Jope 23 - Vakavakadewa Makawa

Sa via lako ko Jope ki na mata ni Kalou ni sa vakararavi vua, 1-9. Sa vaka ni sa kila na Kalou na nonai valavala ni sa dodonu, 10-12. Sa rerevaka tale na lewa ni Kalou, 13-17.

¹ A sa vosa ko Jope, ka kaya,

² E na siga edaidai oqo sa gaga na noqu tagi; Sa ka bibi na ligamuni sa tauci au ka mamada na noqu vutugu.

³ Me'u kila mada na vanua me'u kunei koya kina! Me'u torova sara na nonai tikotiko!

⁴ Ka'u na qai vakadodonutaka na noqu ka vua, Ka vakasinaita na gusuqu e na noqu i vakamacala:

⁵ Ka'u na qai kila na vosa ena kaya mai vei au, Ka vakasamataka na ka ena kaya vei au.

⁶ Ena veivorati kei au ko koya e nona kaukauwa levu? E segai; ena golevi au ga ko koya.

⁷ Ena veilewai rawa kaya maikea ko koya sa yalododonu: Ia ka'u na qai vakabulai sara mai vua sa lewai au.

⁸ Raica, ka'u sa lako ki liu, ka sa sega kina ko koya; Kimuri, ia ka'u sa sega ni kunea:

⁹ Ki na liga i mawi, na yasana sa cakacaka kina ko koya, ia ka'u sa sega ni kunea: Sa vunitaki koya e na liga i matau, au sa sega ni raici koya rawa kina.

¹⁰ Ia sa kila ko koya na sala ka'u sa muria: Ni sa vakatovolei au oti ko koya, ka'u na qai lako mai me vaka na koula.

¹¹ Sa muria dina na nonai lakolako na yavaqu; A nona sala ka'u sa vakabauta, ka sega ni lako tani maikina.

¹² Au sa sega talega ni biuta na vunau ni tebenigusuna; A vosa ni gusuna ka'u sa vinakata, ka cata na qau kakana.

¹³ Ia sa dua bau ga na lomana, ko cei me vagolea tani? Na ka sa vinakata na yalona, sa kitaka ga.

¹⁴ Ni sa ia ko koya na ka sa lesia vei au; Ka sa vuqa na ka vakaoqo sa tiko vua.

¹⁵ O koya oqo ka'u sa kidroa kina e matana: Ni'u sa vakanananu, ka'u sa rerevaki koya.

¹⁶ Ni sa vakamalumalumutaka na yaloqu na Kalou, Ka sa vakararawataki au ko Koya sa Kaukauwa:

¹⁷ Ni'u a sega ni muduki tani ni sa bera ni yaco na butobuto; Ka sa sega ni tabonaka ko koya na butobuto mai na mataqu.