Jope 13 - Vakavakadewa Makawa

Sa vunauci iratou na wekana ko Jope, 1-12; a sa tukuna na nona vakabauta, 13-19. Sa vakamamasu vua na Kalou ko koya, 20-28.

¹ Raica, a ka kecega oqo sa kunea na mataqu, Sa rogoca na daligaqu ka sa kila

² A ka dou sa kila, ka'u sa kila talega; Ka'u sa sega ni uasivi sobu vei kemudou.

³ E dina, ka'u sa via vosa vei Koya sa Kaukauwa, Au sa vinakata me keirau veitarogi kaya na Kalou.

⁴ Ia koi kemudou, dou sa dautulia na lasu, Dou sa vuniwai sa sega ni yaga kecega

⁵ Ke dou tiko lo sara mada! Sa na qai nomudou vuku ga oqori.

⁶ Dou rogoca mada na noqu vakatusa, Ia dou vakarorogo ki na veitarogi ni tebenigusuqu.

⁷ Dou na vosa ca beka mo dou totaka na Kalou? Dou na vosa vakaveivakaisini e na vukuna?

⁸ Dou na vinakata loa beka na matana? Dou na ia na veileti e na vuku ni Kalou?

⁹ Sa vinaka beka me vakatarogi kemudou ko koya? Se dou sa vakalialiai koya, me vaka sa ia na veivakalialiai na tamata?

¹⁰ E dina ena vunauci kemudou ko koya, Kevaka dou sa vakadonui ira lo na tamata.

¹¹ Ena sega beka ni vakarerei kemudou na nonai tovo vakaturaga? Ena sega ni kani kemudou na rerevaki koya?

¹² A nomudou vosa vakaibalebale nai bole dravusa, A yagomudou na yago tete.

¹³ Dou galuvi au mada ga, me'u vosa koi au, Me qai veitalia se cava ena yacovi au.

¹⁴ A cava me'u taura kina na lewequ e batiqu? Ka taura e ligaqu na noqu bula?

¹⁵ Kevaka sa vakamatei au ko koya, ka'u na vakararavi ga vua: Ia na noqu i valavala ka'u na vakadinadinataka e matana.

¹⁶ Sai koya talega ka'u na bula kina; Ni sa sega na tamata dauveivakaisini me toro yani vua.

¹⁷ Dou rogoca vakavinaka na noqu vosa. Kei na noqu vakatusai au e na daligamudou.

¹⁸ Raica, ka'u sa qai vakarau tu ki na veilewai: Au sa kila ni'u na vakadonui.

¹⁹ Ko cei ena veilewai kei au? Kevaka ka'u na qai galu oqo, ka'u na ciba.

²⁰ E rua ga na ka mo ni kakua ni kitaka vei au: Ka'u na qai sega ni vunitaki au vei kemuni.

²¹ Mo ni kauta vakayawa tani vei au na ligamuni: Me kakua talega ni vakarerei au na ka rerevaki maivei kemuni.

²² Mo ni qai kaci mai, ka'u na qai vosa: Se'u vosa mada koi au, mo ni qai vosa mai vei au.

²³ E vakavica beka na noqu caka cala, kei na noqu i valavala ca? Mo ni vakatakila vei au na noqu talaidredre kei na noqu i valavala ca.

²⁴ A cava ko ni sa vunia kina na matamuni, Ka nanumi au me'u nomuni meca?

²⁵ Kemuni na vurulaka beka na drau-ni-kau sa cagina? Se vakasava na vu-ni-sila malai?

²⁶ Ni ko sa vola na ka vakararawa sara vei au, Ka votai au e na noqu i valavala ca ni'u a cauravou.

²⁷ Ko ni sa vesuka talega na yavaqu e nai vesu kau, ka vakaraica matua na noqu i lakolako kecega; Ka sa vola vakavolivolita na qeteqete ni yavaqu:

²⁸ Ia ko koya oqori sa malai yani me vaka na ka sa vuca, Me vaka nai sulu sa kania na sarasara.