Joni 5 - Vakavakadewa Makawa

Sa lako ki Jerusalemi ko Jisu, a sa vakabula e dua na tamata sa tauvi-mate, 19. Ko ira na kai Jutia era sa vakacacani Jisu, ka via vakamatei koya, 1016. Sa vakatakila vei ira ko Jisu ni sa talai koya mai na Kalou, 1739. Sa vunauci ira talega ni ra sa bese ni vakadinata na nona vosa, 4047.

¹ Sa oti na veika oqo sa dua na nodra so levu na kai Jutia; a sa lako cake ki Jerusalemi ko Jisu.

² Ia sa tu mai Jerusalemi e dua nai silisili e voleka ki na matamata-ni-koro ni sipi, a yacana e na vosa vaka Iperiu ko Peceseita, a sa lima na kena vale.

³ Sa le vuqa era tauvi-mate sa davo kina, ko ira na mataboko, na lokiloki, na wamalai, era sa wawa me vakayavalati mada na wai.

⁴ Ni sa lako sobu mai e dua na agilose e na gauna eso ki nai silisili, ka vakayavalata na wai: ia ko koya sa sobu kina eliu ni sa vakayavalati na wai, sa bula mai na mate kecega sa tauvi koya.

⁵ A sa tiko kina e dua na tamata, sa tauvi mate tu ka yabaki tolusagavulu ka mani walu.

⁶ Ni sa raici koya ko Jisu ni sa davo koto, ka kila sa dede, sa kaya vua, Ko sa via bula, se segai?

⁷ Sa kaya vua ko koya sa tauvi mate, Sa sega, saka, e dua na noqu tamata me kauti au ki nai silisili, ni sa vakayavalati na wai; ia niu sa lako tiko kina, sa liu sobu vei au e dua tani.

⁸ Sa kaya vua ko Jisu, Tu cake, taura cake na nomui mocemoce, ka lako.

⁹ A sa bula vinaka vakasauri na tamata, ka taura cake na nonai mocemoce, ka lako: ia na siga ko ya na siga ni vakacecegu.

¹⁰ O koya oqo era sa kaya kina na kai Jutia vei koya sa vakabulai, A siga ni vakacecegu oqo: sa sega ni tara vei iko mo colata nai mocemoce.

¹¹ Sa kaya vei ira ko koya, O koya sa vakabulai au, sa kaya vei au ko koya, Taura cake na nomui mocemoce, ka lako.

¹² A ra sa qai tarogi koya, Ko cei na tamata sa kaya vei iko, Taura cake na nomui mocemoce, ka lako?

¹³ Ia ko koya sa vakabulai, sa sega ni kila se ko cei ko koya; ni sa lako lo yani ko Jisu, ka ni ra sa lewe vuqa e na tikina ko ya.

¹⁴ Sa oti na veika oqo sa kunei koya ko Jisu e na vale ni soro, ka kaya vua, Raica, ko sa qai bula vinaka; kakua ni valavala ca tale, de yaco vei iko e dua na ka e ca vakalevu cake.

¹⁵ Sa lako tani na tamata, ka tukuna vei ira na kai Jutia ni sai Jisu ka vakabulai koya.

¹⁶ Ia e na vuku ni ka oqo sa vakacacani Jisu ko ira na kai Jutia, ni sa kitaka ko koya na veika oqo e na siga ni vakacecegu.

¹⁷ A sa kaya vei ira ko Jisu, Sa cakacaka tikoga ko Tamaqu, koi au talega, au sa cakacaka.

¹⁸ E na vuku ni ka oqo era sa gadreva vakalevu kina na kai Jutia me ra vakamatea, ni sa sega ni vakacacana walega ko koya na siga ni vakacecegu, ia ka sa kaya talega sa Tamana dina na Kalou, a sa vakatauvatani koya kina kei na Kalou.

¹⁹ Sa qai vosa ko Jisu, ka kaya vei ira, E dina, e dina, au sa kaya vei kemudou, E sega ni rawata vakai koya ga e dua na ka na Luvena, na ka ga sa raica ni kitaka ko Tamana; ia na veika sa kitaka ko koya, sa kitaka vaka talega kina na Luvena.

²⁰ Ni sa lomana na Luvena ko Tamana, a sa vakatakila vua na ka kecega sa kitaka ko koya; ia ena vakaraitaka vua na cakacaka eso sa uasivi cake e na veika oqo, mo dou kurabui kina.

²¹ Me vaka sa vakaturi ira cake na mate ko Tamana, ka vakabula, sa vakakina na Luvena o koya sa vakabulai ira sa vinakata.

²² Ni sa sega ni lewa e dua na tamata ko Tamana, ia sa lesia na Luvena me ia na lewa kecega;

²³ me ra vakarokorokotaka na Luvena na tamata kecega, me vaka era sa vakarokorokotaki Tamana. O koya sa sega ni vakarokorokotaka na Luvena, sa sega ni vakarokorokotaki Tamana ka talai koya mai.

²⁴ E dina, e dina, au sa kaya vei kemudou, O koya sa rogoca na noqu vosa, ka vakabauti koya sa talai au mai, sa rawata na bula tawa mudu, ena sega talega ni cudruvi; ka sa lako mai na mate ki na bula.

²⁵ E dina, e dina, au sa kaya vei kemudou, Sa lako mai na gauna, ia sa yaco edaidai, me ra rogoca na domo ni Luve ni Kalou ko ira na mate: ia ko ira sa rogoca era na bula.

²⁶ Me vaka sa bula vakai koya ga ko Tamana; sa solia talega vua na Luvena me bula vakai koya ga;

²⁷ a sa lesi koya talega me ia na lewa, e na vuku ni sa Luve ni tamata.

²⁸ Dou kakua ni kurabui e na ka oqo: ni sa lako mai na gauna era na rogoca kina na domona ko ira kecega e nai bulubulu,

²⁹ a ra na lako maikina; ko ira sai valavala vinaka, era na tu cake tale me ra bula; ia ko ira sai valavala ca, era na tu cake tale me ra cudruvi.

³⁰ Au sa sega ni kitaka rawa e dua na ka vakai au ga: au sa lewa me vaka na ka kau sa rogoca: a sa dodonu na noqu lewa; niu sa sega ni muria na lomaqu, a loma i Tamaqu ga ko koya sa talai au mai.

³¹ Kevaka sai au ga sa tukuni au, sa sega ni dina na noqui tukutuku.

³² Sa dua tani sa tukuni au, ia kau sa kila sa dina nai tukutuku sa tukuni au kina ko koya.

³³ Dou a talaki vei Joni, a sa tukuna na ka dina ko koya.

³⁴ Ia ka sa sega ni yaga vei au me ra tukuni au na tamata: ia kau sa kaya ga na veika oqo, mo dou bula kina.

³⁵ Ko koya oqori na rarama sa caudre tu ka cila mai, ia dou a vinakata vakadede vakalailai ga mo dou reki e na kena rarama.

³⁶ Ia nai tukutuku kau sa tukuni kina sa levu, ka lailai nai tukutuku i Joni; a cakacaka sa solia mai vei au ko Tamaqu meu vakaotia, a cakacaka oqo kau sa kitaka tiko, sa tukuni au, ni sa talai au mai ko Tamaqu.

³⁷ Ia ko Tamaqu, ko koya sa talai au mai, sa dautukuni au. Dou a sega ni rogoca na domona e na dua na siga, se raica na nonai tovo.

³⁸ A sa sega ni tiko e na lomamudou na nona vosa; ni dou sa sega ni vakabauti koya sa tala mai ko koya.

³⁹ Dou sa vakasaqaqara e nai Vola Tabu; ni dou sa nanuma dou sa rawata kina na bula tawa mudu: ia nai vola oqo sa tukuni au.

⁴⁰ Ia dou sa bese ni lako mai vei au, mo dou rawata kina na bula.

⁴¹ Sa sega ni yaga vei au me ra vakarokorokotaki au ko ira na tamata.

⁴² Ia kau sa kilai kemudou, ni sa sega ni tiko e na lomamudou na loloma vua na Kalou.

⁴³ Au sa lako mai e na yaca i Tamaqu, ia dou a sega ni vakabauti au: kevaka sa lako mai e dua tani e na yacana walega, dou na vakabauti koya.

⁴⁴ Dou sa vakabauta rawa vakaevei, ni dou sa veivakarokorokotaki tiko vakai kemudou, ka sega ni gadreva na vakarokoroko sa lako mai vua na Kalou duaduaga?

⁴⁵ Dou kakua ni nanuma niu na beitaki kemudou vei Tamaqu; sa dua sa beitaki kemudou tiko, ko Mosese, ko koya dou sa vakararavi kina.

⁴⁶ Kevaka dou a vakabauti Mosese, dou na vakabauti au: ni sa volai au ko koya.

⁴⁷ Ia kevaka dou sa sega ni vakadinata na nonai vola, dou na vakadinata vakaevei na noqu vosa?