Jeremaia 9 - Vakavakadewa Makawa

Sa tagicaki ira na Juta ni sa levu na nodra i valavala ca, kei na nodra cudruvi, 1-16. Sa vakaroti ira me ra tagicaka na nodra ca, 17-22, ka biuta na nodra vakararavi ki na ka wale, 23,24. Ena cudruvi Juta kei na veimatanitu na Kalou, 25,26.

¹ Me sa wai mada na uluqu, kei nai vurevure ni wai na mataqu, me'u tagi kina e na siga kei na bogi e na vukudra na nona vuetaki na goneyalewa ni noqu tamata!

² Me sa noqu mada mai na veikau e dua na bure ni vulagi; me'u vakalaivi ira tu na noqu tamata, ka lako tani vei ira! ni ra sa tamata dauyalewa kecega, nai soqosoqo ni daulawaki.

³ A ra sa lokata na yamedra me nodra dakai ni vosa lasu: ka sa sega ni qaqa me ra totaka na ka dina e vuravura; ni ra sa vakaikuritaka na ca e na ca, ia era sa sega ni kilai au, sa kaya ko Jiova.

⁴ Dou dui qarauni kemudou vinaka e na vuku ni kai nona, ia mo kakua ni vakararavi vua e dua na tacimu: ni ra na daucakacaka vaqaseqase vei ira kecega na veitacini, kei ira kecega na kai nomu era na dauia na vosa ni veivakacacani:

⁵ ko ira kece talega, era na dui vakaisina na kai nona, ka ra na sega ni vosataka na dina: era sa vakavulica na yamedra me vosa lasu, ia era sa dauvakaocataki ira e na caka ca:

⁶ a nomu vale sa tu e na loma ni veivakaisini; e na vuku ni veivakaisini era sa bese ni kilai au, sa kaya ko Jiova.

⁷ O koya oqo sa kaya kina ko Jiova ni lewe vuqa, Raica, au na vakaririgi ira me vaka na siliva, ka vakatovolei ira; se cava me'u cakava e na vukuna na goneyalewa ni noqu tamata?

⁸ Sa gasau vanataki na yamedra; sa vosataka na veivakaisini: e dua sa vosa vinaka vua na kai nona e na gusuna, ia e na vu ni yalona sa lawakitaka.

⁹ Me'u sega ni cudruvi ira beka e na vuku ni veika oqo? sa kaya ko Jiova: ia me'u sega beka ni sauma na matanitu sa vakaoqo?

¹⁰ E na vuku ni veiulu-ni-vanua ka'u na ia na tagi kei na qoqolou, kei na lele e na vuku ni veikoro ni veikau, ni sa kama, me sega e dua e lakova; ena sega ni rogoci kina na tagi ni manumanu; a manumanu vuka kei na manumanu ni vanua sa dro; sa ra yali.

¹¹ Ia ka'u na qisi Jerusalemi me koro rusa, me qara ni gata lelevu; ia na veikoro vaka-Juta ka'u na vakalalataka, me sega e tiko kina.

¹² Ko cei na tamata vuku, me kila rawa na ka oqo? ia vei cei sa vosa kina na gusu i Jiova, me sa tukuna ko koya, se cava beka sa ca kina na vanua, ka sa yavu sara me vaka na veikau, me sega e dua e lakova?

¹³ Ka sa kaya ko Jiova, Ni ra sa biuta na noqu vunau ka'u a tauca e matadra, ka ra sa sega ni vakarorogo ki na noqu vosa se muria;

¹⁴ ka ra sa muria ga na nodra yalokaukauwa, kei ira na Peali, oqori ka vakavulici ira kina ko ira na nodra qase:

¹⁵ o koya oqo sa kaya kina vakaoqo ko Jiova ni lewe vuqa, na Kalou ni Isireli; Raica, koi au ka'u na vakani ira na tamata oqo e na kau gaga, ka vagunuvi ira e na wai gaga:

¹⁶ ka'u na dui vakasevi ira talega ki na veimatanitu, sa ra sega ni kila, se ko ira se na nodra qase: ia ka'u na lewa me muri ira e dua nai seleiwau, me'u vakaoti ira mada ga.

¹⁷ Sa kaya vakaoqo ko Jiova ni lewe vuqa, Dou vakanananu, ka kacivi ira na yalewa na dau ni tagi, me ra lako mai; ia dou talakitaki ira na vuku, me ra lako mai:

¹⁸ ia me ra kusarawa mai, me ia na tagi e na vukuda, me dave yani mai na matada na wai ni mata, ka tovure na wai mai na dreke-ni-matada.

¹⁹ Ni sa dua na domo ni tagi sa rogo mai Saioni, sa kaya, Ulei na noda vakacacani! eda sa madua vakalevu, ni da sa vakalaiva na vanua, ni sa biuti keda tani na nodai tikotiko.

²⁰ Ia dou rogoca na vosa i Jiova, koi kemudou na yalewa, ka vakabauta e na daligamudou na vosa ni gusuna, ka vakavulici ira na luvemudou yalewa e na tagi, kei ira yadua na kai nona na lele.

²¹ Ni sa cabe mai ki na noda katuba ko mate, ka sa curuma na noda vale vakaturaga, me muduka na gone mai taudaku, kei ira na cauravou mai na saqata ni koro.

²² Mo vaka, Sa kaya vakaoqo ko Jiova, Ia ena bale na yago ni tamata, me vaka na de-ni-manumanu, e dela ni vanua, ka vaka na sila sa taura ka vakalaiva ki muri ko koya sa tamusuka voli, ka na sega e dua me kumuni ira.

²³ Sa kaya vakaoqo ko Jiova, Me kakua ni dokai koya na vuku e na nona vuku, me kakua talega ni dokai koya na kaukauwa e na nona kaukauwa, me kakua ni dokai koya sa vutuniyau e na nonai yau:

²⁴ ia ko koya sa dokai koya me dokai koya e na ka oqo, ni sa yalomatua me kilai au, ni sai au ko Jiova ka dauia na yalololoma, kei na lewa kei na cakacaka dodonu, e vuravura: ni'u sa vinakata na ka oqo, sa kaya ko Jiova.

²⁵ Sa kaya ko Jiova, Raica, ena yaco mai na gauna ka'u na cudruvi ira kece kina era sa cili kei ira sa sega ni cili;

²⁶ ko Ijipita, kei Juta, kei Itomi, kei na kawa i Amoni, kei Moapi, kei ira kece mai na veiyalayala, era sa tiko ga mai na veikau: ni ra sa sega ni cili ko ira na veimatanitu kecega oqori, ia na mataqali kece ni Isireli sa sega ni cili na yalodra.