Jope 22 - Vakavakadewa Makawa

Sa tukuna ko Elifasi ni sa sega ni yaga vua na Kalou na nona yalododonu na tamata, 1-4. Sa beitaki Jope e nai valavala ca, 5-11. Sa tukuna nai valavala vakaturaga ni Kalou, 12-20. Sa vunautaka na veivutuni, kei na kena yaga, 21-30.

¹ Sa qai vosa ko Elifasi na kai Temani, ka kaya,

² Me dua beka na tamata me yaga vua na Kalou, Me vaka sa yaga vua vakai koya na tamata vuku?

³ Sa marautaka na nomu yalododonu ko Koya sa kaukauwa? Se sa vakaiyau kina ko koya, ni ko sa vakadodonutaka na nomu sala?

⁴ Ena vunauci iko ni sa rerevaki iko? Ena ia na veilewai kei iko?

⁵ E sega beka ni ka levu na nomu ca? Ka sega ni wiliki rawa na nomu i valavala ca?

⁶ Ni ko sa taura walega nai vakadinadina maivua na wekamu, Ka luvata tani na nodra i sulu era luvawale.

⁷ Ko sa sega ni solia na wai ni gunu vei ira era sa oca, Ko sa bureitaka talega na kakana vei ira era viakana.

⁸ Ia ko koya na ligamatua, sa taukena na vanua, Ka sa tiko kina ko koya sa daudokai.

⁹ Ia ko sa vakatalai ira wale na yada, ka ra sa lala tu, A sa musuki na ligadra na luveniyali.

¹⁰ O koya oqo sa voliti iko kina nai cori, Ka sa vakidroataki iko na rere e veivakidacalataki;

¹¹ Se na butobuto, mo kakua ni rai rawa; Ka sa luvuci iko na wai levu.

¹² Sa sega beka ni tiko na Kalou mai na lomalagi cecere? Ia mo raica na kedra cecere na kalokalo, ni sa cecere vakaidina!

¹³ Ia ko sa kaya, Sa kila vakaevei na Kalou? E rawa beka vua me lewa mai na loma ni butobuto loaloa?

¹⁴ Sa tabonaki koya na o loaloa, ka sa sega ni rai rawa kina; Ka sa lako voli tu e na dela ni drodrolagi.

¹⁵ Ko sa muria beka na sala makawa, Era sa daulako kina na tamata ca?

¹⁶ Ko ira ka muduki dole na nodra bula, Ka sa luvu sara na nodra yavu:

¹⁷ Ko ira ka kaya vua na Kalou, Mo lako tani vei keitou: Se cava beka me na kitaka vei keitou ko Koya sa Kaukauwa?

¹⁸ Ia sa vakasinaita na nodra veivale e na ka vinaka! A sa yawa vei au na nodra lewa na tamata ca!

¹⁹ Era sa kunea ko ira na yalododonu, ka reki kina: Ka sa dredrevaki ira ko koya sa sega ni cala.

²⁰ A sa sega ni muduki na neitou ka, ia na ka sa vo tu vei ira sa vakamai e na bukawaqa.

²¹ Mo kilai koya mada ga, mo drau veivinakati: Ena yaco kina vei iko na vinaka.

²² Mo vakabauta mada na vunau ni gusuna, Ka binia na nona vosa ki lomamu.

²³ Kevaka ko sa lesu mai vei Koya sa Kaukauwa, ko na tara cake; Ko na vakayawataka nai valavala ca mai na nomu vale.

²⁴ Ko na qai vakotora na koula ki na soso; Kei na koula ni Ofa ki na veivatu ni wai drodro:

²⁵ Io, ena qai yaco me nomu bai ni valu ko Koya sa Kaukauwa. Ka me nomu siliva talei talega.

²⁶ Ni ko na qai rekitaki Koya sa Kaukauwa, Ka ta cake vua na Kalou.

²⁷ Ko na qai masu vua, ia ena rogoci iko ko koya, Ko na vakayacora talega na ka ko sa yalataka vua.

²⁸ Ko na lesia na ka, ia ena vakataudeitaki vei iko: Ena cilava talega na nomu sala na rarama.

²⁹ Ni sa ia na veivakabalei, ko na kaya, Sa na ia na vakacecere cake: Ka na vakabula na yalomalumalumu ko koya.

³⁰ O koya ena vakabulai koya sa cala: Ia ena vakabulai ko koya ni sa savasava na ligamu.