Joni 13 - Vakavakadewa Makawa

Sa vuya na yavadra na nona tisaipeli ko Jisu, 120. Sa vakatakila vei ira, ni na soli koya yani ko Jutasa, 2130. Sa vakaroti ira na nona tisaipeli me ra veilomani, 3135. Sa vakatakila ko koya ni na cakitaki koya ko Pita, 3638.

¹ Ia ni sa bera na kana vata ni lako-sivia, ka sa kila ko Jisu sa yaco mai na nona gauna me lako tani yani e vuravura oqo vua na Tamana, ka ni sa lomani ira na nona era sa tiko e vuravura, sa lomani ira ki nai otioti.

² Ia ni ra sa vakayakavi tiko, ni sa vakatubura oti na tevoro e na loma i Jutasa Isikarioti, na luve i Saimoni, me soli koya yani;

³ a sa kila ko Jisu ni sa solia ko Tamana na ka kecega ki na ligana, ka ni sa lako mai vua na Kalou ko koya, a sa lako tale yani vua na Kalou;

⁴ sa tu cake mai nai vakayakavi, ka luvata na nonai sulu, ka kauta mai e dua nai solo, ka vauca ki tolona.

⁵ Ni sa oti oqo sa livia na wai ki na dari, ka vakatekivu me vuya na yavadra na tisaipeli, ka solota e nai solo sa vau ki tolona.

⁶ Sa qai lako mai ko koya vei Saimoni Pita: a sa kaya vua ko koya, Noqu Turaga, ko ni sa vuya li na yavaqu?

⁷ Sa vosa ko Jisu, ka kaya vua, A ka kau sa kitaka ko sa sega ni kila edaidai; ia maimuri ga ko na kila.

⁸ Sa kaya vua ko Pita, Kemuni na sega sara ni vuya na yavaqu. Sa kaya vua ko Jisu, Kevaka kau sa sega ni vui iko, ko sa sega ni rawata e dua na ka vei au.

⁹ Sa kaya vua ko Saimoni Pita, Noqu Turaga, me segai walega na yavaqu, a ligaqu talega kei na uluqu.

¹⁰ Sa kaya vua ko Jisu, Ko koya sa sili oti, sa yaga vua me vuya na yavana ga, a sa savasava taucoko: ia dou sa savasava, ka dou sa segai kece:

¹¹ ni sa kilai koya ena soli koya yani: a ka oqo sa kaya kina ko koya, Dou sa sega ni savasava kece.

¹² Ni sa qai vuya oti na yavadra, ka sulumaka tale na nonai sulu, sa tiko sobu tale, ka kaya vei ira, Dou sa kila na ka kau sa kitaka vei kemudou, se segai?

¹³ Dou sa vakatokai au meu i Vakavuvuli, meu Turaga talega: ia dou sa vosa dina; niu sa vakakina.

¹⁴ Ia kevaka kau sa vuya na yavamudou, koi au na Turaga kei nai Vakavuvuli, sa dodonu talega mo dou veivui yava:

¹⁵ niu sa solia e dua nai vakarau vei kemudou, mo dou kitaka me vaka kau sa kitaka oti vei kemudou.

¹⁶ E dina, e dina, au sa kaya vei kemudou, Sa sega ni levu na tamata ka lailai na nona turaga; se levu ko koya sa talai ka lailai ko koya sa talai koya.

¹⁷ Kevaka dou sa kila na veika oqo, dou sa kalougata kevaka dou sa kitaka.

¹⁸ Au sa sega ni vosataki kemudou kecega: au sa kilai ira kau sa digitaka; ia me vakayacori kina nai Vola Tabu, O koya keirau sa kana madrai vata kaya, sa leqeti au e nai bukubuku-ni-yavana.

¹⁹ Au sa qai tukuna vei kemudou ni sa bera ni yaco mai; mo dou vakabauta ni sai au, ni sa yaco mai.

²⁰ E dina, e dina, au sa kaya vei kemudou, O koya sa vakacegui ira yadua kau sa tala, sa vakacegui au; ia ko koya sa vakacegui au, sa vakacegui koya sa talai au mai.

²¹ Ni sa vosa oti vakaoqo ko Jisu, sa rarawa na lomana, a sa vakatakila, ka kaya, E dina, e dina, au sa kaya vei kemudou, sa dua vei kemudou ena soli au yani.

²² Era sa qai veivakaraici na tisaipeli, ni ra sa lecava se vosataki cei ko koya.

²³ A sa vakararavi e na lomasere i Jisu e dua vei ira na nona tisaipeli, ko koya sa lomana ko Jisu.

²⁴ Sa qai deguvacutaki koya ko Saimoni Pita, me taroga se vosataki cei ko koya.

²⁵ Ia ko koya sa vakararavi e na lomasere i Jisu, sa kaya vua, Kemuni na Turaga, ko cei beka ko ya?

²⁶ Sa kaya ko Jisu, Sai koya kau na solia vua na tiki ni madrai niu sa tokoca. Ia ni sa tokoca oti na tiki ni madrai, sa solia vei Jutasa Isikarioti, na luve i Saimoni.

²⁷ Ia ni sa oti na tiki ni madrai, sa qai curumi koya ko Setani. Sa qai kaya vua ko Jisu, A ka ko sa kitaka, kitaka kusarawa.

²⁸ Sa sega ni kila e dua vei ira sa tiko me kana, se cava sa vosa kina vakaoqo vua ko koya.

²⁹ Era vakasama eso, ni sa taura na taga i lavo ko Jutasa, sa kaya vua ko Jisu, Volia na veika ena yaga vei keda e na kana vata; se me solia na ka eso vei ira era dravudravua.

³⁰ Ni sa qai taura oti na tiki ni madrai ko koya, sa lako sara ki tautuba; a sa bogi.

³¹ Ni sa qai curu yani ko koya, sa kaya ko Jisu, Sa qai vakarokorokotaki na Luve ni tamata, a sa vakarokorokotaki na Kalou e na vukuna:

³² ka na vakarokorokotaki koya talega na Kalou vakai koya, ia ena vakarokorokotaki koya sara.

³³ Na luvequ lomani, au na tiko vakalailai ga kei kemudou. Dou na vakasaqarai au: ia me vaka kau a kaya vei ira na kai Jutia, Dou sa sega ni lako rawa ki na vanua kau sa lako yani kina; au sa kaya vaka talega kina vei kemudou.

³⁴ E dua na vunau vou kau sa solia vei kemudou, Mo dou veilomani: me vaka kau sa lomani kemudou, mo dou veilomani talega vakakina.

³⁵ A ka oqo era na kila kina na tamata kecega ni dou sa noqu tisaipeli, kevaka dou sa veilomani.

³⁶ Sa kaya vua ko Saimoni Pita, Kemuni na Turaga, ko ni sa lako kivei? Sa kaya vua ko Jisu, A vanua kau sa lako kina, ko sa sega ni muri au rawa kina edaidai; ia maimuri ga, ko na muri au.

³⁷ Sa kaya vua ko Pita, Kemuni na Turaga, au sa sega ni muri kemuni rawa edaidai e na vuku ni cava? au na solia na noqu bula e na vukumuni.

³⁸ Sa kaya vua ko Jisu, O na solia li na nomu bula e na vukuqu? E dina, e dina, au sa kaya vei iko, ni sa bera ni tagi na toa, ko na cakitaki au vakatolu.