Joni 4 - Vakavakadewa Makawa

Erau sa veivosaki ko Jisu kei na yalewa ni Samaria, 130. Sa vakatakila ko Jisu vei ira na nona tisaipeli ni sa via muria na ka sa vinakata ko Tamana, 3138. E lewe vuqa vei ira na kai Samaria era sa vakabauti koya, 3942. Sa vakabula ko Jisu na gonetagane ni turaga mai Kapenaumi, ko koya sa vakarau ciba, 4354.

¹ Ni sa qai kila na Turaga era sa rogoca ko ira na Farisi ni ra lewe vuqa sa lotutaka ko Jisu ka papitaisotaka, ka lewe lailai ga ko Joni,

² (ia sa sega ni veipapitaisotaki ko Jisu, ko ira ga na nona tisaipeli,)

³ sa biuti Jutia, ka lako tale ki Kalili.

⁴ A sa koto na nona sala e loma ni vanua ko Samaria.

⁵ Sa qai yaco ki na dua na koro mai Samaria, a yacana ko Saika, e voleka ki na tiki ni vanua sa solia ko Jekope vei Josefa na luvena.

⁶ A sa tu maikina nai keli-wai nei Jekope. Ni sa oca ko Jisu e na nona lako, sa mai tiko sobu e na bati ni keli-wai: ka sa voleka na kenai kaono ni aua.

⁷ Sa lako mai e dua na yalewa ni Samaria me taki wai: sa kaya vua ko Jisu, Solia mai vei au meu gunu.

⁸ Ni ra a lako yani na nona tisaipeli ki na koro me voli kakana.

⁹ Sa qai kaya vua na yalewa ni Samaria, Ni ko sa kai Jutia, ko sa kerea vakacava vei au mo gunu, niu sa yalewa ni Samaria? (ni ra sa sega ni veiriti ko ira na kai Jutia, kei ira na kai Samaria.)

¹⁰ Sa vosa ko Jisu ka kaya vua, Kevaka ko sa kila nai solisoli ni Kalou, kei koya talega sa kaya vei iko, Solia mai vei au meu gunu; ko sa qai kerea vua, ka na solia vei iko ko koya na wai bula.

¹¹ Sa kaya vei koya na yalewa, Sa sega, saka, na nomui takitaki, a sa titobu nai keli-wai: ko sa rawata maivei na wai bula oqori?

¹² ko sa uasivi cake beka vei Jekope, a tama i keimami, ko koya ka solia vei keimami nai keli-wai, ka gunu kina ko koya, kei iratou na luvena, kei na nona manumanu?

¹³ Sa vosa ko Jisu, ka kaya vua, O koya yadua sa gunuva na wai oqo ena viagunu tale:

¹⁴ ia ko koya sa gunuva na wai kau na solia vua, ena sega sara ni via gunu ka tawa mudu: ia na wai kau na solia vua, ena tu e na lomana me mata-ni-wai sa tovure ki na bula tawa mudu.

¹⁵ Sa kaya vei koya na yalewa, Solia, saka, mai vei au na wai oqori, meu kakua ni viagunu, se lako mai kike meu taki.

¹⁶ Sa kaya vua ko Jisu, Laki kaciva na watimu, ka mo drau lako mai kike.

¹⁷ Sa vosa na yalewa, ka kaya, Sa sega na watiqu. Sa kaya vua ko Jisu, Ko sa kaya dina, Sa sega na watimu:

¹⁸ ni sa lewe lima na watimu eliu; ia ko koya drau sa tiko kaya oqo sa sega ni watimu: ko sa vosa dina e na ka ko ya.

¹⁹ Sa kaya vei koya na yalewa, Au sa qai kila, saka, sa dua na parofita koi kemumi.

²⁰ Era sa dausoro na neimami qase e na ulu-ni-vanua oqo; ia dou sa kaya, sa tu mai Jerusalemi na tikina e dodonu me da soro kina.

²¹ Sa kaya vua ko Jisu, Yalewa, vakadinata na noqu vosa: ena lako mai na gauna dou na sega ni lotu kina vei Tamada, e na ulu-ni-vanua oqo, se mai Jerusalemi.

²² Dou sa lotu vei koya dou sa sega ni kila: keimami sa kilai koya keimami sa lotu vua: ni sa tubu maivei ira na kai Jutia nai Vakabula.

²³ Ia ena lako mai na gauna, a sa qai yaco mai, era na lotu vakayalo ka vakaidina vei Tamada ko ira sa lotu dina; ni sa qara ko Tamada me vakaoqo ko ira sa lotu vua.

²⁴ A Yalo na Kalou: ia ko ira sa lotu vua, e dodonu me ra lotu vakayalo ka vakaidina.

²⁵ Sa kaya vei koya na yalewa, Au sa kila ni na lako mai na Mesaia; (ko koya sa vakatokai na Karisito): ni sa tadu mai ko koya, ena tukuna vei keda na ka kecega.

²⁶ Sa kaya vua ko Jisu, Sai au ga sa qai vosa tiko vei iko.

²⁷ A sa qai lako mai ko ira na nona tisaipeli, a ra sa kurabui ni rau sa veivosaki kei na yalewa: ia ka sega e dua na tamata sa taroga, A cava ko sa vakasaqara? se, Drau veivosaki kaya e na vuku ni cava?

²⁸ Sa qai biuta na nonai takitaki na yalewa, ka lako yani ki na koro, ka kaya vei ira na tamata,

²⁹ Dou mai bau laki raica na tamata, ko koya sa tukuna mai vei au na ka kecega kau a cakava: sai koya oqo na Karisito, se segai?

³⁰ A ra sa qai lako tani yani e na koro, ka lako mai vua.

³¹ Ia ni sa bera mai, sa qai cikevi koya ko ira na tisaipeli, ka kaya, Vakavuvuli, mo kana mada.

³² A sa kaya vei ira ko koya, Sa tu vei au na kakana meu kania, dou sa sega ni kila.

³³ Sa qai veitarogi ko ira na tisaipeli, Sa dua li na tamata e kau kakana mai vei koya?

³⁴ Sa kaya vei ira ko Jisu, A qau kakana meu kitaka na loma i koya sa talai au mai; ka meu vakaotia na nona cakacaka.

³⁵ Dou sa sega li ni kaya, sa vo e va na vula, me qai cava mai na yabaki? raica, au sa kaya vei kemudou, Dou ta cake, ka raica na veiwere, sa voleka ni matua na yabaki.

³⁶ Ia ko koya sa tamusuka sa saumi, ka binia na vuana ki na bula tawa mudu; me reki vata ko koya sa kaburaka kei koya sa tamusuka.

³⁷ A sa dina kina na vosa oqo, E dua sa kaburaka, ia sa tamusuka e dua tani.

³⁸ Au a talai kemudou mo dou tamusuka na ka dou a sega ni cakacaka kina: eso tani era a cakacaka, ia dou sa rawata na vua ni nodra cakacaka.

³⁹ A ra sa le vuqa na kai Samaria e na koro ko ya era sa vakabauti koya e na vuku ni nona vosa na yalewa, ko koya sa vakatakila, Sa tukuna mai vei au ko koya na ka kecega kau a cakava.

⁴⁰ Ia ni ra sa lako mai vua ko ira na kai Samaria, era sa masuti koya me tiko ga kei ira; a sa tiko ga maikea ka bogi rua.

⁴¹ A ra sa lewe vuqa talega sa vakabauta e na vuku ni nona vosa;

⁴² a ra sa kaya vua na yalewa, Oqo keimami sa sega ni vakabauta e na vuku ni nomu vosa ga: ni keimami sa rogoca koi keimami, ka kila ni sai koya dina oqo na nodrai Vakabula na kai vuravura.

⁴³ Sa oti na bogi rua sa lako tani ekeri ko koya, ka yaco ki Kalili.

⁴⁴ A sa vakatakila ko Jisu, ni sa sega e dua na parofita sa dokai e nona vanua.

⁴⁵ Ni sa qai tadu mai ki Kalili ko koya, sa vakacegui koya ko ira na kai Kalili, e na vuku ni ra a raica na ka kecega sa kitaka ko koya mai Jerusalemi e na solevu, ni ra a lako talega ko ira ki na solevu.

⁴⁶ A sa lako tale mai ko Jisu ki Kena e Kalili, a koro sa vukica kina na wai me waini. Ka sa dua na turaga sa tauvi-mate na luvena mai Kapenaumi.

⁴⁷ Ni sa rogoca ko koya sa lako mai Jutia ko Jisu ki Kalili, sa lako vua, ka masuta me lako sobu ka vakabula na luvena: ni sa vakarau ciba.

⁴⁸ Sa qai kaya vua ko Jisu, Kevaka dou sega ni raica eso na ka-mana kei na ka e veivakurabuitaki, dou na sega ni vakabauta.

⁴⁹ Sa kaya vei koya na turaga, Lako sobu, saka, mai, de mate mada na luvequ.

⁵⁰ Sa kaya vua ko Jisu, Lako yani; sa bula na luvemu. A sa vakadinata na tamata na vosa sa kaya vua ko Jisu, a sa lako yani ko koya.

⁵¹ Ia ni sa lako sobu tiko, eratou sa mai tavaki koya na nona tamata, a ratou sa tukutuku vua, ka kaya, Sa bula na luvemu.

⁵² Sa qai taroga vei iratou ko koya na aua sa vakatekivu kina ko koya me bula cake. A ratou sa kaya vua, Sa takali vei koya na katakata e na noa e nai kavitu ni aua.

⁵³ A sa kila kina na tamana ni sai koya oqo na aua ka kaya kina vua ko Jisu, Sa bula na luvemu; a sa vakabauta ko koya, kei ira kecega na nona lewe-ni-vale.

⁵⁴ Oqo tale nai karua ni ka-mana sa cakava ko Jisu, ni sa lako mai Jutia ki Kalili.