Jope 11 - Vakavakadewa Makawa

Sa vunauci Jope ko Sofa ni sa vakadonui koya ga, 1-6. Sa tukuna ko koya ni sa ka vakaidina sara na vuku ni Kalou, 7-12; a sa vakarota vei Jope na veivutuni, 13-20.

¹ Sa qai vosa ko Sofa na kai Neama, ka kaya,

² Me sega beka ni tabani yani na vosa e vuqa? Se na vakadonui beka na tamata dauvosa?

³ Me ra tiko lo beka na tamata e na vuku ni nomu lasu? Ia me sega beka ni vakamaduataki iko e dua ni ko sa ia na veivakaisini?

⁴ Ia ko sa kaya, Sa dodonu na noqu i vakavuvuli; Au sa savasava talega e matamuni.

⁵ Ia me vosa mada na Kalou, Ka dalaga me sereki iko;

⁶ Ka vakatakila vei iko na ka vuku e vuni tu, Ni sa levu cake, ka lailai na kena sa kilai! Mo qai kila ni sa ka lailai e taroga vei iko na Kalou, ka ka levu na nomu i valavala ca.

⁷ Ni ko sa dikeva, ko na kilai koya rawa beka kina na Kalou? Ko na kilai Koya deivaka rawa sa Kaukauwa?

⁸ Sa cecere vakataki lomalagi; a cava ko sa kitaka rawa? Sa matia ko bulu; A cava ko sa kila rawa?

⁹ A kenai vakarau sa balavu ka lekaleka ko vuravura, A sa rabailevu ka rabailailai na wasawasa.

¹⁰ Kevaka sa lako tu ka sogolatia, Ka vakasoqona vata, ko cei me tarovi koya?

¹¹ Ni sa kilai ira na tamata lasulasu; Sa kunea talega na caka ca; ia ena sega beka ni vakanananu kina?

¹² Ni sa viaviavuku na tamata lialia, Ia ka sa sucu ga me vaka na luve ni asa kila.

¹³ Kevaka ko sa vakarautaka na yalomu, Ka dodoka na ligamu vei koya;

¹⁴ Kevaka sa tu na ca e ligamu, mo biuta vakayawa, Ia me kakua ni tiko nai valavala ca e na nomu veivale.

¹⁵ Ni ko na qai ta cake ka na sega ni tauvi duka na matamu; Ia ko na tiko dei, ka na sega ni rere:

¹⁶ Ni ko na guilecava na nomu vakaloloma; Ka nanuma kina me vaka na wai sa lako tani yani:

¹⁷ Ia na nomu bula ena uasivi cake e na rarama ni siga levu; Ko na cila yani, ko na tautauvata kei na mataka.

¹⁸ Ia ena tiko dei na lomamu, ni sa nuitaka na vinaka; Ia ko na vakararai voli ga, ka koto sobu e na vakacegu.

¹⁹ Ia ko na koto sobu, ka na sega e dua me vakarerei iko; A ra na vakamasuti iko na lewe vuqa.

²⁰ Ia ena oca wale na matadra nai valavala ca; Ena yali na nodra i drodro, Ia na nodra i nuinui ena vaka na ciba yani.