Joni 14 - Vakavakadewa Makawa

Sa tukuna vei ira na nona tisaipeli ko Jisu nai balebale ni nona lako yani vei Tamana; a sa yalayala me solia na ka kecega era na kerea e na yacana, 114. Sa yalataka ko Jisu na Yalo Tabu me vakacegui ira ka vakatavulici ira, 1526. Sa vakacegui ira na nona tisaipeli ko Jisu, ni sa voleka ni lako yani vei Tamana, 2731.

¹ Me kakua ni rarawa na lomamudou: dou sa vakabauta na Kalou; dou vakabauti au talega.

² Sa vuqa na tikina e na vale nei Tamaqu: kevaka sa sega, au sa tukuna vei kemudou. Ni kau sa lako meu vakarautaka na tikina me nomudou.

³ Ia kevaka kau sa lako ka vakarautaka na tikina me nomudou, au na lako tale mai, ka kauti kemudou vei au; mo dou tiko talega e na vanua kau sa tiko kina.

⁴ Ia dou sa kila na vanua kau sa lako kina, dou sa kila talega na kena sala.

⁵ Sa kaya vua ko Tomasi, Kemuni na Turaga, keitou sa sega ni kila se ko ni sa lako kivei: ia keitou kila rawa vakaevei na sala?

⁶ Sa kaya vua ko Jisu, Oi au na sala, kei na vu ni dina, kei na vu-ni-bula; sa sega ni torovi Tamaqu walega e dua na tamata, e na vukuqu ga.

⁷ Kevaka dou sa kilai au, dou sa kilai Tamaqu talega; ia mai na siga oqo dou sa kilai koya, ka raici koya.

⁸ Sa kaya vua ko Filipi, Turaga, vakatakilai Tamamuni vei keitou; keitou na qai vakacegu.

⁹ Sa kaya vua ko Jisu, Niu sa tiko dede vakaoqo kei kemudou, ko sa sega li ni kilai au, Filipi? ko koya sa raici au, sa raici Tamaqu: ia ko sa kaya vakacava, Vakatakilai Tamamu vei keitou?

¹⁰ O sa sega li ni vakadinata niu sa dua vata kei Tamaqu, a sa dua vata kei au ko Tamaqu? a vosa kau sa vosataka vei kemudou, kau sa sega ni vosataka vakai au ga; ia ko Tamaqu keirau sa dua vata kaya, sa kitaka na cakacaka.

¹¹ Dou vakadinati au niu sa dua vata kei Tamaqu, a sa dua vata kei au ko Tamaqu, se vakadinati au e na vuku ni cakacaka ga.

¹² E dina, e dina, au sa kaya vei kemudou, O koya sa vakabauti au, ena kitaka talega na cakacaka kau sa kitaka, ia ena kitaka na cakacaka e uasivi cake e na ka oqo; e na vuku niu sa lako vei Tamaqu.

¹³ Ia na ka kecega dou na kerea e na yacaqu, au na kitaka, me vakarokorokotaki na Tamaqu ena vuku ni Luvena.

¹⁴ A ka kecega dou na kerea e na yacaqu, au na kitaka.

¹⁵ Kevaka dou sa lomani au, dou talairawarawa ki na noqu vunau.

¹⁶ Ia kau na masuti Tamaqu, ena qai solia vei kemudou e dua tale na Dauveivakacegui, me tiko ga kei kemudou ka sega ni mudu;

¹⁷ a Yalo Tabu sa vu ni ka dina, ko koya era sa sega ni vakabauta rawa na kai vuravura, ni ra sa sega ni raici koya se kilai koya: ia sai kemudou ga sa kilai koya: ni sa tiko vata kei kemudou ko koya, ka na curumi kemudou.

¹⁸ Au na sega ni laivi kemudou mo dou luveniyali: au na lako mai vei kemudou.

¹⁹ Malua mada vakalailai, era na qai sega ni raici au tale na kai vuravura: ia dou sa raici au: niu sa bula, dou na bula talega.

²⁰ E na siga ko ya dou na kila niu sa dua vata kei Tamaqu, ka dou sa dua vata kei au, kau sa dua vata kei kemudou.

²¹ Ko koya sa nanuma na noqu vunau ka talairawarawa kina, sai koya oqo sa lomani au; ia ko koya sa lomani au ena lomani koya ko Tamaqu, ia kau na lomani koya, ka vakatakilai au vua.

²² Sa kaya vua ko Jutasa, (e dua tani ko Isikarioti,) Kemuni na Turaga, ko ni na vakatakilai kemuni vei keitou e na vuku ni cava, ka segai vei ira na kai vuravura?

²³ Sa vosa ko Jisu, ka kaya vua, Kevaka sa lomani au e dua, ena talairawarawa ki na noqu vosa; ena qai lomani koya ko Tamaqu, ia keirau na lako mai kivei koya, ka tiko ga vua.

²⁴ O koya sa sega ni lomani au, sa sega ni talairawarawa ki na noqu vosa: ia na vosa dou sa rogoca, sa sega ni noqu walega, sa nei Tamaqu sa talai au mai.

²⁵ Au sa vosataka na veika oqo vei kemudou, niu sa tiko vata kei kemudou.

²⁶ Ia na Dauveivakacegui, na Yalo Tabu, ko koya ena tala mai ko Tamaqu e na yacaqu, ena vakavulici kemudou e na ka kecega kau a vosataka vei kemudou.

²⁷ Au sa laiva vei kemudou na vakacegu, au sa solia vei kemudou na noqu vakacegu; au sa sega ni solia vei kemudou, me vaka sa solia ko vuravura. Me kakua ni rarawa na yalomudou, se rere.

²⁸ Dou a rogoca niu a kaya vei kemudou, Au sa lako yani, ka lako tale mai vei kemudou. Kevaka dou sa lomani au, dou na reki niu sa lako vei Tamaqu: ni sa uasivi cake vei au ko Tamaqu.

²⁹ Au sa qai tukuna eliu vei kemudou ni sa bera ni yaco mai, mo dou vakadinata e na gauna sa yaco kina.

³⁰ E na veisiga emuri au na sega ni veivosaki vakalevu kei kemudou: ni sa lako mai na turaga ni vuravura oqo, a sa sega ni kunea e dua na ka vei au.

³¹ Ia me kila ga ko ira na kai vuravura niu sa lomani Tamaqu, ia me vaka sa vosa vei au ko Tamaqu, au sa kitaka vakakina. Tu cake, tou lako yani.