Joeli 2 - Vakavakadewa Makawa

Sa vakatakila ko koya ni na ka rerevaki sara na veicudruvi sa voleka ni yaco, 1-11. Sa vakarota na veivutuni, 12-14; kei na lolo, 15-17; ka sa tukuna na vosa ni yalayala vei ira era veivutuni, 18-27. Sa tukuna talega ni na sovaraki vakalevu na Yalo Tabu e na gauna maimuri, 28-32.

¹ Dou uvuca na davui e Saioni, ka kacivaka nai valu e na noqu ulu-ni-vanua tabu; me ra sautaninini ko ira kecega na lewe ni vanua: ni sa lako mai na siga i Jiova, ka ni sa voleka mai;

² e dua na siga butobuto ka loaloa, a siga ni o kei na butobuto levu, me vaka na mataka ni sa kida mai e na veiulu-ni-vanua: io, e dua na mataqali lewe vuqa ka kaukauwa; sa sega sara e vakakina eliu, ena sega talega me vakakina emuri, e na veiyabaki ni tabatamata sa veitaravi.

³ Sa kana voli e matadra na bukawaqa; e dakudra talega, sa caudre tu na yameyame ni bukawaqa: sa vaka na were ko Iteni na vanua e matadra, ia e dakudra, sa veikau lala sara; ena sega talega e bula rawa maikina.

⁴ Sa rairai vaka na ose na kedrai rairai; ka vakataki ira era vodo ose, era na cici vakakina.

⁵ Ena vaka na rorogo ni qiqi-ni-valu e na dela ni ulu-ni-vanua na nodra ladelade, me vaka na rorogo ni yameyame ni bukawaqa sa kania na vu-ni-sila, me vaka na mataqali qaqa e lautuva vakaivalu.

⁶ Era na taqaya sara na tamata e matadra: a matadra kecega ena matacea mai.

⁷ Era na cici me vakataki ira na tamata qaqa; era na kaba na bai me vakataki ira na tamata i valu; ia era na dui muria na nona sala, ka sega ni lesu tani mai na nodra i lakolako yadua:

⁸ era na sega talega ni veidrigidrigi, era na dui muria ga na nona sala: ka ni ra bolea na gasau, era na sega ni lau gasau.

⁹ Era na veiciciyaki e loma ni koro; era na cici e na dela ni bai, era na kaba cake ki na dela ni veivale; era na curuma na katuba me vaka na daubutako.

¹⁰ Sa na tavuki e matadra, ko vuravura; sa na yavala na lomalagi: ena vakabutobutotaki na mata-ni-siga kei na vula, ia na kalokalo ena sega tiko ni cila mai:

¹¹ ia ko Jiova ena tabalaka na domona ni sa liutaki ira na nona mataivalu: ni sa ka levu sara na nonai valu: sa kaukauwa talega ko koya sa vakayacora na nona vosa: sa ka levu na siga i Jiova ka rerevaki sara; ia ko cei me na vosota rawa?

¹² Ia oqo ga, sa kaya ko Jiova, mo dou lesu mai vei au e na vu ni yalomudou, ka dou lolo talega, ka me vakawai na matamudou ka ia na tagi yaso:

¹³ ia dou dresulaka na yalomudou, ka kua ni dresulaka na nomudou i sulu, ka lesu vei Jiova na nomudou Kalou: ni sa dauyalovinaka ka yalololoma, sa berabera ni cudru, ka sa ka levu na nona loloma, ka sa veivutunitaka na nona via cudruvi ira.

¹⁴ O cei sa kila, se na lesu beka ga ko koya ka veivutuni, ka laiva ki muri na ka ni veivakalougatataki; io, nai madrali laukana kei nai madrali gunuvi vei Jiova na nomudou Kalou?

¹⁵ Dou uvuca na davui e Saioni, dou vakatabuya na siga me ia kina na lolo, kacivaka me dua mada nai soqosoqo tabu:

¹⁶ vakasoqoni ira na tamata, vakasavasavataki ira nai soqosoqo, vakasoqoni ira na qase, vakasoqoni ira vata mai na gone, kei ira sa sucuma tiko na sucu: me lako mai na tagane sa qai vakawati, mai na nona loqi, kei na watina mai na nonai davodavo.

¹⁷ Me ra mai tagi na bete e na macawa ni curucuru ni vale kei nai cabocabo-ni-soro, ka me ra kaya, Mo ni yalololoma mai, Jiova, vei ira na nomuni tamata, ka kakua ni solia na nomuni votavota me vakarogocataki, ka me lewai ira ko ira na veimatanitu: me ra veikayaka vakacava ko ira na veimatanitu, Sa evei li na nodra Kalou?

¹⁸ Ena qai vuvu ko Jiova e na vuku ni nona vanua, ka yalololoma vei ira na nona tamata.

¹⁹ Io, ena vosa ko Jiova ka kaya vei ira na nona tamata, Raica, au na solia vei kemudou na sila, kei na waini, kei na waiwai, mo dou mamau kina: ia ka'u na sega ni soli kemudou tale, me vakarogocataki vei ira na veimatanitu:

²⁰ ia ka'u na kauti koya mai na tokalau, me vakayawa tani vei kemudou, ka vakasevi koya ki na vanua dravuisiga ka lala, a matana ena donuya na waitui ki na tu-i-cake, ka na donuya na waitui ki ra na dakuna, ia ena kuvu cake na kena bona, ka kuvu cake na kenai boi ca, ni sa cakava ko koya na ka levu.

²¹ Mo kakua ni rere, na vanua; mo reki ka marau: ni na cakava na ka levu ko Jiova.

²² Dou kakua ni rere, na manumanu ni vanua: ni sa tubu na vanua veico mai lekutu, ni sa vuataka na vuana na kau, a lolo kei na vaini sa vua vakalevu mai.

²³ Ia koi kemudou nai taukei mai Saioni, dou marau, ka rekitaki Jiova na nomudou Kalou: ni sa solia vakavinaka vei kemudou na uca taumada, io, ena vakatauca vei kemudou na uca, na uca taumada kei na uca taumuri me vaka eliu:

²⁴ ena qai sinai na rara ni sila e na sila, ka vuabale nai keli-waini e na waini vou kei na waiwai.

²⁵ Ia ka'u na solia tale vei kemudou na vuata ni veiyabaki sa kania na vodre dina kei na vodre dramidrami, kei na nuve, kei na vodre dauquru, na noqu i valu levu ka'u a tala yani vei kemudou.

²⁶ Ia ni sa sautu, dou na kana, ka mamau, ka vakacaucautaka na yaca i Jiova na nomudou Kalou, o koya sa ka mana na nona cakacaka vei kemudou: a ra na sega ni madua ko ira na noqu tamata e na dua na gauna.

²⁷ Dou na qai kila ni'u sa tiko vata kei ira na Isireli, ka ni'u sa nomudou Kalou koi au ko Jiova, ka sega tale e dua tani: ka ra na sega sara ni madua ko ira na noqu tamata e na dua na gauna.

²⁸ Ia ena yaco e na gauna maimuri, ka'u na sovaraka na Yaloqu kivei ira na tamata kecega, ka ra na parofisai kina ko ira na nomudou gonetagane kei ira na nomudou goneyalewa, ko ira na nomudou qase era na tadrataka eso na tadra, ko ira na nomudou cauravou era na raica eso na raivotu:

²⁹ vei ira talega na tamata kei na vada ka'u na sovaraka na Yaloqu e na gauna ko ya.

³⁰ Ia ka'u na vakatakila na ka e veivakidacalataki mai lomalagi kei vuravura talega, a dra, kei na bukawaqa, kei na o kubou:

³¹ a mata-ni-siga ena vuki me butobuto, kei na vula me dra, ena qai yaco mai emuri na siga i Jiova, e levu ka rerevaki.

³² Ia ena yaco, ko koya yadua sa na masuta na yaca i Jiova, ena bula: io, ena ia na veivakabulai mai na ulu-ni-vanua ko Saioni, kei Jerusalemi, me vaka sa kaya ko Jiova, ka vei ira talega na kena vo sa na kacivi ira ko Jiova.