Jona 2 - Vakavakadewa Makawa

A masumasu i Jona, 1-9. Sa vakabulai koya ko Jiova, 10.

¹ A sa masu ko Jona vei Jiova na nona Kalou ni sa tiko e na kete ni ika;

² ka sa kaya, Au a tagi vei Jiova e na vuku ni noqu rarawa, A sa rogoci au ko koya; Mai na loma i etesi ka'u a qoqolou, Ko ni a rogoca na domoqu.

³ Ni kemuni a biuti au ki na wasa titobu, ki na loma ni wasa levu; Ia sa vakavolivoliti au na ua: A nomu biau kei na nomu biau kecega sa luvuci au.

⁴ Ia koi au ka'u a kaya, Au sa vakasevi tani mai na matamuni; Ia ka'u na goleva tale na nomuni vale tabu.

⁵ Sa mai luvuci au na wai, sa yacova sara na yaloqu: Sa voliti au na wai titobu, Sa viviraka na uluqu na lumi.

⁶ Au a lako sobu ki na vu ni veiulu-ni-vanua; Ia ko vuravura, na kenai sogo sa vakalati au ka sega ni mudu: Ia ko sa vueta tani ga na noqu bula mai na rusa, Jiova na noqu Kalou.

⁷ Ni sa luvu e lomaqu na yaloqu, au a qai nanumi Jiova: A sa curu vei kemuni na noqu masu, ki na nomuni vale tabu.

⁸ O ira era sa dauqarava na ka lasu wale, Era sa biuta na vu ni nodra vinaka.

⁹ Ia koi au, ka'u na ia nai madrali vei kemuni e na domo ni vakavinavinaka; Au na cakava na ka ka'u a bubului kina. Sa maivei Jiova na veivakabulai.

¹⁰ Sa qai vosa ki na ika ko Jiova, ka sa luaraki Jona ki na vanua mamaca.