Jona 3 - Vakavakadewa Makawa

Ni sa talai tale ko Jona, sa la'ki vunauci ira na kai Ninive, 1-4. Ni ra veivutuni na kai Ninive, sa veivutuni talega na Kalou, 5-10.

¹ A sa baci yaco tale vakarua vei Jona na vosa i Jiova, ka vaka,

² Mo cavu tu, mo lako ki Ninive, na koro levu ko ya, ka vunautaka kina na vunau ka'u a kaya vei iko.

³ A sa cavu tu ko Jona, ka lako yani ki Ninive, me vaka na vosa i Jiova. Ia ko Ninive na koro levu sara eda na bogi tolu ni da lako tu me vakavolivolita.

⁴ A sa curu ki na koro ko Jona ka lako voli kina e na dua na siga, ka sa vunau tiko, ka kaya, Sa na bogi vasagavulu mada, ena qai rusa ko Ninive.

⁵ Era sa qai vakabauta na Kalou ko ira na kai Ninive, ka kacivaka me ra lolo, a ra sa vakaisulu e nai sulu taga ko ira na turaga kei ira talega na lewe ni vanua.

⁶ Ni sa rogo vei tui Ninive na vosa oqori, ka sa tu cake ko koya mai na nonai tikotiko vakaturaga, ka luvata tani na nonai sulu vakatui, ka sa vakaisulutaki e nai sulu taga, ka la'ki tiko e na dravusa.

⁷ A sa kacivaki ka tukuni sara e Ninive, ni sa vakarota ko koya na tui kei ira na kena turaga, ka vaka, Me kakua ni dua na tamata se na manumanu, na pulumokau se na sipi, me kania e dua na ka: me ra kakua ni kana, se gunu wai:

⁸ ia me ra vakaisulu e nai sulu taga na tamata kei na manumanu, ka tagi sara vua na Kalou: ka me ra dui lesu talega ko ira yadua mai na nonai tovo ca, ka mai nai valavala kaukauwa talega sa ra dauia e na ligadra yadua.

⁹ O cei e kila de sa na saumaki beka na Kalou ka veivutuni, ka lesu mai na nona cudru waqawaqa, me da kakua ni rusa?

¹⁰ A sa raica na nodra i valavala na Kalou, ka ni ra sa vuki mai na nodra i tovo ca; ka sa qai veivutuni na Kalou e na vuku ni ca sa kaya me cakava vei ira; ka sa sega ni cakava ko koya.