava na liga i koya sa malumalumu?

³ Ko sa vakavulici koya vakacava sa sega vua na vuku? Ka tukuna sara vakacava na ka e dodonu?

⁴ Ko sa cavuta vei cei na vosa? Ia na yalo i cei sa lako maivei iko?

⁵ Ko ira na mate era sautaninini, E ruku ni wai, kei ira era tiko kina.

⁶ Sa sega ni tabogo e matana ko Etesi, A sa sega ni ubi ko Rusa.

⁷ Sa tevuka yani na tokalau mai na vanua lala, Ka sa vakarubeci vuravura e na ka sa sega ga.

⁸ Sa vauca na wai e nona o vavaku; A sa sega ni kadresu na o e rukuna.

⁹ Sa vakatatabuya na mata ni nonai tikotiko, Ka sa tabonaka e na nona o.

¹⁰ Sa volita na wai e na kenai yalayala, Ka me oti mada na siga kei na bogi.

¹¹ Sa sautaninini na duru kei lomalagi, A sa kidacala ni sa vunauca ko koya.

¹² Sa wasea na wasawasa e nona kaukauwa, A sa laubasikataki koya na viavialevu e na nona vuku.

¹³ Sa vakaiukuukutaka na lomalagi e na yalona; Sa bulia na gata takelo na ligana.

¹⁴ Raica, oqori ga na nonai valavala vakatikina eso: Ia na vakasolokakana walega eda sa rogoca kina: Ia na kurukuru ni nona kaukauwa, ko cei me na kila rawa?