Jeremaia 6 - Vakavakadewa Makawa

Ko ira na meca era sa talai mai me ra vala kei Juta e na vuku ni nodra i valavala ca, 1-8. Sa cudruvi ira na Kalou e na vuku ni nodra i valavala ca, 9-17. Sa tukuni yani na nona cudru, 18-26. Sa lesi ko Jeremaia me vakatovolei ira me vaka e dauvakatovolei na siliva, ka ra sa tukuni me siliva biu, 27-30.

¹ Dou dro tani, koi kemudou na Penijamini, mai na loma i Jerusalemi; ia dou uvuca na davui mai Tikoa, ka dou vakaduria na bukawaqa mei vakatakilakila mai Peci-akarimi: ni sa dua na ca sa rairai mai na mata ni tokalau, ka dua na veivakarusai levu.

² Au sa vakatauvatani koya na goneyalewa ni Saioni kei na dua na yalewa matavinaka ka tabusiga;

³ eratou na lako vua ko ira nai vakatawa kei na nodratou qele ni sipi; era na mai birika vakavolivoliti koya na nodra vale laca; era na dui kana yadua e nona tikina.

⁴ Dou vakarau i valu vua; dou tu, me da lako cake kei na siga levu. Ulei koi keda! ni sa kala na siga, ni sa balavu mai na yaloyalo ni yakavi:

⁵ dou tucake, me da lako kei na bogi, me da vakarusa na nona veivale vakaturaga.

⁶ Sa vakaoqo na vosa i Jiova ni lewe vuqa, Dou taya sobu na kau, ka viri suva kei Jerusalemi: oqo na koro me cudruvi; sa caka e loma ni koro nai valavala vakasausa.

⁷ Me vaka sa vakadavea na kena wai e dua na mata-ni-wai, sa vakadavea vakakina ko koya na nona ca: nai valavala kaukauwa kei na veivakacacani sa daurogo kina; sa tiko ga e mataqu na mate kei na vue.

⁸ Mo vakavulici mada, Jerusalemi, de lako tani vei iko na yaloqu; de'u vakalalataki iko mo vanua e sega ni tawa.

⁹ Sa kaya vakaoqo ko Jiova ni lewe vuqa, Era na vetia sara na kena vo ni Isireli me vaka sa veti na vua ni vaini: mo vakalesuya tale na ligamu ki na sova me vaka na dauveti vua ni vaini.

¹⁰ Me'u vosa vei cei, ka ia kina na vakatusa, me ra rogoca? raica, sa sega ni cilivi na daligadra, a ra sa sega ni vakarorogo rawa: raica, na vosa i Jiova sai tukutuku ca vei ira; era sa sega ni vinakata.

¹¹ Ia ka'u sa sinai kina e na cudru i Jiova: ka'u sa oca ni vosota: ka'u na sova yani vei ira na gone e taudaku, vei ira vata kei na nodra i soqosoqo na cauravou: ni na tauri vata na tagane kei na watina, na qase kei koya sa vuqa na nona siga.

¹² Ia ena soli vei ira na tani na nodra veivale, kei na nodra veiwere kei na watidra: ni'u na dodoka na ligaqu vei ira na lewe ni vanua, sa kaya ko Jiova.

¹³ Ni ra sa daukocokoco kecega ko ira na tamata wale kei ira talega na turaga; a ra sa cakacaka vakailasu kecega na parofita ka yacovi ira talega na bete:

¹⁴ ka ra sa vakamavotaka vakaca ga na nona mavoa na goneyalewa ni noqu tamata, ni ra kaya, Dou vakacegu; dou vakacegu; ni sa sega na vakacegu.

¹⁵ Era sa madua beka ni ra sa kitaka na ka vakasisila? e segai, era sa sega sara ni madua vakalailai, sa sega sara talega ni ra mata madua rawa: o koya oqo era na bale vata kina kei ira sa bale: e na gauna ka'u na cudruvi ira kina era na vakabalei sobu, sa kaya ko Jiova.

¹⁶ Sa kaya vakaoqo ko Jiova, Dou tu e na sala, ka vakararai, ka taroga nai lakolako makawa, se sa evei na sala vinaka, ia dou lako ga kina, dou na qai kunea kina na vakacegu ni yalomudou. A ra sa kaya, Keimami na sega ni lako kina.

¹⁷ Au a lesia talega eso me nomudou i vakatawa, ka kaya, Dou vakarorogo ki na rorogo ni davui. A ra sa kaya, Keimami na sega ni vakarorogo.

¹⁸ O koya oqo dou rogoca kina, na lewe ni veivanua, ka kila, koi kemudou nai soqosoqo, na ka sa tu vei ira.

¹⁹ Rogoca mada, na vuravura: raica, ka'u na vakayacora na ca vei ira na tamata oqo, io na vua ni nodra nanuma, ni ra sa sega ni rogoca na noqu vosa, se na noqu vunau; era sa biuta ga.

²⁰ A cava na betena ni sa kau mai vei au na ka boi vinaka mai Sipa, kei na kalamo vinaka mai na vanua vakayawa? a nomudou i soro kama sa sega ni donu, kei na nomudou i madrali sa sega ni kamikamica vei au.

²¹ O koya sa kaya kina ko Jiova, Raica, ka'u na tauca vei ira na tamata oqo na ka me ra toqi kina, ka ra na bale vata kina na qase kei na luvedra; na tamata kei na wekana erau na rusa.

²² Sa kaya vakaoqo ko Jiova, Raica, e dua na mataqali sa lako mai na vanua mai na tokalau, ia e dua na matanitu levu ena vakaturi mai nai yalayala kei vuravura:

²³ era na lukuta na dakai kei na moto; era sa yalokaukauwa, ka sega ni kila na loloma; a domodra ena vadugu me vaka na wasawasa; era sa vodo ose, ka lautuva me vaka na tamata me ia nai valu kivei iko, na goneyalewa ni Saioni.

²⁴ Keitou sa rogoca na kenai rogorogo: sa malumalumu mai na liga i keitou: sa tauvi keitou na rarawa, kei na yaluma me vaka na yalewa sa taratara.

²⁵ Kakua ni ko lako yani ki na were, ia mo kakua ni lakova na gaunisala; e na vuku ni seleiwau ni meca kei na rere sa tu e na veiyasana.

²⁶ Ko iko, na goneyalewa ni noqu tamata, vauci iko e nai sulu taga, ka qiqi e na dravusa: mo ia na tagi, me vaka e dua sa tagicaka na luvena e dua bau ga, na tagi rarawa sara: ni na vakidacala na nona lako mai vei keda na dauvakacaca.

²⁷ Au sa lesi iko mo vale cecere e na kedra maliwa na noqu tamata, mo vale kaukauwa, mo kila ka vakatovolea kina na nodra i valavala:

²⁸ ko ira kecega era sa dauvuki vakaca, era sa daulako voli ka vakaucaca; era sa parasa ka aironi; ko ira kecega era sa dauvakacaca:

²⁹ sa kama nai iri ni bukawaqa, a sa oti e na bukawaqa na uma; sa sega ni yaga na nona cakacaka na dauvakariri siliva: ni sa sega ni takivi tani na tamata ca;

³⁰ era na vakatokai me siliva biu, ni sa biuti ira ko Jiova.