Jope 20 - Vakavakadewa Makawa

Sa tukuna ko Sofa na ka ena yaco vei ira nai valavala ca.

¹ Sa qai vosa ko Sofa na kai Neama, ka kaya,

² O koya oqo sa uqeti au kina na nanuma ni lomaqu me'u vosa, Ka'u sa kusarawa e na vuku ni ka oqo.

³ Au sa rogoca na vunau me'u madua kina: A sa uqeti au na yaloqu matua me'u sauma yani.

⁴ Ko sa sega beka ni kila makawa na ka oqo, Mai na gauna sa vakatikori kina na tamata e vuravura,

⁵ Ni sa ka lekaleka na nodra marau nai valavala ca, A sa oti rawarawa sara na reki ni dauveivakaisini?

⁶ Kevaka sa vue na nona totoka ki lomalagi, Ka sa yaco ki na o na uluna;

⁷ Ena yali laivi sara ga me vaka na nona benu: Ko ira era sa raica era na kaya, Evei ko koya?

⁸ Ena vuka tani yani ko koya me vaka na tadra, ka na sega ni kune tale: Ia ena vakasevi tani me vaka na raivotu e na bogi.

⁹ A mata i koya talega ka kunea ena sega ni kunea tale; Ena sega ni raici koya tale na nona yasana.

¹⁰ A luvena era na via vakayalovinakataki ira na dravudravua, Ena vakasuka talega na ligana na nodra i yau.

¹¹ A suina sa sinai tu e nonai valavala ca ni sa cauravou, Ena koto sobu kaya e na kuvu-ni-soso.

¹² Kevaka sa kamikamica e na gusuna nai valavala ca; Ka sa vunia e ruku ni yamena;

¹³ Ka sa domica, ka sega ni via tiloma; Ka sa mama tikoga e na gusuna:

¹⁴ Ena dua tani mai na kena kakana e ketena, Ka sa mi ni gata mai e lomana.

¹⁵ Sa tiloma oti nai yau, ia ena luaraka tale: Ena biuta tani mai na ketena ko koya na Kalou.

¹⁶ Ena sucuma na wai gaga ni gata; Ena vakamatei koya na yame ni gata loa.

¹⁷ Ena sega ni raica na uciwai, Na soniwai, nai davedave oni kei na uro ni wai-ni-sucu.

¹⁸ A ka sa oca kina ena vakasuka tale, ka na sega ni tiloma: Me vaka nai yau sa rawata ko koya ena solia vaka talega kina, ka na sega ni rekitaka.

¹⁹ Ni sa vakasaurarataka ka biuta na dravudravua; A sa kovea na vale sa sega ni tara ko koya;

²⁰ Ena sega dina ni vakacegu na ketena; Ena sega ni maroroya ko koya na ka sa domona.

²¹ E sega na ka e vo me sega ni kania ko koya; O koya oqo ena sega kina na nonai yau me vo tu.

²² Ni sa vutuniyau sara tiko ena dravudravua mai: Ena tarai koya na ligadra kecega nai valavala ca.

²³ Ni sa la'ki vakamamautaka na ketena, Ena vakatauca vua na Kalou na nona cudru katakata, Ena vakatauca vua ni sa kana tiko.

²⁴ Ena dro tani mai nai yaragi aironi, Ia na gasau ni dakai parasa ena laubasikataki koya.

²⁵ Sa ucuni mai, sa laubasikataka na yagona; Io, na matana makamakalivata ena laubasikataka na mina: Sa kani koya na domobula.

²⁶ A butobuto kecega ena vuni tu e nona yasana vuni: A bukawaqa sa sega ni irivi ena kati koya; Ena ca ko koya sa vo tiko e nona vale.

²⁷ Ena tukuna na nonai valavala ca ko lomalagi: Ena veimecaki kaya talega ko vuravura.

²⁸ Ena lako tani nai yau sa tubu e nona vale, Ena dave yani e na siga ni nona cudru.

²⁹ Oqo nai votavota ni tamata i valavala ca mai vua na Kalou, Kei na ka sa lesia na Kalou me nona.