Jope 15 - Vakavakadewa Makawa

Sa vunauci Jope ko Elifasi ni sa vakadonui koya vakai koya, 1-16: ka sa tukuna na nodra sega ni cegu rawa na tamata ca, 17-35.

¹ Sa qai vosa ko Elifasi na kai Temani, ka kaya,

² Me cavuta li na vuku e sega ni yaga ko koya na tamata vuku, Ka vakamamautaka na ketena e na cagi ni tokalau?

³ Ena totaka beka na ka e na vosa e sega ni yaga? Se e nai vakavuvuli sa sega na betena?

⁴ Ia ko iko, ko sa biuta tani na rere, Ka tarova na masu e na mata ni Kalou.

⁵ Ni sa tukuna na gusumu na nomu i valavala ca, Ko sa digitaka na vosa ni daulawaki.

⁶ A gusumu ga sa vakacalai iko, ka segai koi au: Io, na tebenigusumu ga sa tukuni iko.

⁷ Ko iko beka nai matai ni tamata ka sucu? Se ko buli mada eliu ko iko ka qai buli emuri na veiulu-ni-vanua?

⁸ Ko sa rogoca beka na bose vuni ni Kalou? Se ko sa tarova li na vuku me nomu ga?

⁹ A cava ko kila, keitou sa sega talega ni kila? Se cava ko vakasamataka, sa sega talega vei keitou?

¹⁰ Sa tiko vei keitou na ulu sika kei na qase dina talega, Sa gone ko tamamu.

¹¹ Sa ka lailai beka vei iko na veivakacegui ni Kalou? Se dua beka na ka vuni sa tu vei iko?

¹² A cava sa kauti iko vakatani kina na lomamu? Se cava sa sauriva kina na matamu,

¹³ Mo vakatanitaka kina na yalomu vua na Kalou, Ka vosataka kina na gusumu na vosa vakaoqori?

¹⁴ A cava na tamata, me sa savasava ko koya? Kei koya sa sucu mai vua na yalewa, me yalododonu ko koya?

¹⁵ Raica, sa sega ni vakadinati ira na nona era yalosavasava; Ia sa sega ni savasava e matana na lomalagi.

¹⁶ Ka sa vakaevei na kena vakasisila kei na kena dukadukali na tamata, Ko koya sa daugunuva na ca me vaka na wai?

¹⁷ Au na vakatakila vei iko, rogoci au mai; Ia na ka ka'u a raica ka'u na tukuna;

¹⁸ Oqori era sa tukuna Ko ira na vuku maivei ira na nodra qase, a ra sa sega ni vunia:

¹⁹ Ko ira ga ka soli kina ko vuravura, Ka sega ni kai tani me veilakovi kei ira.

²⁰ Sa kana rarawa ko koya na tamata ca e na nona siga kecega, Ka sa vunitaki vua na dauivalavala kaukauwa se na vica beka na nona yabaki.

²¹ Sa rorogo tu e daligana na ka rerevaki: Ni sa sautu tiko, ena yacovi koya na dauveivakarusai.

²² Sa sega ni dinata ni na lesu tale mai na butobuto, A sa waraki koya tu nai seleiwau.

²³ Sa qara sese voli tu na kena, ka kaya, Sa evei? Sa kila ko koya ni sa voleka sara vua na siga ni butobuto.

²⁴ Sa vakarerei koya na rarawa kei na yaluma; Era gumatua vua, me vaka na tui sa vakarau ki nai valu.

²⁵ Ni sa dodoka na ligana vua na Kalou, A sa vakaukauwataki koya me veivala kaya sa Kaukauwa.

²⁶ Sa cici vakadomoqa vei koya, E na nonai sasabai sukusukura:

²⁷ Ni sa ubia na matana e nona uro, A sa uro mai na detena.

²⁸ Ia sa tiko ga ko koya e na veikoro lala, E na veivale sa sega e tiko kina, Ka sa voleka ni rusa:

²⁹ Ena sega ni vutuniyau ko koya, ena sega ni tiko dei na nona ka, Ena sega talega ni vakadedetaka na kena vinaka e vuravura.

³⁰ Ena sega ni lako tani mai na butobuto; Ena malai yani na tabana e na yameyame ni buka, Ena takali talega ko koya e nai cegu ni gusuna.

³¹ Me kakua na dauvakacalai me vakararavi e na ka sa sega ni yaga: Ni na sega ni yaga na kenai sau.

³² Ni sa bera na kena gauna sa na yaco ga, Ena sega talega ni bulabula na tabana.

³³ Ena kuretaki sobu na vuana vou me vaka na vaini, Ena mimira na sena me vaka na olive.

³⁴ Ni na lala na nodra i soqosoqo na dauveivakaisini, Ia na bukawaqa ena kania na nodra veivale era sa tarai yau ni vere.

³⁵ Era sa kunekunetaka na ca, ka vakasucuma na lasu, Ka sa vakarautaka na veivakaisini na lomadra.