Joni 21 - Vakavakadewa Makawa

Sa rairai tale vei ira na nona tisaipeli ko Jisu, a sa kana vata kei ira, 114. Sa vakarota matua vei Pita me vakani ira na nona lami kei ira na nona sipi, 1517; a sa tukuna na mate i Pita, 18,19. Sa vunauci Pita ni sa tarogi koya e na vuku i Joni, 2024. Na kenai vakataotioti, 25.

¹ Sa oti na veika oqo, sa vakaraitaki koya tale ko Jisu vei iratou na tisaipeli mai na wai mai Taiperia: ia ka vakaraitaki koya vakaoqo:

² Eratou sa tiko vata ko Saimoni Pita, kei Tomasi, sa vakatokai ko Titimo, kei Nacanieli na kai Kena e Kalili, kei rau na luve i Sepete, ka lewe rua tale na nona tisaipeli.

³ Sa kaya vei iratou ko Saimoni Pita, Au sa laki qoli. Eratou sa kaya vua, Edatou na lako talega kei iko. Eratou sa lako yani, ka vodoka sara na waqa; a sa sega ni rawa e dua e na bogi ko ya.

⁴ Ia ni sa qai mataka mai, sa tu mai matasawa ko Jisu; ia sa sega ni kila ko ira na tisaipeli ni sai Jisu.

⁵ Sa qai kaya vei ira ko Jisu, Ragone, sa tu vei kemudou na kakana, se segai? Era sa kaya vua, Sa segai.

⁶ A sa kaya vei ira ko koya, Dou viritaka na lawa ki nai matau ni waqa, ka dou na kunea kina. Era sa qai viritaka, a ra sa sega ni yavia rawa, ni sa ka levu sara na ika.

⁷ A ka oqo sa kaya kina vei Pita na tisaipeli ko ya ka lomana ko Jisu, Na Turaga bagi oqo. Ni sa rogoca ko Saimoni Pita ni sai koya na Turaga, sa vakasulumi koya e na nonai curucuru vagonedau, (ni sa luvawale,) a sa rika ki wai.

⁸ Ia ko ira na tisaipeli tani, era sa lako e na waqa lailai; (ni sa sega ni yawa na vanua, me vaka ga na katu e limasagavulu,) a ra sa yarataka na lawa sa sinai e na ika.

⁹ Ia ni ra sa qai sobu ki vanua, era sa raica sa tu na qilaiso sa waqa tu, kei na ika sa tu kina, kei na madrai.

¹⁰ Sa kaya vei ira ko Jisu, Kauta mai eso na ika dou sa qai rawata.

¹¹ Sa lako cake ko Saimoni Pita, ka yavia na lawa ki vanua sa sinai e na ika lelevu, e dua na drau ka limasagavulu ka mani tolu; ia ni sa ka levu vakaoqo, sa sega ni bote kina na lawa.

¹² Sa kaya vei ira ko Jisu, Dou mai katalau. Ia sa sega e dua vei ira na tisaipeli sa doudou me tarogi koya, O cei koi kemuni? ni ra sa kila sai koya na Turaga.

¹³ Sa qai lako mai ko Jisu, ka taura na madrai, kei na ika talega, ka solia vei ira.

¹⁴ Sai koya oqo na kenai katolu ni gauna sa vakaraitaki koya kina ko Jisu vei ira na nona tisaipeli, ni sa tu cake tale mai na mate ko koya.

¹⁵ Ni ra sa katalau oti, sa kaya vei Saimoni Pita ko Jisu, Saimoni, na luve i Jona, ko sa lomani au vakalevu, ka vakalailai ko iratou oqo, se segai? Sa kaya vua ko koya, Io, na Turaga; ko ni sa kila niu sa lomani kemuni. Sa kaya vua ko koya, Vakani ira na noqu lami.

¹⁶ Sa kaya tale vakarua vei koya, Saimoni, na luve i Jona, ko sa lomani au, se segai? Sa kaya vua ko koya, Io, na Turaga; ko ni sa kila niu sa lomani kemuni. Sa kaya vua ko koya, Vakatawana na noqu sipi.

¹⁷ A sa kaya vakatolu vua, Saimoni, na luve i Jona, ko sa lomani au, se segai? Sa rarawa na loma i Pita ni sa kaya vakatolu vua ko koya, O sa lomani au, se segai? A sa kaya vua, Kemuni na Turaga, ko ni sa kila na ka kecega; ko ni sa kila niu sa lomani kemuni. Sa kaya vua ko Jisu, Vakani ira na noqu sipi.

¹⁸ E dina, e dina, au sa kaya vei iko, Ni ko a gone, ko a dauvauci iko, ka lako veitalia voli ga: ia ni ko na qase mai, ko na dodoka na ligamu, ka na vauci iko e dua tani, ka kauti iko ki na tikina ko na sega ni vinakata.

¹⁹ Ia sa vosa vakaoqo ko koya, me vakatakila na mate ena vakarokorokotaka kina na Kalou ko koya. Ia ni sa vosa oti vakaoqo ko koya, sa kaya vua, Muri au.

²⁰ Sa qai vuki ko Pita, ka raica na tisaipeli sa lomana ko Jisu, ni sa muri tiko, ko koya ka vakararavi talega ki na lomaserena e nai vakayakavi, ka kaya, Kemuni na Turaga, ko cei ko koya ena soli iko yani?

²¹ Ni sa raici koya ko Pita, sa kaya vei Jisu, Na Turaga, ena vakaevei ko koya oqo?

²² Sa kaya vua ko Jisu, Kevaka kau sa vinakata me bula tikoga ko koya ka yacova na siga kau na lako tale mai kina, a cava oqo vei iko? ko iko, mo muri au.

²³ Sa qai rogo yani vei ira na veiwekani na vosa oqo, ni na sega ni mate na tisaipeli ko ya: ia ka sega ni kaya vua ko Jisu, Ena sega ni mate ko koya: sa kaya ga, Kevaka kau vinakata me bula tikoga ko koya ka yacova na siga kau na lako tale mai kina, a cava oqo vei iko?

²⁴ Sai koya oqo na tisaipeli sa tukuna na veika oqo, ka vola na veika oqo: ia eda sa kila sa dina na nonai tukutuku.

²⁵ Sa vuqa talega na ka tani sa cakava ko Jisu, ia kevaka sa volai kecega, au sa vakasama ni na oso ko vuravura e na veivola ena volai. Emeni.