Jeremaia 52 - Vakavakadewa Makawa

Ko Setekaia, sa sega ni vakarorogo vei tui Papiloni, 1-3. Sa kabai ko Jerusalemi, ka sa rawa; sa moku ko iratou na tagane na luve i Setekaia, a sa vakamatabokotaki ko koya, 4-11. Sa vakama ka vakacacana na koro ko Nipusaretani, 12-23, ka sa kauti ira ki Papiloni era vakabobulataki, 24-30. Sa yalovinaka tale ko Ivili-mirotaki kei Jioiakini, 31-34.

¹ Sa ruasagavulu ka dua na yabaki i Setekaia ni sa buli ko koya me tui, a sa yabaki tini ka dua na nona lewa tiko mai Jerusalemi. Ia na yaca i tinana ko Emutali, na luve i Jeremaia na kai Lipina.

² A sa caka ca ko koya e na mata i Jiova, me vaka na ka kecega sa cakava ko Jioiakimi.

³ Ia sa yaco kina ki Jerusalemi kei Juta na cudru i Jiova, ka sa biuti ira tani kina e matana, ka sa talaidredre tiko ko Setekaia vua na tui Papiloni.

⁴ A sa yaco e nai kaciwa ni yabaki ni nona lewa, e nai katini ni vula, e nai katini ni siga ni vula, sa lako mai ko Nepukanesa na tui Papiloni, kei na nonai valu kecega, ki Jerusalemi, a ra mai tiko kina me ra kaba, ka ra tara na kena vale ni valu me vakavolivolita.

⁵ A sa buku na druadrua ni koro ka yacova nai katini kadua ni yabaki i Setekaia.

⁶ Ia e nai kava ni vula, e nai kaciwa ni siga ni vula, sa ka levu sara na viakana e na koro, a sa sega na kedra madrai na lewe ni vanua.

⁷ Sa qai basuki na koro, ia ko ira kece na tamata i valu era sa dro, ka lako tani mai na koro e na bogi e na sala mai na matamata-ni-koro e na macawa ni bai ruarua, mai na nona were na tui; (ia ko ira na kai Kalitia, era sa tiko vakavolivolita na koro:) ka ra sa muria na sala vaka ki na buca.

⁸ Ia na nodra i valu na kai Kalitia era sa cicimuri koya na tui, ka vauci Setekaia e na buca mai Jeriko; a ra sa veiseyaki tani vua na nonai valu kecega.

⁹ A ra sa taura na tui, ka kauti koya cake vei tui Papiloni ki Ripila e na vanua ko Emaci; a sa lewai koya maikea ko koya.

¹⁰ Ia ko tui Papiloni, sa vakamatei iratou na luve i Setekaia e matana: sa vakamatei ira kece talega na turaga ni Juta ko koya mai Ripila.

¹¹ Ia sa leuta tani ko koya na mata i Setekaia; ka vesuki koya e na sinucodo, ka kauti koya ki Papiloni, ka vakacurumi koya ki na vale ni veivesu ka yacova na siga ni nona mate.

¹² Ia e nai kalima ni vula, e nai katini ni siga ni vula, ka kenai katinikaciwa ni yabaki ni lewa i Nepukanesa na tui Papiloni, sa qai lako mai ko Nipusaretani, na kapiteni ni valu i vakatawa, sa qaravi tui Papiloni, ki Jerusalemi,

¹³ a sa vakama na vale i Jiova, kei na nona vale na tui; kei na vale kece mai Jerusalemi, kei na nodra vale kece na turaga, sa vakama ko koya e na bukawaqa:

¹⁴ ia na nodra i valu kece na kai Kalitia, era tiko vata kaya na kapiteni ni valu i vakatawa, era sa basuka sobu na bai kei Jerusalemi kecega e na veiyasana.

¹⁵ Ia ko Nipusaretani na kapiteni ni valu i vakatawa, sa kauta vakabobula eso na tamata dravudravua, kei na kena vo ni tamata era tiko e na koro, kei ira era sa vuki, era vuki vua na tui Papiloni, kei na kena vo ni lewe vuqa.

¹⁶ Ia eso na tamata dravudravua ni vanua sa laiva ko Nipusaretani na kapiteni ni valu i vakatawa, me ra dausamaka na veivaini ka daucaka were.

¹⁷ Ia na duru parasa ka tu e na vale i Jiova, kei na kenai tutu kei na taqi levu parasa sa tu e na vale i Jiova, sa vorota ga ko ira na kai Kalitia, ka kauta na kena parasa kecega ki Papiloni.

¹⁸ Ia na kuro, kei nai sivi, kei nai koti ni cina, kei na peseni, kei nai taki, kei nai yaya parasa kecega, era sa daucakacaka kina, era sa kauta tani talega.

¹⁹ Ia na peseni, kei na sedre ni dravusa, kei na dari, kei na kuro, kei nai tutu-ni-cina, kei nai taki, kei na bilo; na kena koula ni yaya koula, kei na kena siliva ni yaya siliva, sa kauta tani ko koya na kapiteni ni valu i vakatawa.

²⁰ A duru ruarua, e dua na taqi levu, ka tinikarua na pulumokau parasa sa toka e na vu ni tutuna, ka cakava ko Solomoni e na vale i Jiova: ia sa sega ni kilai rawa na kena bibi ni parasa ni yaya kece oqo.

²¹ Ia sa tini kawalu na kiupiti na kena cecere e dua na duru; ia na wa sa tinikarua na kiupiti sa kena vakavolivolita ka dua na afa kiupiti na kena vavaku: a sa vakalomalomana.

²² A sa dua na kena domodomo parasa e delana; ia na kena balavu e dua na domodomo sa lima na kiupiti, a sa vaka na lawa kei na vua ni pomekaraneti sa ceuti vakavolivolita, ia sa parasa kecega oqo. Ka sa vaka talega kina nai karua ni duru kei na kena vua ni pomekaraneti.

²³ Ia na vua ni pomekaraneti e na yasana vava sa ciwasagavulu ka ono; na vua ni pomekaraneti kecega e volita na daku ni lawa sa dua na drau.

²⁴ Ia na kapiteni ni valu i vakatawa sa kauti Siraia na bete levu, kei Sefanaia nai karua ni bete, kei iratou tolutolu nai vakatawa ni katuba:

²⁵ ia sa kauta tani ko koya mai na koro, e dua na matanivanua sa lesi me vakaraici ira na tamata i valu; ka lewe vitu na tamata vei ira na nonai tokani na tui, eratou sa kune e na koro; kei na nona vunivola na turaga ni valu, o koya ka dauvakasoqona na lewe ni vanua; ka lewe onosagavulu na tamata vei ira na lewe ni vanua, era tiko e loma ni koro.

²⁶ Ia ko ira oqo, sa kauta ko Nipusaretani na kapiteni ni valu i vakatawa, a sa kauti ira kivei tui Papiloni ki Ripila.

²⁷ A sa mokuti ira ko tui Papiloni, ka vakamatei ira mai Ripila e na vanua ko Emaci. Sa kau tani vakabobula vakaoqo ko ira na Juta mai na nodra vanua.

²⁸ Ko ira na tamata oqo sa kauta tani vakabobula ko Nepukanesa: e nai kavitu ni yabaki e lewe tolu na udolu ka ruasagavulu ka tolu na kai Jutia:

²⁹ e nai katinikawalu ni yabaki i Nepukanesa sa kauta tani vakabobula mai Jerusalemi ko koya e lewe walu na drau ka tolusagavulu ka rua:

³⁰ e nai karuasagavulu ka tolu ni yabaki i Nepukanesa sa kauta tani vakabobula ko Nipusaretani na kapiteni ni valu i vakatawa e lewe vitu na drau ka vasagavulu ka lima vei ira na kai Jutia: ko ira na tamata kecega oqo era lewe va na udolu ka ono na drau.

³¹ Ia e nai katolusagavulu ka vitu ni yabaki ni nona vakabobulataki ko Jioiakini na tui Juta, e nai katinikarua ni vula, e nai karuasagavulu ka lima ni siga ni vula, sa qai vueti Jioiakini na tui Juta ko Ivili-mirotaki na tui Papiloni, e nai matai ni yabaki ni nona lewa, ka kauti koya mai na vale ni veivesu:

³² ka sa vosa vinaka vua, ka vakatikora na nonai tikotiko me liu e na nodra i tikotiko na tui era tiko kaya mai Papiloni,

³³ ka sa vakaisosomitaka na nonai sulu ni vale ni veivesu: ka sa kania na kena e matana e na veisiga kece ni nona bula.

³⁴ Ia sa dua na kenai votavota kakana sa solia vua ko tui Papiloni e na veisiga kecega ni nona bula ka yacova na siga sa mate kina.