Jeremaia 49 - Vakavakadewa Makawa

Era na cudruvi ko ira na Amoni, 1-5, ka na vinaka tale, 6. Ena cudruvi ko Itomi, 7-22, kei Tamasiko, 23-27, kei Kitari kei Asori, 28-33, kei Ilama, 34-38. Ena vinaka tale ko Ilama, 39.

¹ E na vuku i Amoni, sa taro vakaoqo ko Jiova; Sa sega beka eso na luvena tagane ko Isireli? sa sega beka e dua na nonai sosomi? a cava sa tauri Kata kina vakaitaukei ko Milikomi, ia ka cava era tiko kina e na kena veikoro ko ira na nona tamata?

² O koya oqo, raica, ena yaco na siga, sa kaya ko Jiova, ka'u na vakarogoya kina mai Rapa na nodra koro na Amoni e dua na kaila ni valu; ia ena yaco oqori me koro rusa ka lala, ia na luvena yalewa era na kama e na bukawaqa: ia ko Isireli, ena qai taukei vei ira era sai taukei vua eliu, sa kaya ko Jiova.

³ Mo qoqolou, ko iko Esiponi, ni sa vakacacani ko Ai: dou tagi, na goneyalewa ni Rapa, sulumaki kemudou e nai sulu taga; dou tagi ka yaso ka veiciciyaki mai na bai ni koro; ni na kau vakabobula tani ko Milikomi, ko ira vata talega na kena bete kei ira na kena turaga.

⁴ A cava ko sa dokai iko kina e na vuku ni veibuca, sa dave tani yani na nomu buca, ko iko na goneyalewa dauvuki? sa vakararavi ko koya e na nonai yau, ka kaya, Ko cei me na lako beka mai vei au?

⁵ Raica, au na vakayacora vei iko na domobula, sa kaya na Turaga ko Jiova ni lewe vuqa, e na vukudra kece era tiko vakavolivoliti iko; ia dou na dui vakasevi sara tani yadua; ena sega e dua me karoni koya sa dro.

⁶ Ia ka oti na ka oqo ka'u na kauti ira tale mai na Amoni era vakabobulataki, sa kaya ko Jiova.

⁷ E na vuku i Itomi, sa taro vakaoqo ko Jiova ni lewe vuqa; Sa sega tale beka na vuku mai Temani? sa yali beka nai vakavuvuli vua na yalomatua? sa takali beka na nodra vuku?

⁸ Dou dro, dou lesu tani, la'ki tiko ki na tikina titobu, koi kemudou na kai Titana; ni'u na vakayacora vua na ka rarawa sa yaco vei Iso, na gauna ka'u na cudruvi koya kina.

⁹ Ke ra lako mai vei iko na dauveti vua-ni-vaini, ke ra sega beka ni laiva e vica na vuana? se ra lako mai ko ira na daubutako e na bogi, era na butakoca beka ga na ka e rauti ira?

¹⁰ Ia koi au ka'u sa vakaluvawaletaki Iso, ka'u sa vakaraitaka na nonai vunivuni, ia ena sega ni vunitaki koya rawa: sa vakacacani ko ira na nona kawa, kei na wekana, kei na kai nona, ka sa yali ko koya.

¹¹ Laivi ira ga na nomu gone era luveniyali, ka'u na vakabulai ira; ia me ra vakararavi ga vei au ko ira na nomu yada.

¹² Ni sa kaya vakaoqo ko Jiova; Raica, ko ira era sa sega ni lewai me gunuva na bilo era sa gunuva vakaidina ga; ia ko iko dina li ko na sega ni cudruvi vakalailai? ko na cudruvi ga, ko na gunuva vakaidina ga.

¹³ Ni'u sa bubului ka cavuti au, sa kaya ko Jiova, ni na vanua lala ga, ka vakalialiai, ka lekutu, ka vosavosacati ko Posira; ia na kena veikoro kece ena lala sara ga ka sega ni mudu.

¹⁴ E dua nai rogorogo ka'u sa rogoca maivei Jiova, ia sa talai yani na mata ki na veivanua, me kaya, Dou soqoni vata, dou mai lako vakaivalu vua, ia dou tu mada me ia na vala.

¹⁵ Ia raica, ka'u na vakalailaitaki iko vei ira na veivanua, mo beci vei ira na tamata.

¹⁶ A nomu ka rerevaki sa vakacalai iko, kei na viavialevu ni lomamu, ko iko sa tiko e na qara ni uluvatu, ka sa taura na tikina cecere ni ulu-ni-koro: kevaka ko sa cakava na nomu sova, me cecere vaka na nona na ikeli, ka'u na kauti iko sobu ga maikina, sa kaya ko Jiova.

¹⁷ Ia ko Itomi ena vakalalataki, ko ira kece era lako voli kina era na kidacala ka vakasiusiu e na vuku ni kena ka rarawa kecega.

¹⁸ Me vaka e na veivakarusai kei Sotoma kei Komora, kei na veikoro ka tu voleka kina, sa kaya ko Jiova, ena vakakina, ena sega ni tiko tale maikea e dua na tamata, ena sega talega ni tiko vulagi kina e dua na luve ni tamata.

¹⁹ Raica, ena lako cake mai ko koya, me vaka na laioni mai na Joritani ni sa vuabale, ki nai tikotiko i koya sa kaukauwa: ia ka'u na sauriva walega ka vakasevi koya me dro tani maikina: ia ko cei na tamata digitaki me'u lesia me kena turaga? ko cei me sa tautauvata kei au? se ko cei me na lokuca vei au na kena gauna? se ko cei nai vakatawa ko ya ena mai tu e mataqu?

²⁰ O koya oqo dou rogoca kina na lewa i Jiova, sa bosea ko koya me yacovi Itomi; kei na ka sa nakita ko koya me yacovi ira na kai Temani: Ko ira era na yarataki ira dina era lalai sara e na qele ni sipi: ena cakavi ira dina ko koya me vakalalataka na nodra i tikotiko.

²¹ Ni sa rorogo na nodra bale, sa yavavala ko vuravura; sa rogo yani na nodra tagi ki na wasa damudamu.

²² Raica, ena vuka cake mai ko koya me vaka na ikeli, ka vakatetaba mai me ca ko Posira: ia na lomadra na qaqa ni Itomi e na siga ko ya ena vaka na loma ni yalewa ni sa taratara.

²³ E na vuku i Tamasiko. Sa taqaya mai ko Emaci, kei Apati: ni ra sa rogoca e dua nai rogorogo ca: sa waicala na lomadra; sa vaka na domobula mai na wasawasa; sa sega ni cegu rawa.

²⁴ Sa malumalumu mai ko Tamasiko, sa vuki yani me dro, ia na rere sa tauvi koya: ia na yaluma kei na rarawa sa manati koya, me vaka na yalewa sa taratara.

²⁵ A cava sa sega ni biu tu kina na koro daudokai, na koro ka'u sa marautaka!

²⁶ Io ko ira na nona cauravou era na bale e na sala ni nona koro, kei ira kece na tamata i valu era na muduki tani e na siga ko ya, sa kaya ko Jiova ni lewe vuqa.

²⁷ Ia ka'u na vakawaqaca na buka e na bai ni Tamasiko, ena katia na veivale vakaturaga mai Peni-etati.

²⁸ E na vuku i Kitari, kei na veimatanitu ni Asori, oqori ena yavita ko Nepukanesa na tui Papiloni, sa kaya vakaoqo ko Jiova; Dou cavu tu, dou lako cake ki Kitari, ka vakacacani ira na kai na tu-i-cake.

²⁹ A nodra vale laca kei na nodra qele ni sipi, era na kauta tani: a nodra i lati, kei na nodra i yaya kece, kei na nodra kameli, era na kauta ga me nodra; a ra na kaci mai, sa vu mai na veiyasana na veivakarerei.

³⁰ Dou dro, dou se tani vakayawa, la'ki tiko ki na tikina titobu, koi kemudou na kai Asori, sa kaya ko Jiova; ni sa bosei kemudou ko Nepukanesa na tui Papiloni mo dou ca, a sa naki ca vei kemudou.

³¹ Dou cavu tu, dou lako cake ki na matanitu sautu, sa tiko vakacegu wale, sa kaya ko Jiova, sa sega ni ra vakaisogo se vakaivakadei, era sa tiko duaduaga.

³² Ia na nodra kameli, ena yaco mei toki ni valu; kei na nodra manumanu e vuqa, me ka e tokitaki: ia ka'u na dui vakasevi ira era tiko e nai yalayala sa yawa sara ki na mata ni cagi kecega; ia ka'u na vakayacora na nodra ka rarawa mai na kena veiyasana kece, sa kaya ko Jiova.

³³ Ia ko Asori, ena kedrai tikotiko na gata lelevu, ena lala ka sega ni mudu: ena sega ni tiko kina e dua na tamata, se vakatawa e dua na luve ni tamata.

³⁴ Sai koya oqo na vosa i Jiova ka yaco vei Jeremaia na parofita ka baleti Ilama, e nai vakatekivu ni lewa i Setekaia na tui Juta, ka vaka,

³⁵ Sa kaya vakaoqo ko Jiova ni lewe vuqa; Raica, au musuka na nodra dakai na Ilama, na vu ni nodra kaukauwa.

³⁶ Ia ka'u na vakayacora vei ira na Ilama na cagi e va mai nai yalayala vava kei lomalagi, ka dui caginataki ira tani yani ki na mata ni cagi kecega ko ya; ena sega na matanitu me na sega ni yaco yani kina na Ilama era vakasevi.

³⁷ Ni'u na vakataqayataki ira na Ilama e na matadra na nodra meca, kei na matadra era segata me ra vakamatei ira: ia ka'u na vakayacora vei ira na ca, io na noqu cudru waqawaqa, sa kaya ko Jiova; ia ka'u na vakayacora vei ira nai seleiwau, ka me'u vakaoti ira sara:

³⁸ ia ka'u na viritura na noqu i tikotiko vakaturaga mai Ilama, ka vakaotia mai kina na tui kei ira na turaga, sa kaya ko Jiova.

³⁹ Ia e na gauna maimuri, ka'u na kauti ira tale mai na Ilama era vakabobulataki, sa kaya ko Jiova.