Joni 19 - Vakavakadewa Makawa

Sa vakanakuitataki ka vakaisalataki e na wa-vakavotona ko Jisu, 13. Sa via sereki koya ko Pailato, ia ni ra sa ue mai na kai Jutia, sa soli koya yani, a ra sa vakoti koya ki na kauveilatai, 437. Erau sa buluta ko Josefa kei Nikotimo, 3842.

¹ A sa qai kauti Jisu ko Pailato, ka vakanakuitataka.

² A sa talia e dua nai sala wa-vakavotona ko ira na sotia, ka vakaisalataki koya kina, a ra sa vakasulumi koya e na dua nai sulu lokaloka,

³ ka kaya, Sa loloma, na nodra Tui na kai Jutia! a ra sa sabici koya e na ligadra.

⁴ Sa qai curu tale yani ko Pailato, ka kaya vei ira, Raica, au sa kauti koya mai vei kemudou, mo dou kila niu sa sega ni kunea e dua nai valavala ca vei koya.

⁵ Sa qai curu yani ko Jisu, sa vakaisala tu e nai sala wa-vakavotona, ka vakaisulu e nai sulu lokaloka. A sa kaya vei ira ko Pailato, Raica na tamata!

⁶ Ni ra sa qai raici koya ko ira na bete levu kei ira na ovisa, era sa qoqolou, ka kaya, Vakota ki na kauveilatai, vakota ki na kauveilatai. Sa kaya vei ira ko Pailato, Dou kauti koya ka vakota ki na kauveilatai: niu sa sega ni kunea vua e dua nai valavala ca.

⁷ Ko ira na kai Jutia era sa kaya vua, Sa dua na neimami vunau, ka sa dodonu e na neimami vunau me mate ko koya, ni sa tukuni koya me Luve ni Kalou.

⁸ Ni sa qai rogoca na vosa oqo ko Pailato, sa levu cake kina na nona rere;

⁹ a sa curu tale ki na vale ni veilewai, ka kaya vei Jisu, O sa lako maivei? Ia sa sega ni vosa vua ko Jisu.

¹⁰ Sa qai kaya vua ko Pailato, O sa sega li ni vosa mai vei au? ko sa sega beka ni kila niu sa rawata meu vakoti iko ki na kauveilatai, kau sa rawata talega meu sereki iko?

¹¹ Sa kaya ko Jisu, Ko sa sega ni rawata e dua na ka vei au, kevaka sa sega ni soli vei iko maicake: a ka oqo sa levu cake kina na nonai valavala ca sa soli au yani vei iko.

¹² Sa qai vakatovolea tiko ko Pailato me sereki koya: ia ko ira na kai Jutia, era sa qoqolou, ka kaya, Kevaka ko sa sereki koya oqo, ko sa sega ni totaki Sisa: ko koya yadua sa tukuni koya me tui, sa vosa vakacacataki Sisa.

¹³ Ni sa qai rogoca na vosa oqo ko Pailato, sa kauti Jisu yani, ka tiko sobu e nai tikotiko ni veilewai e na tikina sa vakatokai Na Raravatu, ia e na vosa vaka-Iperiu, ko Kapaca:

¹⁴ a siga oqo nai Vakarau ki na kana vata ni lako-sivia, ia sa kenai kaono ni aua: a sa kaya vei ira na kai Jutia ko koya, Raica na nomudou Tui!

¹⁵ A ra sa qoqolou, Kauta tani, kauta tani, vakoti koya ki na kauveilatai. Sa kaya vei ira ko Pailato, Meu vakota li ki na kauveilatai na nomudou Tui? Ko ira na bete levu era sa kaya, Sa sega na neimami tui, ko Sisa duaduaga.

¹⁶ Sa qai soli koya yani vei ira ko koya me vakoti ki na kauveilatai. A ra sa kauti Jisu, ka tuberi koya yani.

¹⁷ A sa colata na nona kauveilatai ko koya, ka lako yani ki na tikina sa vakatokai Na vanua ni qavokavoka, a sa vakatokai e na vosa vaka-Iperiu, ko Kolikoca:

¹⁸ a ra sa vakoti koya maikina ki na kauveilatai, ka lewe rua vata kaya, e dua vaka, ka dua vaka, kei Jisu e na kedrau maliwa.

¹⁹ A sa dua nai vakatakilakila sa vola ko Pailato, ka sa toka ecake e na kauveilatai. Sai koya oqo na kenai vola, KO JISU NA KAI NASARECI NA NODRA TUI NA KAI JUTIA.

²⁰ A ra sa lewe vuqa na kai Jutia era sa wilika nai vakatakilakila oqo: ni sa voleka ki na koro na tikina sa vakoti kina ki na kauveilatai ko Jisu: a sa volai tu e na vosa vaka-Iperiu, kei na vosa va-Kirisi, kei na vosa vaka-Roma.

²¹ Era sa qai kaya vei Pailato ko ira na nodra bete levu na kai Jutia, Kakua ni vola, A nodra Tui na kai Jutia; ia ni sa kaya ko koya, Oi au na nodra Tui na kai Jutia.

²² Sa kaya ko Pailato, A ka kau sa vola, kau sa vola.

²³ Ia ko ira na sotia, ni ra sa vakoti Jisu ki na kauveilatai, era sa kauta na nonai sulu, ka wasea vakava, me ra tauyadua na tikina ko ira na sotia; nai tutuvi talega; ia ka sa sega ni bau cula na nonai tutuvi, sa tali taucoko mai na tikina ecake ka kauta kira.

²⁴ O koya era sa veikayaka kina, Me da kakua ni dresuka, ia me da vakawiri madigi, se na nei cei: me vakayacori kina nai Vola Tabu, o koya sa kaya, Era sa vota na noqui sulu, Ia na noqui tutuvi era vakawiri madigi kina. Ko ira na sotia, era sa kitaka na veika oqo.

²⁵ Ia sa tu voleka ki na kauveilatai i Jisu na tinana, kei na taci i tinana, ko Meri na wati i Kilopa, kei Meri na yalewa ni Makitala.

²⁶ Ni sa qai raici rau ko Jisu, na tinana, kei na tisaipeli ka tu voleka, ko koya sa lomana ko koya, sa kaya vei tinana, Yalewa, raica na luvemu!

²⁷ Sa qai kaya vua na tisaipeli, Raici tinamu! Ia mai na tiki-ni-siga ko ya sa kauti koya na tisaipeli ko ya ki nona vale.

²⁸ Ni sa oti oqo, ka sa kila ko Jisu sa oti na ka kecega, me vakayacori kina nai Vola Tabu, sa kaya, Au sa viagunu.

²⁹ Ia ka tu e dua na bilo sa sinai e na wai wiwi; a ra sa vakasuasuataka e dua na vutovuto e na wai wiwi, ka ciqira ki na dua na taba ni isopi, ka vakauta ki na gusuna.

³⁰ Ni sa qai gunuva na wai wiwi ko Jisu, sa kaya, Sa oti: a sa vakacuva na uluna, ka solia yani na yalona.

³¹ Ia ko ira na kai Jutia, era sa masuti Pailato me musuki na yavadratou ka me ratou kau tani, e na vuku ni sa siga Vakarau, me kakua ni rube tu na yagodratou e na kauveilatai e na siga ni vakacecegu, (ni sa uasivi na siga ni vakacecegu ko ya.)

³² Sa qai lako ko ira na sotia, ka musuka na yavana nai kadua, a yavana talega na kenai karua, eratou a vakoti vata kaya ki na kauveilatai.

³³ Ia ni ratou sa lako mai vei Jisu, ka raica sa mate sara tu, era sa sega ni musuka na yavana:

³⁴ ia sa suaka na sarisarina e dua na sotia e na dua na moto, a sa dave sara maikina na dra kei na wai.

³⁵ Ia ko koya ka raica sa tukuna, a sa dina na nonai tukutuku: a sa kila ko koya ni sa vosa dina, mo dou vakabauta.

³⁶ Ni sa caka na veika oqo, me vakayacori kina nai Vola Tabu, Me kakua ni musuki e dua na suina.

³⁷ Ia e dua tale na tiki ni Vola Tabu sa kaya, Era na raici koya era sa suaka.

³⁸ Ia ni sa oti na veika oqo, sa masuti Pailato ko Josefa, na kai Arimacea, a tisaipeli i Jisu, ia ka vuni ga ni sa rerevaki ira na kai Jutia, me kauta tani ko koya na yago i Jisu: a sa vakatara ko Pailato. Sa qai lako ko koya, ka kauta tani na yago i Jisu.

³⁹ A sa lako talega mai ko Nikotimo, ko koya sa lako eliu vei Jisu e na bogi, a sa kauta mai na mura kei na yasiyasi sa veiwaki vata, e dua na drau na paudi.

⁴⁰ Erau sa qai kauta na yago i Jisu, ka solega vata e nai sole lineni eso kei na ka boi vinaka, me vaka nai valavala ni nodra veibulu na kai Jutia.

⁴¹ Ia sa dua na were e na tikina sa vakoti kina ki na kauveilatai ko koya; ka sa dua nai bulubulu vou e na were, sa sega ni bulu kina e dua na tamata.

⁴² Erau sa qai buluti Jisu kina, ni sa nodra siga Vakarau na kai Jutia; (ka ni sa voleka nai bulubulu.)