Jeremaia 7 - Vakavakadewa Makawa

Sa vunautaka na veivutuni ko Jeremaia, me vakadaroi kina na nodra vakabobulataki na Juta, 1-7. Na ka ca sa yacovi ira na nodra qase mai Sailo ena yacovi ira talega, ni ra sa muria na nodra i valavala, ka dauqarava na kalou lasu, 8-20. Sa cata ko Jiova na nodra cakacaka vakailasu vua, 21-28. Sa vakaroti ira me ra tagicaka na nodra i valavala vakasisila mai Tofeci, ni na cudruva ga na Kalou, 29-34.

¹ A vosa sa yaco vei Jeremaia maivei Jiova, ka vaka,

² Mo tu e na matamata-ni-koro ni vale i Jiova, ka tukuna na vosa oqo, ka kaya, Dou rogoca na vosa i Jiova, na Juta kecega, sa curu ki na matamata-ni-koro oqo me soro vei Jiova.

³ Sa kaya vakaoqo ko Jiova ni lewe vuqa, na Kalou ni Isireli, Dou cakava me vinaka na nomudou i tovo kei na nomudou i valavala, ka'u na qai lesia mo dou tiko ga e na yasana oqo:

⁴ dou kakua ni vakararavi ki na vosa lasu, mo dou kaya, A vale tabu i Jiova, A vale tabu i Jiova, A vale tabu i Jiova, oqo.

⁵ Ia kevaka dou sa vakavinakataka sara na nomudou i tovo kei na nomudou i valavala; kevaka dou sa ia na lewa dodonu e na vukudrau na tamata kei na kai nona;

⁶ kevaka dou sa sega ni vakasaurarataki iratou na vulagi, kei na luveniyali, kei na yada, ka sega ni vakadavea na dra e sega ni cala e na yasana oqo, ka sega ni muria na kalou tani mo dou ca kina:

⁷ ka'u na qai lewa mo dou tiko ga e na yasana oqo, e na vanua ka'u a solia vei ira na nomudou qase, me sega ni mudu.

⁸ Raica, dou sa vakararavi ki na vosa lasu, sa sega ni yaga.

⁹ Mo dou butako li, ka laba, ka ia na veibutakoci, ka bubului vakailasu, ka vakama na ka boi vinaka vei Peali, ka muria na kalou tani dou sa sega ni kila;

¹⁰ ka qai lako mai ka tu e mataqu e na vale oqo, sa vakatokai kina na yacaqu, ka kaya, Keimami sa vakalalagataki me cakava na ka vakasisila kece oqo?

¹¹ A vale oqo, sa vakatokai e na yacaqu, sa qai vuki beka me qara ni daubutako vei kemudou? Io, koi au, raica, ka'u sa kunea, sa kaya ko Jiova.

¹² Ia dou lako mada ki na noqu tikina ko ya mai Sailo, ko koya ka'u a vakatikora kina na yacaqu eliu, ka raica na ka ka'u a cakava kina e na vuku ni nodra ca na noqu tamata na Isireli.

¹³ Ia oqo, ni dou sa cakava na cakacaka kece oqo, sa kaya ko Jiova, io, ka'u a vosa tikoga vei kemudou, ka sou e na mataka me'u vosa vei kemudou, dou a sega ga ni goleva; ia ka'u a kaci yani, ka dou a sega ni rogo mai;

¹⁴ o koya oqo ka'u na cakava kina ki na vale oqo, sa vakatokai e na yacaqu, ka dou sa vakararavi kina, io ki na yasana oqo ka'u a solia vei kemudou kei ira na nomudou qase, me vaka ka'u a cakava ki Sailo:

¹⁵ ka'u na biuti kemudou tani talega e mataqu, me vaka ka'u a biuti ira tani na kai nomudou, io na kawa kecega i Ifireimi.

¹⁶ Ia ko iko, mo kakua ni masulaki ira na tamata oqo, mo kakua talega ni ia e na vukudra na tagi se na masu, mo kakua talega ni ia na veimasulaki vei au: ni'u na sega ni rogoci iko.

¹⁷ Ko sa sega beka ni raica na ka era cakava e na veikoro vaka-Juta kei na sala ni koro ko Jerusalemi?

¹⁸ na gone, era ca buka; na tamadra, era tutuvaka na buka; ko ira na yalewa, era natuka na madrai droka, me ra cakava na kena keki na ranadi ni lomalagi, ka ra sova nai sevu me medra na kalou tani, me ra vakacudrui au.

¹⁹ Era sa vakacudrui au li? sa kaya ko Jiova, Era sa sega li ni vakacudrui ira vakataki ira ga me ra madua kina?

²⁰ O koya sa kaya kina na Turaga ko Jiova; Raica, na noqu cudru, ia na noqu cudru waqawaqa ena sova yani ki na yasana oqo, ki na tamata, kei na manumanu, kei na kau ni vanua, kei na vuata ni vanua; ia ena kama, ka sega ni bokoci.

²¹ Sa kaya vakaoqo ko Jiova ni lewe vuqa, na Kalou ni Isireli; A nomudou i soro kama dou mani viritaka ki na nomudou i madrali, ka kania na lewena:

²² ni'u a sega ni vosa vei ira na nomudou qase, se vakaroti ira e na siga ka'u a kauti ira kina mai na vanua ko Ijipita, e na vuku ni soro kama kei nai madrali:

²³ ia na ka ga oqo ka'u a vakarota vei ira, ka kaya, Dou vakarorogo ki na noqu vosa, ka'u na qai nomudou Kalou, ia dou na vakabau mo dou noqu tamata: dou muria kece talega nai valavala ka'u a vakarota vei kemudou, mo dou vinaka kina:

²⁴ ka ra sa sega ni vakarorogo, se vakatu daligadra, era sa muria ga na nodra lewa kei na nodra yalokaukauwa, era sa suka ki muri, ka sega ni lako ki liu.

²⁵ Mai na siga era sa lako mai kina na nomudou qase mai na vanua ko Ijipita ka yacova na siga oqo, ka'u a talai ira kecega na noqu parofita vei kemudou e na veisiga, ka'u a sou e na mataka ka tala:

²⁶ ia era sa sega ni vakarorogo vei au, se vakatu daligadra, era vakadomoqataki ira ga: era sivi ira na nodra qase e na caka ca.

²⁷ Ia ko na vosataka vei ira na vosa kecega oqo: ka ra na sega ga ni vakarorogo vei iko: ia ko na kaci yani vei ira; ka ra na sega ni rogo mai vei iko.

²⁸ Ia mo kaya vei ira, Oqo na matanitu sa sega ni vakarorogo ki na vosa i Jiova na nodra Kalou, ka ra bese ni vakavulici: sa oti na vosa dina, ka sa mudu mai na gusudra.

²⁹ Kotiva na drau ni ulumu, ko iko Jerusalemi, ka biuta tani, ka ia na tagi e na veiyasana cecere; ni sa biuta ko Jiova ka vakalaiva nai tabatamata oqo sa cudruva ko koya.

³⁰ Ni ra sa cakava na ka ca e mataqu ko ira na Juta, sa kaya ko Jiova: era sa vakaduria na nodra ka vakasisila e na vale sa vakatokai e na yacaqu, me vakadukadukalitaka;

³¹ ka ra sa tara na veitikina cecere mai Tofeci, mai na buca ni luve i Inomi, me ra vakama na luvedra tagane kei na luvedra yalewa e na bukawaqa; na ka ka'u a sega ni vakarota, ka sa sega ni tubu e lomaqu.

³² O koya oqo sa kaya kina ko Jiova, Raica, ena yaco mai na gauna ena sega ni vakatokai kina ko Tofeci, se na buca ni luve i Inomi, ia na buca ga ni veivakamatei: ni ra na ia na veibulu mai Tofeci, ka na sega na tikina e vo tiko;

³³ na yagodra talega na tamata oqo ena kedra na manumanu vuka, kei na manumanu ni vanua; ka sega e dua me varea tani.

³⁴ Ka'u na qai vagaluya e na veikoro vaka-Juta, e na veisala talega ni koro ko Jerusalemi, na domo ni marau, kei na domo ni reki, na domo ni tagane kei na domo ni yalewa, sa qai vakawati: ni na lala na vanua.