Jope 17 - Vakavakadewa Makawa

Sa vakadodonutaka na nona vosa vua na Kalou, 1-5. Era na kurabui na tamata yalododonu e na vukuna, ia era na sega ni yalolailai kina, 6-10. Sa vakanananu ki na mate ko koya, 11-16.

¹ Sa takali na noqu i cegu; sa oti na noqu siga; Sa noqu ga nai bulubulu.

² Ko ira na veivakalialiai era sa tiko kei au? A mataqu sa tiko vata kei na nodra veivakararawataki, se segai?

³ Me dua mada na ka me daru veivakadinadinataki; Ko cei mada ko koya ena veitauri liga kei au?

⁴ Ni kemuni sa tabonaka na lomadra me ra kakua ni vuku; O koya oqo ko ni na sega kina ni vakalevulevui ira.

⁵ Ko koya sa vosaveicavilaki vei ira na wekana, Ena boko na matadratou na luvena.

⁶ Sa soli au talega ko koya me'u vosabecitaki vei ira na tamata; Ia ka'u sa ka vakasisila e matadra.

⁷ Ka sa buawa na mataqu e na vuku ni rarawa, Ka sa vaka na yaloyalo na tikiqu kecega.

⁸ Ena kurabui ko ira na yalododonu e na ka oqo, Ena yavala ko koya na tawa cala me vorati koya na dauveivakaisini.

⁹ Ia na yalododonu ena lako dei tiko e nona sala, Ko koya talega sa liga savasava ena kaukauwa cake tikoga.

¹⁰ Ia koi kemudou kecega, dou lesu mada mai: Ni'u sa sega ni kunea vei kemudou e dua na tamata vuku.

¹¹ Sa oti yani na noqu siga; sa muduki tani na noqu i naki, Io, na vakanananu ni lomaqu.

¹² Era sa vukica na bogi me siga; Sa lekaleka na rarama e na vuku ni butobuto.

¹³ Ke'u sa waraka nai bulubulu me noqu vale: Ka'u sa cakava na noqu i mocemoce e na butobuto.

¹⁴ Ke'u sa kaya yani ki na vuca, ko iko na tamaqu: Ki na baca, ko iko na tinaqu kei na ganequ.

¹⁵ Sa qai evei na ka me'u nuitaka? Ia na ka ka'u sa nuitaka, ko cei ena kunea?

¹⁶ Ena lako sobu ga ki nai sogo ni bulubulu; Ni sa yaco na vakacegu e na kuvu-ni-soso.