Jope 14 - Vakavakadewa Makawa

Ni sa ka lekaleka na bula ni tamata, ka sa sega ni bula tale e vuravura ni sa mate, sa masuta na Kalou ko Jope me lomani koya mai.

¹ A tamata sa sucu maivua na yalewa Sa vica walega na nona siga, ka sa vutu ni rarawa.

² Sa tubu mai ko koya me vaka na se ni kau, ka sa tamusuki tale: Sa dro talega me vaka na yaloyalo, ka sa sega ni tiko dei.

³ Ia ko ni sa yadrava beka e dua sa vakaoqo, Ka kauti au mai me daru veilewai kei kemuni?

⁴ Ko cei me kauta rawa mai e dua na ka savasava mai na ka sa sega ni savasava? sa sega sara e dua.

⁵ Ni sa lokuci tu na nona siga, ka sa tu vei kemuni nai wiliwili ni nona vula. Ni kemuni sa lesia talega na kenai yalayala me kakua ni sivia;

⁶ Mo ni gole tani mada mai vua, me vakacegu ko koya, Me vakaotia mada na nona siga, me vaka na tamata sa voli na nona cakacaka.

⁷ Ni sa nuitaki, kevaka sa ta sobu na kau, ena tubu tale, Ena sega talega ni yali na kena tubucoke mai.

⁸ Kevaka sa vuca mai na wakana e na qele, Ka sa mate na vuna e na soso;

⁹ Ena tubu mai ni sa boica na wai, Ena tubura na tabana me vaka na kau sa tei.

¹⁰ Ia sa mate ga na tamata, ka sa takali yani: Io sa ciba na tamata, ka sa evei ko koya?

¹¹ Me vaka sa dauyali na wai mai na wasawasa, Ka sa daudi ka maca na uciwai:

¹² Sa dau vakakina na tamata, era sa duikoto sobu, ka sega ni tu cake tale; Era na sega ni yadra Se vakaturi cake mai na nodra moce ka me yali mada na lomalagi.

¹³ Mo ni vunitaki au mada e nai bulubulu, Ka tabonaki au, me oti mada na nomuni cudru, Ka lokuca vei au e dua na siga, ka nanumi au!

¹⁴ Kevaka sa ciba na tamata, ena bula tale ko koya? Au na waraka na siga kecega sa loku vei au, Me yaco mada na noqu vakamataliataki.

¹⁵ Ko ni na kaci mai, ka'u na rogo yani vei kemuni: Ko ni na vinakata na cakacaka ni ligamuni.

¹⁶ Ia oqo ko ni sa wilika nai cavucavu ni yavaqu: Kemuni sa sega beka ni daunanuma na noqu i valavala ca.

¹⁷ Sa dregati e loma ni taga na noqu talaidredre, Ia ko ni sa cula kina na noqu i valavala ca.

¹⁸ Sa yaco dina me ka wale na ulu-ni-vanua sa lutu sobu; A vatu talega, sa biu tani mai na kena yasana:

¹⁹ Sa solota na vatu na wai: Ko ni sa luvuca na ka sa tubu mai na kuvu-ni-qele; Ia ko ni sa dauvakaotia talega na vakanananu ni tamata.

²⁰ Ko ni sa gumatua tikoga vua, a sa takali ko koya: Ko ni sa vakatanitaka na matana, ka vakatalai koya yani.

²¹ Sa vakarokorokotaki mai ko iratou na luvena, a sa sega ni kila ko koya; A ratou sa vakasivoi, ka sa sega ni kunea ko koya.

²² Ia ena rarawa ga na lewena, Ena tagi talega e lomana na yalona.