Joni 17 - Vakavakadewa Makawa

Sa masuti Tamana ko Jisu me vakarokorokotaki koya, 15. Sa masulaki ira na nona tisaipeli, 619. Sa masulaki ira kecega era na vakabauti koya, 2026.

¹ Sa vosataka na vosa oqo ko Jisu, ka ta cake ki lomalagi, ka kaya, I Tamaqu, sa yaco mai na gauna: vakarokorokotaka na Luvemu me vakarokorokotaki kemuni talega na Luvemu,

² me vaka ko ni sa solia vua me lewa vei ira na tamata kecega, me solia ko koya na bula tawa mudu vei ira yadua ko ni sa solia vua.

³ Ia sai koya oqo na bula tawa mudu, me ra kilai kemuni na Kalou dina duaduaga, kei Jisu Karisito ko koya ko ni a tala mai.

⁴ Au sa vakarokorokotaki kemuni e vuravura: niu sa vakaotia na cakacaka ko ni a solia mai vei au meu kitaka.

⁵ Ia oqo, Tamaqu, ni vakarokorokotaki au me daru tiko vata, e na vakarokoroko sa tu vei au ni daru a tiko vata ni sa sega ni caka ko vuravura.

⁶ Au sa vakatakila na yacamuni vei ira na tamata ko ni sa solia mai vei au mai vuravura: era sa nomuni, ia ko ni sa soli ira mai vei au: a ra sa talairawarawa ki na nomuni vosa.

⁷ Era sa qai kila sa taka maivei kemuni na ka kecega ko sa solia mai vei au:

⁸ niu sa solia vei ira na vosa ko ni a solia mai vei au; a ra sa vakabauta, ka kila dina niu sa lako maivei kemuni, ka ra sa vakadinata ni kemuni a talai au mai.

⁹ Au sa masulaki ira: au sa sega ni masulaki vuravura, ko ira ga ko sa solia mai vei au; ni ra sa nomuni.

¹⁰ A sa nomuni na noqu ka kece, a sa noqu na nomuni ka kece; ia kau sa vakarokorokotaki e na vukudra.

¹¹ Ia kau na sega ni tiko e vuravura, ia ko ira oqo, era sa tiko e vuravura, ia koi au, kau sa lako yani vei kemuni. Tamaqu yalododonu, maroroi ira e na yacamuni, ko ira ko ni a solia mai vei au, me ra dua bauga me vakataki kedaru.

¹² Niu a tiko vata kei ira e vuravura, au a daumaroroi ira e na yacamuni: ko ira ko ni sa solia mai vei au kau sa maroroya, a sa sega ni yali e dua vei ira, ko koya ga sa dodonu me rusa; me vakayacori kina nai Vola Tabu.

¹³ Au sa qai lako yani vei kemuni: ia na veika oqo kau sa vosataka e vuravura, me levu sara na nodra marau e na vukuqu.

¹⁴ Au sa solia vei ira na nomuni vosa; a sa cati ira ko vuravura, ni ra sa sega ni vakavuravura, me vaka kau sa sega ni vakavuravura.

¹⁵ Au sa sega ni masu mo ni kauti ira tani e vuravura, mo ni maroroi ira ga mai na vu-ni-ca.

¹⁶ Era sa sega ni vakavuravura, me vaka kau sa sega ni vakavuravura.

¹⁷ Vakatabui ira e na nomuni vakavuvuli dina: sa ka dina na nomuni vosa.

¹⁸ Me vaka ko ni a talai au ki vuravura, au sa talai ira vaka talega kina ki vuravura,

¹⁹ Ia kau sa vakatabui au e na vukudra, me ra vakatabui talega e nai vakavuvuli dina.

²⁰ Ia kau sa sega ni masu e na vukudra walega oqo, ia e na vukudra talega era na vakabauti au e na vuku ni nodra vosa:

²¹ me ra dua bau kecega; me vaka edaru sa dua bau, Tamaqu, me ra dua bau kei kedaru: me vakadinata ko vuravura ni kemuni sa talai au mai.

²² Ia na vakarokoroko ko ni a solia mai vei au, kau sa solia vei ira; me ra dua bau, me vaka edaru sa dua bau:

²³ meu tu vei ira, ka mo ni tu vei au, me ra vakayacori sara me ra dua bauga; ia me kila kina ko vuravura ni kemuni sa talai au mai, ka ni kemuni sa lomani ira me vaka ko ni sa lomani au.

²⁴ I Tamaqu, au sa vinakata me ra tiko talega kei au e na vanua kau sa tiko kina, ko ira ko ni sa solia vei au; me ra raica na noqui ukuuku ko ni a solia mai vei au: ni kemuni a lomani au ni sa sega ni tekivu ko vuravura.

²⁵ I Tamaqu yalododonu, sa sega ni kilai kemuni ko vuravura: ia kau sa kilai kemuni, a ra sa kila ko ira oqo ni kemuni sa talai au mai.

²⁶ Ia kau sa vakatakila vei ira na yacamuni, ia kau na vakatakila tiko: me tu vei ira na loloma ko ni a lomani au kina, meu tiko talega kei ira.