Joni 3 - Vakavakadewa Makawa

Sa vakatakila vei Nikotimo ko Jisu ni sa dodonu me sucu tale na tamata, 113. Sa vakatakila mai na vakabauta, 14,15. Sa tukuna na loloma levu ni Kalou kivei ira na kai vuravura, 16,17; kei na nona cudruvi ira era sega ni vakabauta, 1821. Sa tukuni Jisu ko Joni, 2236.

¹ Sa dua na tamata vei ira na Farisi, a yacana ko Nikotimo, e dua na nodra turaga na kai Jutia:

² sa lako mai ko koya oqo vei Jisu e na bogi, ka kaya vua, Vakavuvuli, keitou sa kila ni kemuni sa lako mai vua na Kalou mei vakavuvuli: ni sa sega e dua na tamata e cakava rawa na veika-mana oqo ko ni sa cakava, kevaka erau sa sega ni tiko kaya na Kalou.

³ Sa vosa ko Jisu, ka kaya vua, E dina, e dina, au sa kaya vei iko, Kevaka sa sega ni sucu tale na tamata, ena sega ni raica rawa na matanitu ni Kalou.

⁴ Sa kaya vua ko Nikotimo, Sa sucu rawa vakaevei na tamata ni sa qase mai ko koya? sa curu rawa vakarua ki na kete i tinana, me sucu mai?

⁵ Sa kaya ko Jisu, E dina, e dina, au sa kaya vei iko, Kevaka sa sega ni sucu e dua e na wai kei na Yalo Tabu, ena sega ni curu rawa ki na matanitu ni Kalou.

⁶ Sa vakayago ko koya sa sucu e na yago; ia sa vakayalo ko koya sa sucu e na yalo.

⁷ Kakua ni kurabui niu sa kaya vei iko, E dodonu mo dou sucu tale.

⁸ Sa liwa na cagi ki na yasana sa digitaka, ia ko sa rogoca na kena rorogo, ka sega ni kila na yasana sa lako maikina, se na yasana sa lako yani kina: sa vaka talega kina ko koya yadua sa sucu e na Yalo Tabu.

⁹ Sa vosa ko Nikotimo, ka kaya vua, Sa rawa vakaevei na veika oqo?

¹⁰ Sa vosa ko Jisu, ka kaya vua, O iko na nodrai vakavuvuli na Isireli, ka sega ni kila na veika oqo, ne?

¹¹ E dina, e dina, au sa kaya vei iko, Keitou sa vosataka na ka keitou sa kila, ka tukuna na ka keitou a raica ia dou sa sega ni vakabauta na neitoui tukutuku.

¹² Kevaka kau sa tukuna vei kemudou na veika vakavuravura, ka dou sa sega ni vakabauta, dou na vakabauta vakaevei, kevaka kau sa tukuna vei kemudou na veika vakalomalagi?

¹³ A sa sega e dua na tamata sa lako cake ki lomalagi, ko koya ga sa lako sobu mai lomalagi, a Luve ni tamata, ko koya sa tiko mai lomalagi.

¹⁴ Ia me vaka sa laveta cake na gata ko Mosese mai na veikau, e dodonu me laveti cake vaka talega kina na Luve ni tamata:

¹⁵ me kakua kina ni rusa ko ira yadua sa vakabauti koya, me ra rawata ga na bula tawa mudu.

¹⁶ Ni sa lomani ira na kai vuravura vakaoqo na Kalou, me solia kina na Luvena e dua bauga sa vakatubura, me kakua ni rusa ko ira yadua era sa vakabauti koya, me ra rawata ga na bula tawa mudu.

¹⁷ Ni sa sega ni tala mai na Luvena ki vuravura na Kalou me cudruvi ira na kai vuravura; me bula ga ko ira na kai vuravura e na vukuna.

¹⁸ O koya sa vakabauti koya sa sega ni cudruvi: ia ko koya sa sega ni vakabauta sa qai cudruvi, ni sa sega ni vakabauta na yaca ni Luve ni Kalou, e le dua bauga sa vakatubura ko koya.

¹⁹ Ia ko koya oqo era sa cudruvi kina, ni sa lako mai na rarama ki vuravura, a ra sa vinakata na butobuto ko ira na tamata, ka cata na rarama, ni sa ca na nodrai valavala.

²⁰ Ni sa cata na rarama ko koya yadua sai valavala ca, a sa sega ni lako mai ki na rarama, de kunei na nonai valavala.

²¹ Ia ko koya sa muria nai valavala dina sa lako mai ki na rarama, me vakaraitaki na nonai valavala, ni sa vinaka vua na Kalou.

²² Ni sa oti na veika oqo, sa lako ko Jisu kei ira na nona tisaipeli ki na vanua ko Jutia; a sa tiko maikina kei ira, ka veipapitaisotaki.

²³ A sa veipapitaisotaki ko Joni talega mai Inoni sa voleka ki Selimi, ni sa levu kina na wai: a sa lako mai eso, ka ra sa papitaisotaki.

²⁴ Ni sa bera ni biu ki na vale ni veivesu ko Joni.

²⁵ Sa qai veileti ko ira na tisaipeli i Joni kei na dua na kai Jutia e na vuku ni veivakasavasavataki.

²⁶ A ra sa lako mai vei Joni, ka kaya vua, Vakavuvuli, ko koya drau a tiko kaya e na tai kadua ni Joritani, ko koya ko a tukuna, raica, sa veipapitaisotaki tiko ko koya, a sa lako mai vua ko ira na tamata kecega.

²⁷ Sa vosa ko Joni, ka kaya, E sega e dua na tamata sa rawata e dua na ka, kevaka sa sega ni soli vua mai lomalagi.

²⁸ Dou sa tukuni au niu sa kaya, Au sa sega ni Karisito koi au, ia kau sa talai mai meu liutaki koya.

²⁹ Sa nei koya na tagane sa qai vakawati ko koya na watina, ia na weka ni tagane, ko koya sa tu ka rogoca na nona vosa sa rekitaka vakalevu na domo ni tagane: sa qai vakayacori vakakina na noqu reki oqo.

³⁰ Sa dodonu me levu cake tiko ko koya, ia meu lailai sobu tiko koi au.

³¹ O koya sa lako maicake, sa uasivi vei ira kecega na tani: ko koya sa tubu ga e vuravura sa vakavuravura, a sa vosataka na ka vakavuravura: ko koya sa lako mai lomalagi sa uasivi vei ira kecega na tani.

³² Ia na ka sa raica ka rogoca ko koya, sa tukuna oqori; a sa sega e dua na tamata sa vakabauta na nonai tukutuku.

³³ O koya sa vakabauta na nonai tukutuku sa vakadinadinataka oqo, ni sa dina na Kalou.

³⁴ O koya sa tala mai na Kalou, sa vosataka na vosa ni Kalou; ni sa solia vakayauyau na Yalo Tabu na Kalou.

³⁵ Sa lomana na Luvena ko Tamana, a sa solia na ka kecega ki ligana.

³⁶ O koya sa vakabauta na Luvena, sa rawata na bula tawa mudu: ko koya sa sega ni vakabauta na Luvena, ena sega ni raica na bula; a sa tiko ga vei koya na cudru ni Kalou.