Jope 19 - Vakavakadewa Makawa

Sa cavuta ko Jope na nodra sega ni loloma na wekana, 1-22. Sa tukuna na nona vakabauta nai Vakabula, 23-29.

¹ A sa vosa ko Jope, ka kaya,

² A cava na kena dede mo dou vakararawataka na yaloqu, Ka dabilaki au e na vosa?

³ Sa vakatini na nomudou vosavakacacataki au: Dou sa sega ni madua ni dou sa lomakaukauwa vei au.

⁴ Ia ke'u sa cala dina ga, Ke sa tiko ga vei au na noqu cala.

⁵ Kevaka e dina ni dou sa via vakalevulevui kemudou vei au, Ka via cavuta vei au na ka ka'u rogo ca kina:

⁶ Dou kila oqo ni sai koya na Kalou sa vakabalei au, Ka sa lawavaki au e nona lawa.

⁷ Raica, ka'u sa qoqolou e na vuku ni valavala kaukauwa, ia ka sega e rogo mai: Au sa kaci vakadomoilevu, ia sa sega ni yaco na lewa.

⁸ Sa sogolatia na noqu sala ko koya me'u dredre ni lako, Ka sa vakabutobutotaka na noqu i lakolako.

⁹ Sa luvata tani vei au na noqu i ukuuku, Ka sa kauta tani nai sala mai na uluqu.

¹⁰ Sa basuraki au sobu e na veitikina, ia ka'u sa yali: Ka sa cavuivuvutaka na ka ka'u sa vakararavi kina, me vaka na kau.

¹¹ Sa vakawaqa talega vei au na nona cudru, Ka sa nanumi au me'u vaka e dua vei ira na nona meca.

¹² Sa lako vata mai ko ira na nonai valu, ka ra caramaka na nodra sala me rawai au, Era sa vakavolivolita vakaivalu na noqu i tikotiko.

¹³ Sa vakaveiyawakitaki ira na wekaqu vei au, Ka ra sa qai lomavakatani vei au ko ira nai kai noqu.

¹⁴ Sa ra yali na wekaqu, Ka ra sa guilecavi au ko ira na noqu i tau.

¹⁵ Ko ira era tiko e noqu vale, kei ira na noqu vada, era sa nanumi au me'u vulagi: Au sa vaka na kai tani vei ira.

¹⁶ Au a kaciva na noqu tamata, a sa sega ni rogo mai; Ia ka'u a vakamasuta e na gusuqu.

¹⁷ Sa ka tani vua na watiqu na noqu i cegu, Ka ra sa vakasisilataki au ko ira na luve ni yagoqu.

¹⁸ Ia ko ira na lalai era beci au; Au a tu cake, ka ra sa vosacataki au.

¹⁹ Sa vakasisilataki au ko ira kece na tamata keitou a bose vata: Ia ko ira ka'u a lomana era sa vuki rubu vei au.

²⁰ A suiqu sa kabita na kuliqu kei na lewequ, Ia ka'u sa dro bula ga e na kuli ni batiqu.

²¹ Dou lomani au mai, dou lomani au mai, koi kemudou na wekaqu; Ni sa tarai au na liga ni Kalou.

²² A cava dou sa vakacacani au kina me vaka sa cakava na Kalou, Ka sa sega ni rauti kemudou na yagoqu?

²³ Me volai mada na noqu vosa! Me ceuti mada ki nai vola!

²⁴ Me ceuti e na peni aironi kei na uma Ki na vatu me tu ga ka tawa mudu!

²⁵ Ni'u sa kila sa bula tiko na noqu i Vakabula, Ena tu talega e vuravura e na siga maimuri:

²⁶ Ia ni sa rusa sara na kuliqu oqo, Ka'u na kunea ga na Kalou e na yagoqu:

²⁷ Ko koya ka'u na raica dina sara koi au, Ka kunea e na mataqu, ka sega ni dua tani; Ni sa vakarusai oti e lomaqu na noqu i ivi.

²⁸ Ia sa dodonu mo dou kaya, A cava keitou sa vakacacani koya kina? Ni sa kune vei au na vu ni ka dina.

²⁹ Dou rerevaka nai seleiwau, Ni sai sau ni cudru nai seleiwau, Mo dou kila ni sa na veilewaitaki.