Joni 15 - Vakavakadewa Makawa

Sa vakatautauvatataki koya ko Jisu kei na vaini, kei na nona tisaipeli me vaka na veitaba ni vaini, 1?11. Sa vakaroti ira me ra veilomani, 12?17. Sa tukuna ni na vakacacani ira ko vuravura e na vukuna, 18?25. Sa yalataka vei ira na Yalo Tabu me Dauveivakacegui, 26?27.

¹ Koi au na vaini dina, ka sai vakatau-ni-were ko Tamaqu.

² A tabaqu kecega sa sega ni vua, sa kauta laivi yani ko koya: ia na tabaqu kecega sa vua, sa samaka ko koya, me vua vakalevu sara.

³ Dou sa qai samaki e na vuku ni vosa kau a vosataka vei kemudou.

⁴ Dou tu vei au, kau na tu vei kemudou. Me vaka sa sega ni vua rawa na tabana vakai koya, kevaka sa sega ni tu vata kei na vaini; ena vaka talega kina koi kemudou, kevaka dou sa sega ni tu vei au.

⁵ Oi au na vaini, koi kemudou na tabaqu: ko koya sa tu vei au, koi au talega vei koya, sa vua vakalevu: ke dou sa tawase tani vei au, dou sa sega ni rawata e dua na ka.

⁶ Kevaka sa sega ni tu vei au e dua, sa biu laivi me vaka na taba ni vaini, a sa malai; a ra sa tomika, ka biuta ki na bukawaqa, ka visa.

⁷ Kevaka dou sa tu vei au, ka sa tu vei kemudou na noqu vosa, dou na kerea na ka dou sa vinakata, ia ena yaco vei kemudou.

⁸ A ka oqo sa vakarokorokotaki kina ko Tamaqu, ni dou sa vua vakalevu: ka dou na qai noqu tisaipeli.

⁹ Me vaka sa lomani au ko Tamaqu, au sa lomani kemudou vaka talega kina: dou tiko ga e na noqu loloma.

¹⁰ Kevaka dou sa talairawarawa ki na noqu vunau, dou na tiko ga e na noqu loloma; me vaka kau sa talairawarawa ki na vunau nei Tamaqu, ka tiko ga e na nona loloma.

¹¹ Au sa vosataka na veika oqo vei kemudou, meu sa marau tikoga e na vukumudou; ka me sinai na nomudou marau.

¹² Sa noqu vunau oqo, Mo dou veilomani, me vaka kau sa lomani kemudou.

¹³ Sa sega na nona loloma e dua na tamata me uasivi cake e na ka oqo, me solia na nona bula e na vukudra na wekana.

¹⁴ Dou sa wekaqu, kevaka dou sa kitaka na ka kecega kau sa vakarota vei kemudou.

¹⁵ Au sa sega ni vakatokai kemudou tale me noqu tamata: ni sa sega ni kila na tamata na ka sa kitaka na nona turaga; ia kau sa vakatokai kemudou me wekaqu; niu sa vakatakila vei kemudou na ka kecega kau a rogoca maivei Tamaqu.

¹⁶ Dou sa sega ni digitaki au, ia kau sa digitaki kemudou, ka lesi kemudou, mo dou lako ka vua, ka me tiko talega na vuamudou; me solia kina vei kemudou ko Tamaqu na ka kecega dou na kerea vua e na yacaqu.

¹⁷ A veika oqo kau sa vakarota vei kemudou, mo dou veilomani.

¹⁸ Kevaka sa cati kemudou ko vuravura, dou sa kila ni ra sa cati au eliu, era sa cati kemudou emuri.

¹⁹ Kevaka dou sa vakavuravura, ena lomana na kai nona ko vuravura; ia ni dou sa sega ni vakavuravura, ka niu sa digitaki kemudou mai vuravura, sai koya oqo sa cati kemudou kina ko vuravura.

²⁰ Dou nanuma na vosa kau a vosataka vei kemudou, Sa sega ni levu na tamata ka lailai na nona turaga. Kevaka era a vakacacani au, era na vakacacani kemudou talega; kevaka era sa talairawarawa ki na noqu vosa, era na talairawarawa talega ki na nomudou vosa.

²¹ Ia na ka kecega oqo era na kitaka vei kemudou e na vuku ni yacaqu, ni ra sa sega ni kilai koya ka talai au mai.

²² Kevaka kau a sega ni lako mai ka vosa vei ira, sa qai sega na nodrai valavala ca: ia sa qai sega na nodra ulubale e na nodrai valavala ca.

²³ O koya sa cati au, sa cati Tamaqu talega.

²⁴ Kevaka kau a sega ni kitaka vei ira na cakacaka sa sega ni kitaka e dua na tamata tani, sa sega na nodrai valavala ca: ia era sa qai raica, ka cati au kei Tamaqu talega;

²⁵ me vakayacori kina na vosa ka volai e na nodra vunau, Era sa cati au walega.

²⁶ Ia ni sa lako mai na Dauveivakacegui, ko koya kau na tala vei kemudou maivei Tamaqu, a Yalo Tabu sa vu ni ka dina, ko koya sa lako maivei Tamaqu, ena tukuni au ko koya.

²⁷ Ia dou na dautukutuku talega koi kemudou, ni dou sa tiko vata kei au mai nai vakatekivu