Joni 16 - Vakavakadewa Makawa

Sa tukuna vei ira na nona tisaipeli ko Jisu ni ra na vakacacani e na vukuna, a sa yalataka vei ira na Dauveivakacegui, 115. Sa tukuna talega ni na mate, ka bula tale mai na mate, ka lako cake vei Tamana; ka sa kaya ena vakacegui ira ni ra sa vakacacani, 1633.

¹ Au sa vosataka na veika oqo vei kemudou, mo dou kakua ni vakatarabetaki.

² Era na vakatatabui kemudou mai na veivale ni lotu: ia ena yaco mai na gauna, era na nanuma kina ko ira yadua sa vakamatei kemudou ni ra sa qarava kina na Kalou.

³ Ia na veika oqo era na kitaka vei kemudou, ni ra sa sega ni kilai Tamaqu se koi au.

⁴ Ia na veika oqo kau sa tukuna vei kemudou, ka ni sa yaco mai na gauna, dou na nanuma kina niu a tukuna vei kemudou. Kau a sega ni tukuna eliu vei kemudou na veika oqo, e na vuku niu a tiko vata kei kemudou.

⁵ Ia kau sa qai lako yani vei koya sa talai au mai; a sa sega mada ni tarogi au e dua vei kemudou, O sa lako kivei?

⁶ Ia niu sa tukuna vei kemudou na veika oqo, sa luvu e na rarawa na lomamudou.

⁷ Ia kau sa tukuna vei kemudou na ka dina: E yaga vei kemudou meu lako yani: ni na sega ni lako mai vei kemudou na Dauveivakacegui, kevaka kau sa sega ni lako yani: ia kevaka kau sa lako yani, kau na talai koya kivei kemudou.

⁸ Ia ni sa lako mai ko koya, ena vakatakila kivei ira na kai vuravura nai valavala ca; kei na ka dodonu, kei na lewa:

⁹ Ai valavala ca, ni ra sa sega ni vakabauti au;

¹⁰ kei na ka dodonu, niu sa lako vei Tamaqu, ka dou sa sega ni raici au tale;

¹¹ kei na lewa, ni sa lewai na turaga ni vuravura oqo.

¹² Sa vuqa na ka sa vo meu tukuna vei kemudou, ia dou sa sega ni rawata edaidai.

¹³ Ia ni sa lako mai ko koya, na Yalo Tabu na vu ni ka dina, ena tuberi kemudou ki na ka kecega e dina: ni na sega ni vosa vakataki koya: ia na ka kecega ena rogoca, ena vosataka: ka na vakatakila vei kemudou na veika ena yaco maimuri.

¹⁴ Ena vakarokorokotaki au ko koya: ni na kauta na noqu ka, ka vakatakila vei kemudou.

¹⁵ Sa noqu na ka kecega sa nei Tamaqu: a ka oqo kau a kaya kina, ni na kauta ko koya na noqu ka, ka vakatakila vei kemudou.

¹⁶ Sa vo e lailai, dou na qai sega ni raici au; ka vo tale e lailai, dou na qai raici au; ka niu sa lako vei Tamaqu.

¹⁷ Ka so vei ira na nona tisaipeli era kaya kina vakai ira, A cava na ka oqo sa kaya vei keda ko koya, Sa vo e lailai, dou na qai sega ni raici au: ka vo tale e lailai, dou na qai raici au: ka, niu sa lako vei Tamaqu?

¹⁸ A ka oqo era sa kaya kina, A cava na ka oqo sa kaya ko koya, Sa vo e lailai? eda sa sega ni kila na ka sa kaya ko koya.

¹⁹ A sa kila ko Jisu ni ra sa via tarogi koya, sa qai kaya vei ira, Dou sa veitarogi li e na ka kau a kaya, Sa vo e lailai, dou na qai sega ni raici au: ka vo tale e lailai, dou na qai raici au?

²⁰ E dina, e dina, au sa kaya vei kemudou, Dou na tagi ka tagiyaso, ia ko vuravura ena reki: ena rarawa na lomamudou, ia na rarawa ni lomamudou ena vuki me reki.

²¹ Ni sa taratara na yalewa sa rarawa, e na vuku ni sa yaco na nona siga: ia ni sa sucu na gone, sa sega ni nanuma tale na rarawa, e na vuku ni marau ni sa sucu mai e dua na tamata ki vuravura.

²² Ia sa qai rarawa na lomamudou: ia kau na raici kemudou tale, ena qai reki na lomamudou, a sa sega e dua ena kovea na nomudou marau.

²³ Ia e na siga ko ya dou na sega ni tarogi au e na dua na ka. E dina, e dina, au sa kaya vei kemudou, A ka kecega dou na kerea vei Tamaqu e na yacaqu, ena solia vei kemudou ko koya.

²⁴ Dou a sega ni kerea eliu e dua na ka e na yacaqu: dou kerekere, dou na qai rawata, me levu sara na nomudou marau.

²⁵ Au a tukuna vei kemudou na veika oqo e na vosa vakatautauvata: ia sa na lako mai na gauna kau na sega tale ni vosa vei kemudou e na vosa vakatautauvata, kau na vakatakila vakamacala vei kemudou na veika nei Tamaqu.

²⁶ E na siga ko ya dou na kerekere e na yacaqu; ia sa sega ni yaga meu tukuna vei kemudou, niu na masuti Tamaqu e na vukumudou;

²⁷ ni sa lomani kemudou na Tamaqu, ni dou sa lomani au, ka vakadinata niu sa lako mai vua na Tamaqu.

²⁸ Au sa lako mai vei Tamaqu, ka lako mai ki vuravura; au sa biuti vuravura tale, ka lako vei Tamaqu.

²⁹ Sa kaya vua ko ira na nona tisaipeli, Raica, ko sa qai vosa vakamacala, ka sega ni vosataka na vosa vakatautauvata.

³⁰ Keitou sa qai kila ko sa kila na ka kecega, ka sega ni yaga vua e dua na tamata me tarogi iko: na ka oqo keitou sa vakadinata kina ni ko sa lako mai vua na Kalou.

³¹ Sa kaya vei ira ko Jisu, Dou sa qai vakabauta, ne?

³² Raica, sa lako mai na gauna, io, sa qai yaco mai, dou na dui veiseyaki kina, a tamata yadua ki nona vale, ka dou na laivi au meu tiko duaduaga: ia kau sa sega ni tiko duaduaga ni keirau sa tiko vata kei Tamaqu.

³³ A veika oqo kau sa tukuna vei kemudou, mo dou rawata na vakacegu e na vukuqu. Dou na kunea e vuravura na rarawa; ia mo dou vakacegu; au sa vakamalumalumutaki vuravura.