Jope 16 - Vakavakadewa Makawa

Sa vunauci iratou na wekana ko Jope ni ratou sa sega ni loloma, 1-5; a sa tukuna ni sa ka lomani ko koya, ka sa yalododonu ga, 6-22.

¹ Sa qai vosa ko Jope ka kaya,

² E vuqa na ka vakaoqo ka'u sa rogoca: Na dauveivakacegui vakararawa koi kemudou kecega.

³ Ena oti ninaica na vosa wale? Se na cava beka sa vakadoudoutaki iko mo vosa mai?

⁴ E rawarawa me'u vosa talega me vakataki kemudou: Kevaka dou sa noqu i sosomi, E rawarawa me'u vakalevutaka na vosa vei kemudou, Ka kurea na uluqu vei kemudou.

⁵ Ia ka'u a qai vakaukauwataki kemudou ga e na gusuqu, Ia ni sa yavavala na tebenigusuqu, sa na qai malumu kina na nomudou rarawa.

⁶ Ke'u sa vosa, ke sa sega ni malumu kina na noqu rarawa: Kevaka ka'u sa cegu ni vosa, a cava me seavu kina vei au?

⁷ Ia oqo sa qai vakaocataki au ko koya: Ko ni sa vakayalia na wekaqu kecega.

⁸ Ia ko ni sa vakasalulutaki au, oqori sa tukuni au: Ia na noqu suivotu sa rairai mai, ka sa vakatakilai au ki mataqu.

⁹ Sa dresulaki au e na nona cudru, ka sa cati au: Sa vakasequruquru vei au: Ko koya na noqu meca sa mata cudrucudru mai vei au.

¹⁰ Era sa dalaga vei au; Era sa sabica na baluqu e na veivakalialiai; Era sa yalovata me vakacacani au mai.

¹¹ Sa soli au yani na Kalou vei ira na tamata ca, A sa biuti au yani ki na ligadra nai valavala ca.

¹² Au a tiko vakacegu, ka sa qai musuki au ko koya; Sa taura talega na domoqu, ka vorolaki au: Sa vakaturi au me'u nona ka me vanavana kina.

¹³ Sa vakavolivoliti au ko ira na nona dauvanavana; Sa tasea na toloqu ko koya, ka sega ni vakacegu; Sa livia yani na miqu ki na qele.

¹⁴ Sa daumusuki au wasoma; Sa cici vakaivalu mai vei au me vaka na tamata yagolevu.

¹⁵ Au sa cula nai sulu taga ki na kuliqu, Ka biuta sobu na noqu i totoka ki na kuvu-ni-soso.

¹⁶ A mataqu sa dukaveluvelu e na tagi, Ka sa tauca na dakudaku-ni-mataqu na yaloyalo ni mate:

¹⁷ Sa sega ni tu e ligaqu nai valavala sa sega ni dodonu: A noqu masumasu talega sa savasava.

¹⁸ Na qele, mo kakua ni gunuva na noqu dra, Me kakua talega na tikina sa yalani kina na noqu tagi.

¹⁹ Oqo talega, raica, sa tiko mai lomalagi na noqu i vakadinadina, Ia sa tiko maicake ko koya sa lewa e na vukuqu.

²⁰ Sa vakalialiai au ko iratou na wekaqu; Ia sa titiri tikoga na wai ni mataqu vua na Kalou.

²¹ Me tara mada vua na tamata me veilewai kaya na Kalou, Me vaka na tamata sa veilewai kaya na wekana!

²² Ni sa na oti mada e vica ga na yabaki, Ka'u na qai lako yani e na sala ka'u na sega ni lesu tale maikina.