Jope 10 - Vakavakadewa Makawa

Sa vosa vua na Kalou ko koya e na vuku ni nona rarawa, a sa kerea me vakacegui vakalailai mada ni sa bera tiko ni mate.

¹ Sa ka ni oca ki na lomaqu na noqu bula; Au na soli au me'u didi walega; Au na vosa ga e na rarawa ni yaloqu;

² Au na kaya vua na Kalou, Mo ni kakua ni vakacalai au; Mo ni vakatakila vei au se cava ko ni sa veileti kina kei au.

³ Sa vinaka beka vei kemuni mo ni ia na veivakararawataki, Mo ni beca talega na cakacaka ni ligamuni, Ka cilava na nodra bose nai valavala ca?

⁴ Koi kemuni beka ko ni sa mata vakatamata? Se ko ni raica beka na ka me vaka sa raica na tamata?

⁵ Sa tautauvata beka na nomuni siga kei na nodra siga na tamata? Se tautauvata na nomuni veiyabaki kei na veisiga ni tamata,

⁶ Mo ni sa vakataroga kina na noqu cala, Ka sa qaqa na noqu i valavala ca?

⁷ Ia ko ni sa kila ni'u sa sega ni tamata ca; Ka sa sega e dua me vakabula rawa mai na ligamuni.

⁸ Sa vakamataitaki au na ligamuni, Sa cakava kece na tikiqu me vinaka vata; ia ko ni sa vakarusai au ga.

⁹ Mo ni nanuma mada, ni kemuni sa buli au me vaka sa caka na tete; Ia ko ni na vakalesui au tale beka me'u kuvu-ni-soso?

¹⁰ Ko ni sa sega beka ni livi au yani me vaka na wai-ni-sucu, Ka buli au me vaka nai buli wai-ni-sucu?

¹¹ Ko ni sa vakaisulutaki au e na kuliqu kei na lewequ, Ka viribaiti au e na suiqu kei na ua.

¹² Ko ni sa solia vei au na bula kei na loloma, Ia na nomuni dauraici au sa maroroi kina na yaloqu.

¹³ Ia na ka kece oqo ko ni sa vunia e lomamuni: Au sa kila ni sa tiko vei kemuni na ka oqo.

¹⁴ Kevaka ka'u sai valavala ca, ko ni sa nanuma tiko kina, Ko ni na sega talega ni vakadonui au mai na noqu caka ca.

¹⁵ Kevaka ka'u sai valavala ca, ka'u na ca ga kina; Ia kevaka ka'u sa caka dodonu, ka'u na sega ga ni ta cake. Au sa luvu e na madua; ka'u raica tiko na noqu rarawa;

¹⁶ Ni sa tubu ga, ko ni sa vakasavi au me vaka na laioni daukata: Ia ko ni sa baci lesu vakidacala tale mai vei au.

¹⁷ Ko ni sa daulesia na nomu ka vou eso me tukuni au vakaca, Ko ni sa vakalevutaka na nomuni cudru vei au; Sa dauyaco vei au na ka vou kei nai valu.

¹⁸ A cava ko ni a kauti au kina mai na kete? Ke'u a ciba, ka sa sega ni kunei au e dua na tamata, ke sa vinaka.

¹⁹ Ka'u a qai vaka ni'u sa sega ga, Ka'u a qai colati mai na kete ki nai bulubulu.

²⁰ Sa sega beka ni vica walega na noqu siga? Mo ni kua mada, ni laivi au ga, me'u vakacegu vakalailai mada,

²¹ Me'u qai lako yani ka sega ni lesu tale mai, Io ki na vanua butobuto kei na yaloyalo ni mate;

²² E dua na vanua butobuto, me vaka na butobuto loaloa; Na yaloyalo ni mate, sa sega ni vakacokotaki vinaka, Ka sa vaka na butobuto ga na kena rarama.