Jope 21 - Vakavakadewa Makawa

Sa tukuna ko Jope ni sa sega ni ka wale na nona rarawa, 1-6. Sa sautu e na siga eso ko ira era beca na Kalou, 7-15; ia ka sa daukilai talega na nodra rusa, 16-21. Sa tukuna na lewa ni Kalou ni sa vuqa na kenai valavala, 22-26. Era na lewai emuri nai valavala ca, 27-34.

¹ A sa vosa ko Jope, ka kaya,

² Dou vakarorogo vakavinaka ki na noqu vosa, Ia me sa nomudou veivakacegui na ka ga oqo.

³ Dou vosoti au mada me'u vosa: Ia ni'u sa vosa oti, dou qai ia tiko na veivakalialiai.

⁴ Koi au beka, au sa ia na tagi vua na tamata? Ia ke sa vakakina a cava me sa sega kina ni rarawa na yaloqu?

⁵ Dou raici au mada, ka mo dou kurabui, Ka tabonaka na gusumudou.

⁶ Ni'u sa vakananuma tiko ka'u sa kidroa, Ka sa sautaninini na lewequ.

⁷ A cava era sa bula tiko kina nai valavala ca, Ka yaco me ra qase, io, ka ra vutuniyau mai?

⁸ Era sa vakataudeitaki vata kei na nodra kawa e matadra, Kei na luvedra talega e matadra:

⁹ Sa sega na rere mai na nodra veivale, Ka sa sega ni tau vei ira na kuita ni Kalou.

¹⁰ Sa rika na nodra pulumokau tagane, a sa yaco ga; Sa vakasucu na nodra pulumokau yalewa, a sa sega ni lutudole na luvena.

¹¹ Era sa vakatubura na nodra lalai me vaka na qele ni sipi, Ka ra meke voli na luvedra.

¹² Era sa taura na tibereli kei na api, Ka rekitaka na domo ni kove.

¹³ Era vakaotia na nodra siga e na marau, Ka lako sobu vakasauri ki nai bulubulu.

¹⁴ Ia era a kaya vua na Kalou, Lako tani vei keitou; Ni keitou sa sega ni via kila na nomu sala.

¹⁵ Ko cei ko Koya sa Kaukauwa, me keitou qaravi koya? A cava talega na betena vei keitou, kevaka keitou masu vua?

¹⁶ Raica, era sa sega ni veitaliataka na nodra ka vinaka: Me yawa vei au na nodra lewa nai valavala ca!

¹⁷ Sa bokoci vakavica na nodra cina nai valavala ca! Ka sa yacovi ira vakavica na veivakarusai! Sa vota na rarawa vei ira e nona cudru.

¹⁸ Era sa vaka na vu-ni-sila e na mata ni cagi, Ka vaka na qa-ni-sila sa kauta tani na cava.

¹⁹ Sa maroroya na Kalou na nonai valavala ca me kedra na luvena: Sa sauma vua ko koya, ena kunea talega ko koya.

²⁰ Sa na kunea na matana na nona rusa, Ia ena gunuva ko koya na cudru i Koya sa Kaukauwa.

²¹ Ni na vinakata vakaevei ko koya na nona mataqali sa taravi koya, Ni sa mudu koso na nona bula?

²² Sa dua beka me vakavulici koya na Kalou me vuku? Ia sa daulewai ira era sa cecere.

²³ Sa mate e dua ni sa yago kaukauwa sara, Ni sa tiko vinaka sara ka vakacegu.

²⁴ A sucuna sa to sara e na wai-ni-sucu, Ka sa suasua na uto-ni-suina.

²⁵ A sa mate e dua tani ni sa rarawa na yalona, Ka sa sega ni kana e na vakacegu.

²⁶ Era na koto vata e na kuvu-ni-soso, Ka ubi ira na baca ni qele.

²⁷ Raica, ka'u sa kila na ka dou sa nanuma, Kei na nomudou vakalewai au vakaca.

²⁸ Ni dou sa kaya, Sa evei na nona vale na turaga? Sa evei na nodra i tikotiko nai valavala ca?

²⁹ Dou a sega beka ni tarogi ira era sa lako tu e na sala? Dou sa sega beka ni kila na nodra i vakatakilakila?

³⁰ Ni sa maroroi ki na siga ni rusa na tamata ca? Era na tuberi yani ki na siga ni cudru.

³¹ Ko cei me tukuna votu vua na nonai valavala? Ia ko cei me sauma vua na ka sa cakava ko koya?

³² Ena colati yani ki nai bulubulu ko koya, Ka ra na yadrava na nonai bulubulu.

³³ Ia na qele e na buca ena kamikamica vua, Ena muri koya na tamata kecega, Me vaka sa sega ni wili rawa ko ira era liutaki koya.

³⁴ Ia ka cava dou sa vakacegui au wale kina, Ni sa tiko na lasu e na nomudou vosa.