Jope 2 - Vakavakadewa Makawa

Sa yacovi Jope e dua na mate ca, 1-8. Sa vosa vakatani vua ko koya na watina, a sa vunauca ko Jope, 9,10. Sa lako mai na wekana eratou lewe tolu me vakacegui koya, 11-13.

¹ Sa dua tale na siga era sa lako mai kina na luve ni Kalou me vakaraitaki ira e na mata i Jiova, ka sa lako talega mai kei ira ko Setani me vakaraitaki koya e na mata i Jiova.

² Ka sa kaya vei Setani ko Jiova, Ko sa lako maivei? A sa vosa vei Jiova ko Setani, ka kaya, Au sa veilakoyaki tu e vuravura, ka gade voli kina.

³ Ka sa kaya vei Setani ko Jiova, Ko sa vakanananu beka ki na noqu tamata ko Jope, ni sa sega e dua e tautauvata kaya e vuravura, a tamata yalododonu ka daucaka dodonu, a sa rerevaka na Kalou, ka sega ni torova na ca? ia ko a mai vakauqeti au me'u vakarusai koya walega, ia sa taura matua tikoga ko koya na nona yalododonu.

⁴ Ka sa vosa vei Jiova ko Setani, ka kaya, nai sau ni kulina na kulina, ia na nona ka kecega ena solia na tamata me bula kina.

⁵ Ia mo ni dodoka mada na ligamuni, ka tara na suina kei na lewena, ena qai vosavakacacataki kemuni ki matamuni.

⁶ A sa kaya vei Setani ko Jiova, Raica, sa qai soli ki ligamu ko koya; ia mo kakua ni vakamatei koya.

⁷ Sa qai lako tani ko Setani mai na mata i Jiova, ka yaviti Jope e na vidikoso, mai na qeteqete ni yavana ka cavaraka na buradelana.

⁸ A sa taura ko koya nai caca ni bilo me kari koya kina; ka sa la'ki tiko ki loma ni dravusa.

⁹ Sa qai kaya vua ko koya na watina, Ko sa taura matua tiko beka na nomu yalododonu? mo vosavakacacataka na Kalou, ka mo mate ga.

¹⁰ A sa kaya vua ko koya, Ko iko ko sa vosa me vaka e dua na yalewa lialia. E vakaevei li? me da rawata beka na ka vinaka vua na Kalou, me da kakua talega ni rawata na ka ca? E na ka kecega oqo sa sega ni cala ko Jope e na gusuna.

¹¹ Ia ko iratou na weka i Jope eratou lewe tolu, ni ratou sa rogoca na ka rarawa kecega oqo sa yaco vua, eratou sa qai dui lako yadua mai na nona yasana: ko Elifasi na kai Temani, kei Pilitati na luve i Sua, kei Sofa na kai Neama: ni ratou sa lokuca vata na siga me ratou lako mai kina me tagi vata kaya ka vakaceguya.

¹² Ia ni ratou sa ta cake ni ra sa yawa tiko, eratou sa sega ni kilai koya, a ratou sa tagi vakadomoilevu; ka ratou sa dui dresulaka na nonai sulu, ka kaburaka na kuvu-ni-soso ki na uludratou vaka ki lomalagi.

¹³ A ratou sa tiko sobu kaya e na qele me oti mada e vitu na siga ka vitu na bogi, a sa sega e dua sa vosa rawa vua: ni ratou sa kunea sa ka levu sara na nona rarawa.