Jope 1 - Vakavakadewa Makawa

Sa yalododonu sara ka vutuniyau ko Jope, 1-3. Sa daumasulaki iratou na luvena, 4,5. Sa kerekere ko Setani me vakatovolei koya, 6-12. Sa yali na nonai yau kei na luvena, 13-19. Sa tagi, ka sa vakavinavinaka talega vua na Kalou, 20-22.

¹ Sa dua na tamata mai na vanua ko Usi, na yacana ko Jope; ia na tamata ko ya sa yalododonu ka daucaka dodonu, a sa rerevaka tiko na Kalou, ka sega ni torova na ca.

² Sa sucu e le vitu na luvena tagane ka le tolu na luvena yalewa.

³ Ia na nonai yau sa vitu na udolu na sipi, ka tolu na udolu na kameli, ka dua na udolu na pulumokau, ka lima na drau na asa yalewa, ka sa ka tani na nona lewe ni vale; ka sa uasivi cake kina na tamata oqo vei ira kecega na lewe ni vanua mai na tu-i-cake.

⁴ A sa lako ko iratou na luvena tagane, ka ia na kana vata e nodratou veivale yadua, e na nona siga; ka ratou sa talaki ka kaciva na ganedratou tolutolu me mai kana ka gunu vata kei iratou.

⁵ Ia ni sa oti na veisiga ni kana magiti, sa qai talaki ko Jope ka vakasavasavataki iratou, ka sou e na mataka, ka vakacabora nai soro kama me vaka na kedratou i wiliwili kecega: ni sa kaya ko Jope, De sa cala ko iratou na luvequ, ka vosavakacacataka lo na Kalou e lomadratou. Ia sa daukitaka vakaoqo ko Jope.

⁶ Ia sa dua na siga era sa lako mai kina na luve ni Kalou me vakaraitaki ira e na mata i Jiova, a sa lako talega mai kei ira ko Setani.

⁷ Ka sa kaya vei Setani ko Jiova, Ko sa lako maivei? A sa kaya vei Jiova ko Setani, Au sa dauveilakoyaki e vuravura, ka gade voli kina.

⁸ Ka sa kaya vei Setani ko Jiova, Ko sa vakanananu beka vua na noqu tamata ko Jope, ni sa sega e dua e tautauvata kaya e vuravura, a tamata yalododonu ka daucaka dodonu, ka sa rerevaka na Kalou, ka sega ni torova na ca?

⁹ Sa qai kaya vei Jiova ko Setani, Sa sega li ni yaga vei Jope na nona rerevaka na Kalou?

¹⁰ Ko ni sa sega beka ni viribaiti koya, kei na nona vale, kei na nona ka kece e na veiyasana kecega? ko ni sa vakalougatataka na cakacaka ni ligana, ka sa tubu kina me ka levu na nonai yau e na vanua.

¹¹ Ia mo dodoka mada na ligamuni, ka tara na nona ka kecega, ena qai vosavakacacataki kemuni ki matamuni.

¹² Ka sa kaya vei Setani ko Jiova, Raica, sa soli ki ligamu na nona ka kecega; ia mo kakua ni dodoka na ligamu mo tarai koya. A sa lako tani ko Setani mai na mata i Jiova.

¹³ Ka sa dua na siga eratou sa kana kina ka gunu waini ko iratou na luvena tagane, kei na luvena yalewa e na vale nei tuakadratou ka ulumatua:

¹⁴ a sa lako mai e dua na tamata vei Jope, ka kaya, Era a cuki were tu e nai sivi yara na pulumokau, a ra sa kana voleka kina na asa:

¹⁵ ka sa sikiti ira ko ira na kai Sipa, ka kauti ira tani, a ra sa vakamatei ira na cauravou e nai seleiwau; ia koi au duaduaga ka'u sa dro bula me'u tukuna vei iko.

¹⁶ Ni sa vosa tiko ko koya, sa lako mai e dua tani tale, ka kaya, Sa lutu mai lomalagi na bukawaqa ni Kalou, a sa vakama na sipi, kei ira na cauravou, io, sa kani ira sara; ia koi au duaduaga ka'u sa dro bula me'u tukuna vei iko.

¹⁷ Ni sa vosa tiko ko koya, sa lako mai e dua tani tale, ka kaya, Era lesia e tolu na mataivalu ko ira na kai Kalitia, ka ra sikiti ira na kameli, ka kauta tani, ka ra sa yaviti ira na cauravou e nai seleiwau; ia koi au duaduaga ka'u sa dro bula me'u tukuna vei iko.

¹⁸ Ni sa vosa tiko koya, sa lako mai e dua tani tale, ka kaya, Sa ra kana ka gunu waini ko iratou na luvemu tagane kei na luvemu yalewa mai na vale nei tuakadratou na ulumatua:

¹⁹ ka raica, sa liwa e dua na cagi levu mai lekutu, a sa roba na tutu ni vale vava, a sa baleti ira na cauravou, ka ra sa mate; ia koi au duaduaga ka'u sa dro bula me'u tukuna vei iko.

²⁰ Sa qai tu cake ko Jope, ka dresulaka na nonai sulu, ka tasia na uluna, ka cuva ki na qele, ka lotu,

²¹ ka kaya, Au a luvawale ni'u a lako mai na kete i tinaqu, au na luvawale talega ni'u sa suka ki kea: sa solia ko Jiova, ka sa kauta tani ko Jiova; me vakavinavinakataki ga na yaca i Jiova.

²² E na ka kecega oqo sa sega ni cala kina ko Jope, se kaya ko koya ni sa cala na Kalou.