Jona 4 - Vakavakadewa Makawa

Sa vunauci ko Jona, ni sa yaloca mai, 1-11.

¹ Ka sa cata vakalevu ko Jona, ka sa cudru sara.

² A sa masu vei Jiova, ka kaya, Kemuni Jiova, sai koya ga oqo ka'u a kaya ni'u a tiko e na noqu vanua, se segai? sai koya talega oqo ka'u a dro vakatotolo kina ki Tasisi: ni'u a kila ko ni sa Kalou daulomasoli, ka yalololoma, ka cudru vakamalua, ka dauyalovinaka, ka sa dauveivutuni e na vuku ni ca.

³ Ia oqo ga, kemuni Jiova, au masuti kemuni kina mo ni kauta tani vei au na noqu bula; ni sa vinaka me'u mate ka ca me'u bula.

⁴ Sa qai taroga ko Jiova, E vinaka beka vei iko mo cudru?

⁵ Sa qai lako ki nai bili ni koro ko Jona, ka tiko e na yasa ni koro vaka ki na tu-i-cake, a sa cakava maikea e dua na nona vale vakacevaceva, ka tiko sobu ki rukuna, ka me raica mada se cava ena yacova na koro.

⁶ A sa vakarautaka na Kalou ko Jiova e dua na bele, a sa vakatubura me vakarurugi Jona, mei vakaruru ni uluna, me cegu kina ko koya mai na nona rarawa: ka sa reki vakalevu ko Jona e na vuku ni bele.

⁷ Sa oti na bogi ka sa mataka mai sa lewa na Kalou me mai kania na bele e dua na yavato, ka sa malai kina.

⁸ Ia ni sa cadra na mata-ni-siga, sa vakatubura na Kalou e dua na tokalau e makausu na kena buno; ka sa kania na ulu i Jona na siga, a sa malumalumu ko koya, ka gadreva sara me mate, a sa kaya, E vinaka ga me'u mate ka ca me'u bula tiko.

⁹ Sa qai kaya vei Jona na Kalou, E vinaka li vei iko mo cudru e na vuku ni bele? A sa kaya ko koya, E vinaka me'u cudru, io, me'u mate ga.

¹⁰ Sa mani kaya ko Jiova, O iko, ko sa lomana na bele, na ka ko a sega ni oca kina, ka ko sega ni vakatubura, ia ka tubu ga e na bogi dua ka malai e na bogi dua;

¹¹ ia me'u kakua li ni lomani Ninive, na koro levu ko ya, era sa tiko kina e le dua na drau ka ruasagavulu na udolu na tamata era sega ni kila rawa na ligadra i matau mai na ligadra i mawi; ka sa levu talega kina na manumanu?