Joni 12 - Vakavakadewa Makawa

Sa lumuta na yava i Jisu ko Meri, 1?8. E lewe vuqa na tamata sa lako mai me raici Lasarusa, 9?11. Sa lako ko Jisu ki Jerusalemi, 12?19. Sa via raici Jisu eso maivei ira na veimatanitu tani, 20?22. Sa vakatakila mai na nona mate ko Jisu, 23?36. Era sa loma butobuto na kai Jutia, 37?41. Eso na turaga era sa vakabauti Jisu, a ra sa sega ni tukuna, 42?50.

¹ Sa vo e ono na bogi me qai ia na kana vata ni lako-sivia, sa qai lako mai ko Jisu ki Pecani, sa tiko kina ko Lasarusa, ka mate eliu ko koya ka vakatura cake tale mai na mate ko koya.

² A ra sa cakava kina na kenai vakayakavi; a sa qarava ko Marica: a sa dua vei ira sa kana vata kaya ko Lasarusa.

³ Sa qai kauta mai ko Meri e dua na paudi waiwai talei sara, a narita dina, ka lumuta na yava i Jisu, ka solota na yavana e na drau ni uluna: ka curuoso na vale e nai boi ni waiwai.

⁴ Sa qai kaya e dua vei ira na nona tisaipeli, ko Jutasa Isikarioti, ko koya ena soli koya yani,

⁵ Ena cava sa sega ni volitaki na waiwai oqo e na pene e tolu na drau, ka soli vei ira na dravudravua?

⁶ Sa sega ni nona nanumi ira na dravudravua, sa vosa kina vakaoqo ko koya; e na vuku ga ni sa daubutako, ka taura na taga i lavo, a sa kauta na ka sa biu kina.

⁷ Sa qai kaya ko Jisu, Laivi koya ga: sa maroroya na ka oqo ko koya ki na siga kau na bulu kina:

⁸ ka sa tiko vakadua kei kemudou ko ira na dravudravua; ia koi au, kau sa sega ni tiko vakadua kei kemudou.

⁹ Ia sa lewe vuqa sara vei ira na kai Jutia, ni ra sa kila sa tiko maikina ko koya, era sa lako mai, sa segai e na vuku i Jisu ga, ka me ra raici Lasarusa talega, ko koya ka vakatura cake tale mai na mate ko koya.

¹⁰ Ia ko ira na bete levu era sa bose vata me ra vakamatei Lasarusa talega:

¹¹ ni ra sa lewe vuqa na kai Jutia sa lako yani e na vukuna, ka vakabauti Jisu.

¹² E na mataka e lewe vuqa sara era sa lako mai ki na kana vata, ni ra sa rogoca sa lako mai ki Jerusalemi ko Jisu,

¹³ era sa kauta na drau ni niu, a ra sa lako yani me veitavaki kaya, ka kacivaka, Osana! sa kalougata na nodra Tui na Isireli, ko koya sa lako mai e na yaca ni Turaga.

¹⁴ Ia ko Jisu, ni sa kunea e dua na luve ni asa, sa vodoka; me vaka sa volai,

¹⁵ Oi kemuni sa toka mai Saioni, kakua ni rere: raica, sa lako mai na nomuni Tui, ka vodo tu e na dua na luve ni asa.

¹⁶ Ia na veika oqo era sa sega mada ni kila ko ira na nona tisaipeli: ia ni sa vakarokorokotaki oti ko Jisu, era sa qai nanuma ni sa volai ko koya e na veika oqo, a ra sa kitaka vua na veika oqo.

¹⁷ Ko ira na lewe vuqa era sa tiko kaya ni sa kacivi Lasarusa mai nai bulubulu, ka vakaturi koya cake tale mai na mate, era sa tukuna.

¹⁸ E na vuku ni ka oqo sa veitavaki kaya talega na lewe vuqa, ni ra sa rogoca sa cakava na ka-mana oqo ko koya.

¹⁹ O ira na Farisi era sa qai kaya vakai ira, Dou sa kila beka ni dou sa sega ni rawata e dua na ka? raica, sa muri koya na kai vuravura kecega.

²⁰ Ia sa so mai na veimatanitu tani, era sa lako cake mai ki na solevu me ra soro:

²¹ ko ira oqo era sa lako mai vei Filipi, a kai Peciseita e Kalili, ka tarogi koya, ka kaya, Keitou via raici Jisu, saka.

²² Sa lako ko Filipi, ka tukuna vei Adriu ia koi rau ko Adriu kei Filipi, erau sa tukuna vei Jisu.

²³ A sa vosa vei rau ko Jisu, ka kaya, Sa qai yaco mai na gauna me vakarokorokotaki kina na Luve ni tamata.

²⁴ E dina, e dina, au sa kaya vei kemudou, Kevaka ena sega ni mate na vua ni sila ni sa lutu ki na qele, sa tiko duaduaga; ia kevaka sa mate, sa vua vakalevu.

²⁵ O koya sa lomana na nona bula, ena vakayalia; ia ko koya sa cata na nona bula e vuravura oqo, ena maroroya ki na bula tawa mudu.

²⁶ Kevaka sa qaravi au e dua, me muri au ga; ia na vanua kau sa tiko kina, ena tiko talega kina ko koya sa qaravi au: ia kevaka sa qaravi au e dua, ena vakarokorokotaki koya ko Tamaqu.

²⁷ Sa qai rarawa na lomaqu; ia ka cava meu kaya? Na Tamaqu, vakabulai au mai na gauna oqo; ia na ka oqo kau sa lako mai kina ki na gauna oqo.

²⁸ Na Tamaqu, vakarokorokotaka na yacamuni. Sa qai rogo mai e dua na vosa mai lomalagi, Au sa vakarokorokotaka, kau na vakarokorokotaka tale.

²⁹ Ko ira na lewe vuqa ka tiko ka rogoca, era sa kaya sa kurukuru: sa kaya eso tani, Sa dua na agilose sa vosa vei koya.

³⁰ Sa vosa ko Jisu, ka kaya, Sa sega ni lako mai na vosa oqo e na vukuqu, e na vukumudou ga.

³¹ Sa qai lewai ko ira na kai vuravura oqo: sa qai biu ki tautuba na turaga ni vuravura oqo.

³² Ia niu sa laveti cake mai vuravura, au na vakayarayarataki ira na tamata kecega kivei au.

³³ Ia sa vosataka na ka oqo ko koya, me vakatakila na mate ena mate kina ko koya.

³⁴ Sa kaya vua na lewe vuqa, Keimami a rogoca mai na vunau ni sa tiko vakadua na Karisito; ia ko sa kaya vakacava, Ena laveti cake na Luve ni tamata? ko cei na Luve ni tamata oqo?

³⁵ Sa qai kaya vei ira ko Jisu, Sa tiko vakalailai ga vei kemudou na rarama: dou lako ni sa tu vei kemudou na rarama, de yacovi kemudou na butobuto: ia ko koya sa lako e na butobuto, sa sega ni kila se sa lako kivei.

³⁶ Ni sa tu vei kemudou na rarama, dou vakabauta na rarama, mo dou yaco me luve ni rarama. Sa vosataka na veika oqo ko Jisu, ka qai lako yani, ka vunitaki koya vei ira.

³⁷ Ia e dina ga sa cakava ko koya e matadra e vuqa na ka mana, a ra sa sega ga ni vakabauti koya:

³⁸ me vakayacori kina na ka sa vosataka ko Aisea na parofita, ka vaka, I Jiova, ko cei sa vakabauta na neitoui tukutuku? A sa vakatakilai vei cei na liga i Jiova?

³⁹ A ka oqo era sa sega kina ni vakabauta rawa; ni sa kaya tale ko Aisea,

⁴⁰ Sa vakamatabokotaka na matadra, ka vakaukauwataka na lomadra ko koya: Me kakua ni rai na matadra, se kila na lomadra, Ka saumaki mai, Ka meu vakabulai ira.

⁴¹ Sa vosataka na veika oqo ko Aisea, ni sa raica na nona serau, ka tukuni koya.

⁴² Ia sa lewe vuqa vei ira talega na turaga era sa vakabauti koya, ia, e na vukudra na Farisi, era sa sega ni tukuna, de ra sa vakatatabui mai na vale ni lotu:

⁴³ ni ra sa vinakata vakalevu me vakarokorokotaki ira ko ira na tamata, ka vakalailai ga me vakarokorokotaki ira na Kalou.

⁴⁴ Sa qai kaci ko Jisu, ka kaya, O koya sa vakabauti au, sa sega ni vakabauti au ga, sa vakabauti koya talega sa talai au mai:

⁴⁵ ia ko koya sa raici au, sa raici koya sa talai au mai.

⁴⁶ Au sa lako mai ki vuravura meu kena rarama, me kakua ni tiko e na butobuto ko koya yadua sa vakabauti au.

⁴⁷ Ia kevaka e dua sa rogoca na noqu vosa, ka sega ni vakabauta, au sa sega ni lewai koya: niu sa sega ni lako mai meu lewai ira na kai vuravura, meu vakabulai ira ga na kai vuravura.

⁴⁸ Sa dua sa lewai koya sa biuti au, ka sega ni vakabauta na noqu vosa: a vosa kau sa vosataka, sai koya oqo ena lewai koya e na siga maimuri.

⁴⁹ Niu sa sega ni vosa vakataki au; ia ko Tamaqu sa talai au mai, sa vakarota vei au na ka meu kaya, kei na ka meu tukuna.

⁵⁰ Ia kau sa kila sa vu ni bula tawa mudu na nonai vakaro: o koya ga, e na ka kecega kau sa vosataka, au sa vosa me vaka na ka sa kaya vei au ko Tamaqu.